‘96’ நடிகர்கள் இல்லாமல் 2-ம் பாகம் சாத்தியமில்லை: இயக்குநர் பிரேம் குமார் உறுதி
‘96’ படத்தில் நடித்த நடிகர்கள் இல்லையெனில், அதன் இரண்டாம் பாகம் உருவாக்கப்படாது என இயக்குநர் பிரேம் குமார் தெளிவுபடுத்தியுள்ளார்.
விஜய் சேதுபதி, த்ரிஷா நடிப்பில் பிரேம் குமார் இயக்கிய ‘96’ படம், பெரும் வரவேற்பையும் வசூல் வெற்றியையும் பெற்றது. அதன் தொடர்ச்சியாக, ‘96’ படத்தின் 2-ம் பாகத்திற்கான கதையை பிரேம் குமார் எழுதியிருந்தார். முதல் பாகம் முடிந்த இடத்தில் இருந்து அடுத்த பகுதி தொடங்கும் என்றும் அவர் கூறியிருந்தார்.
சில மாதங்களுக்கு முன்பு ‘96’ 2-ம் பாகத்தின் பணிகள் ஆரம்பிக்கப்பட்டன. ஆனால் முதல் பாகத்தில் நடித்தவர்கள் தற்போது முன்னணி நடிகர்களாக உயர்ந்திருப்பதால், அவர்களின் சம்பளம் உள்ளிட்ட சிக்கல்கள் காரணமாக திட்டம் ஒத்திவைக்கப்பட்டது. இருந்தாலும், “அதே நடிகர்கள் இல்லாமல் 2-ம் பாகத்தை எடுக்கவே மாட்டேன்” என்று பிரேம் குமார் பேட்டியில் வலியுறுத்தினார்.
சமீபத்தில் ‘96’ 2-ம் பாகத்தின் கதையை படித்த தயாரிப்பாளர் ஐசரி கணேஷ், இயக்குநருக்கு தங்கச் செயினை பரிசாக வழங்கியுள்ளார். அந்த அளவிற்கு அந்தக் கதை அவருக்கு பிடித்ததாகத் தெரிய வருகிறது. மேலும், “நான் இதுவரை எழுதிய கதைகளிலும், இனிமேல் எழுதப் போகும் கதைகளிலும், ‘96’ 2-ம் பாகத்தின் கதைதான் சிறந்தது” என்று பிரேம் குமார் தெரிவித்துள்ளார்.
ஆனால், இந்த படம் உண்மையில் உருவாகுமா என்பது இப்போது அனைவரின் கேள்வியாக உள்ளது.
