திருச்செந்தூர் கோயிலில் ரூ.500 பிரேக் தரிசனம்: பக்தர்கள் எதிர்ப்பு
திருச்செந்தூர் சுப்பிரமணிய சுவாமி கோயில் நிர்வாகம், ரூ.500 கட்டணத்தில் பிரேக் தரிசன முறை அறிமுகப்படுத்த திட்டமிட்டுள்ளது. இதில் எதிர்ப்பு இருந்தால் பக்தர்கள் தெரிவிக்கலாம் என்றும், இதற்காக அறிவிப்பாணை வெளியிடப்பட்டுள்ளது.
திருச்செந்தூர் கோயிலில் விசேஷ நாட்கள், விடுமுறை காலங்கள் மற்றும் திருவிழா நாட்களை தவிர, சாதாரண நாட்களிலும் (வியாழன் முதல் ஞாயிறு வரை) பக்தர்கள் கூட்டம் கடுமையாக காணப்படுகிறது.
பொதுதரிசனம் மற்றும் ரூ.100 கட்டண தரிசன வழிகளில் தற்போது பக்தர்கள் அனுமதிக்கப்படுகின்றனர். இதனைத் தொடர்ந்தே, ரூ.500 கட்டணத்தில் இடைநிறுத்த தரிசனம் (பிரேக் தரிசனம்) அமல்படுத்த தீர்மானிக்கப்பட்டுள்ளது.
அறநிலையத்துறை அமைச்சர் தெரிவித்திருப்பதாவது: “சிறப்பு தரிசனமாக பெருவாரியாக வரும் கோயில்களில், தினசரி ஒரு மணிநேர இடைநிறுத்த தரிசனம் வழங்கப்படும்”. இதன் அமல்படுத்தும் விதமாக, திருச்செந்தூர் கோயிலில் தினம் பிற்பகல் 3 மணி முதல் 4 மணி வரை, விசேஷ நாட்கள் மற்றும் திருவிழா நாட்களை தவிர, பக்தர்கள் ரூ.500 கட்டணத்தில் இடை நிறுத்த தரிசனம் பெறுவார்கள்.
பிரேக் தரிசனம் கிடைக்காத நாட்கள்:
- தைப்பூசம் – 5 நாள்
- மாசித்திருவிழா – 10 நாள்
- பங்குனி உத்திர திருவிழா – 3 நாள்
- சித்திரை வருடப் பிறப்பு – 1 நாள்
- வைகாசி விசாகம் – 5 நாள்
- ஆவணி திருவிழா – 5 நாள்
- நவராத்திரி உற்சவம் – 5 நாள்
- கந்த சஷ்டி திருவிழா – 10 நாள்
- அமாவாசை, பவுர்ணமி – வருடத்திற்கு 24 நாள்
மொத்தம் 68 நாட்கள் மற்றும் நிர்வாக அறிவிக்கும் பிற நாட்களிலும் பிரேக் தரிசனம் அமல்படுத்தப்படாது.
ஆட்சேபனைகள் அல்லது ஆலோசனைகள் உள்ள பக்தர்கள், கோயில் இணை ஆணையருக்கு செப்.11 மாலை 5 மணிக்குள் எழுத்து மூலம் அனுப்ப வேண்டும்.
கோயில் நிர்வாகத்தின் இந்த முடிவுக்கு பக்தர்கள் கடுமையான எதிர்ப்பு தெரிவிக்கின்றனர். மாதந்தோறும் கோயில் உண்டியல்களில் கிடைக்கும் காணிக்கை மூலம் கோடிக்கணக்கில் வருவாய் வரும் நிலையில், ரூ.500 கட்டண முறையை அறிமுகப்படுத்த தேவையில்லை எனக் குறிப்பிடுகின்றனர்.
