வாலிபால் போட்டியில் டான் போஸ்கோ சாம்பியன்

சான் அகாடமி சார்பில் நடத்தப்பட்ட 7வது சென்னை மாவட்ட பள்ளிகள் இடையிலான வாலிபால் போட்டி, எழும்பூரில் உள்ள மேயர் ராதாகிருஷ்ணன் விளையாட்டரங்கில் நடைபெற்றது. மூன்று நாட்கள் நீடித்த இந்த தொடரில், சிறுவர் பிரிவில் 27 அணிகளும், சிறுமியர் பிரிவில் 16 அணிகளும் பங்கேற்றன.

ஆண்கள் பிரிவு இறுதிப் போட்டியில், பெரம்பூர் டான் போஸ்கோ அணி, முகப்பேர் வேலம்மாள் அணியை 20-25, 25-23, 25-23 என்ற செட் கணக்கில் வீழ்த்தி கோப்பையை வென்றது. மூன்றாவது இடத்தை மயிலாப்பூர் செயின்ட் பீட்ஸ் ஆங்கிலோ இந்தியன் பள்ளியும், நான்காவது இடத்தை ராயபுரம் செயின்ட் பீட்டர்ஸ் பள்ளியும் பிடித்தன.

பெண்கள் பிரிவில், புரசைவாக்கம் டிஇஎல்சி மெக்டலின் அணி, நுங்கம்பாக்கம் வித்யோதயா மெட்ரிக் அணியை 25-18, 25-7 என்ற செட் கணக்கில் தோற்கடித்து சாம்பியனானது. மூன்றாவது இடத்தை சென்னை மேல்நிலைப் பள்ளியும், நான்காவது இடத்தை அண்ணாநகர் ஜெசி மோசஸ் பள்ளியும் பெற்றன.

விழாவில் பரிசுகளை வழங்க, தமிழ்நாடு தடகள சங்கத் தலைவர் W.I. தேவராம், தெற்கு ரயில்வே அதிகாரி சுனிதா, சான் அகாடமி முதல்வர் ஹேமலதா, சென்னை மாவட்ட வாலிபால் சங்க துணைத் தலைவர் தினகர், செயல் தலைவர் ஜெகதீசன், பொருளாளர் பழனியப்பன், செயலாளர் கேசவன், முன்னாள் துணைத் தலைவர் ராஜன் உள்ளிட்டோர் பங்கேற்றனர்.

சிறு விளையாட்டு செய்திகள்

• 1972-ம் ஆண்டு ஜெர்மனியில் நடந்த ஒலிம்பிக் ஹாக்கியில் வெண்கலப் பதக்கம் வென்ற இந்திய அணியின் வீரரும், புகழ்பெற்ற டென்னிஸ் வீரர் லியாண்டர் பயஸின் தந்தையுமான வெஸ் பயஸ் (வயது 80), வயது முதிர்வால் கொல்கத்தாவில் காலமானார்.
• திருவள்ளூர் பிரீமியர் ஹாக்கி தொடரில், ஜிஎஸ்டி அணி 6-3 என்ற கோல் கணக்கில் மோஸ்கோ மேஜிக் அணியை வீழ்த்தியது.
• ஆகஸ்ட் 18-ம் தேதி சென்னையில் தொடங்க உள்ள புச்சிபாபு கிரிக்கெட் தொடருக்கான மகாராஷ்டிரா அணியில் அங்கித் பாவனே கேப்டனாகவும், ருதுராஜ் கெய்க்வாட், பிரித்வி ஷா உள்ளிட்டோர் இடம் பெற்றுள்ளனர்.
• புச்சிபாபு தொடரில், டிஎன்சிஏ பிரெசிடெண்ட் லெவன் அணிக்கு பிரதோஷ் ரஞ்ஜன் பால், டிஎன்சி லெவன் அணிக்கு ஷாருக்கான் கேப்டனாக நியமிக்கப்பட்டுள்ளனர்.
• யுஇஎஃப்ஏ சூப்பர் கோப்பையில், பாரிஸில் நடைபெற்ற பிஎஸ்ஜி – டோட்டன்ஹாம் போட்டி 2-2 என டிராவில் முடிவடைந்தது. பின்னர் நடந்த பெனால்டி ஷூட்அவுட்டில் பிஎஸ்ஜி 4-3 என்ற கணக்கில் வென்றது.