மேக்ஸ்வெல் அதிரடியால் தென் ஆப்பிரிக்காவை வீழ்த்தி டி20 தொடரை வென்றது ஆஸ்திரேலியா!
தென் ஆப்பிரிக்காவுக்கு எதிரான 3-வது மற்றும் கடைசி டி20 ஆட்டத்தில் ஆஸ்திரேலியா 2 விக்கெட்கள் வித்தியாசத்தில் வெற்றி பெற்று, தொடரை 2-1 என கைப்பற்றி கோப்பையை வென்றது.
கெய்ன்ஸ் நகரில் உள்ள கசாலிஸ் மைதானத்தில் நடந்த இந்த ஆட்டத்தில், முதலில் பேட்டிங் செய்த தென் ஆப்பிரிக்க அணி 7 விக்கெட்களுக்கு 172 ரன்கள் எடுத்தது. இளம் வீரர் டெவால்ட் பிரேவிஸ் 26 பந்துகளில் 6 சிக்ஸர்கள், ஒரு பவுண்டரியுடன் 53 ரன்கள் அடித்து பிரகாசித்தார். குறிப்பாக, ஆரோன் ஹார்டியின் 10-வது ஓவரில் நான்கு திசைகளில் சிக்ஸர்கள் அடித்து 27 ரன்கள் குவித்தார்.
லுவான்-ட்ரே பிரிட்டோரியஸ் (24 ரன்கள்), டிரிஸ்டன் ஸ்டப்ஸ் (25 ரன்கள்), ராஸி வான் டெர் டஸ்ஸன் (38 ரன்கள்) ஆகியோர் ஆதரவு அளித்தனர். ஆனால், 11 ஓவர்களில் 108 ரன்கள் எடுத்திருந்த தென் ஆப்பிரிக்க அணி, பிரேவிஸ் ஆட்டமிழந்த பிறகு வேகத்தை இழந்தது. கடைசி 9 ஓவர்களில் 64 ரன்கள் மட்டுமே எடுத்து 4 விக்கெட்களை இழந்தது.
173 ரன்கள் இலக்குடன் களம் இறங்கிய ஆஸ்திரேலியா, 19.5 ஓவர்களில் 8 விக்கெட்களுக்கு 173 ரன்கள் எடுத்து வெற்றி பெற்றது. கிளென் மேக்ஸ்வெல் 36 பந்துகளில் 2 சிக்ஸர்கள், 8 பவுண்டரிகளுடன் 62 ரன்கள் எடுத்து அணியை வெற்றிக்குத் தள்ளினார். கேப்டன் மிட்செல் மார்ஷ் 37 பந்துகளில் 5 சிக்ஸர்கள், 3 பவுண்டரிகளுடன் 54 ரன்கள் சேர்த்தார்.
மற்ற வீரர்களில் டிராவிஸ் ஹெட் (19), ஜோஷ் இங்லிஷ் (0), கேமரூன் கிரீன் (9), டிம் டேவிட் (17), ஆரோன் ஹார்டி (1), பென் டுவார்ஷுயிஸ் (1), நேதன் எலிஸ் (0) ரன்களில் வெளியேறினர். கடைசி ஓவரில் 10 ரன்கள் தேவைப்பட்ட நிலையில், லுங்கி நிகிடி வீசிய 2-வது மற்றும் 5-வது பந்துகளில் பவுண்டரி அடித்த மேக்ஸ்வெல் அணியை வெற்றியடையச் செய்தார்.
முதல் போட்டியில் 17 ரன்கள் வித்தியாசத்தில் வெற்றி, இரண்டாவது ஆட்டத்தில் 53 ரன்கள் வித்தியாசத்தில் தோல்வி கண்ட ஆஸ்திரேலியா, மூன்றாவது ஆட்ட வெற்றியால் தொடரை 2-1 என கைப்பற்றியது.
ஆட்ட நாயகனாக கிளென் மேக்ஸ்வெல் தேர்வானார்; தொடர் நாயகனாக டிம் டேவிட் அறிவிக்கப்பட்டார். டி20 தொடருக்குப் பிறகு, இரு அணிகளும் 3 ஒருநாள் ஆட்டங்கள் கொண்ட தொடரில் மோதவுள்ளன. அதன் முதல் ஆட்டம் வரும் 19-ம் தேதி கசாலிஸ் மைதானத்தில் நடைபெறுகிறது.
