அமெரிக்காவின் செயின்ட் லூயிஸ் நகரில் நடைபெற்று வரும் சின்க்ஃபீல்டு கோப்பை செஸ் தொடரின் 3-வது சுற்று முடிவடைந்தது. இதில் இந்தியாவின் உலக சாம்பியன் டி. குகேஷ், பிரேசிலின் சாமுவேல் சேவியனை எதிர்கொண்டார். கருப்பு காய்களுடன் விளையாடிய குகேஷ், 44-வது நகர்த்தலின் போது ஆட்டத்தை டிராவில் முடித்தார்.
இந்திய கிராண்ட் மாஸ்டரான ஆர். பிரக்ஞானந்தா, உஸ்பெகிஸ்தானின் நோடிர்பெக் அப்துசத்தோரோவை சந்தித்தார். இந்த ஆட்டமும் 46-வது நகர்த்தலின் போது டிராவாக முடிவடைந்தது. அதேசமயம், அமெரிக்காவின் பேபியானோ கருனா, பிரான்ஸ் வீரர் அலிரேசா ஃபிரோஸ்ஜாவை 46-வது நகர்த்தலில் தோற்கடித்தார்.
மேலும், அமெரிக்க வீரர் லெவோன் அரோனியன் மற்றும் பிரான்ஸின் மாக்சிம் வச்சியர் லாக்ரேவ் மோதிய ஆட்டம் 73-வது நகர்த்தலின் போது டிராவாக முடிந்தது. போலந்தின் டுடா ஜான் கிரிஸ்டோஃப்பை எதிர்கொண்ட அமெரிக்காவின் வெஸ்லி சோவின் ஆட்டம் 32-வது நகர்த்தலில் டிரா ஆனது.
3 சுற்றுகளுக்குப் பின் பேபியானோ கருனா, லெவோன் அரோனியன், பிரக்ஞானந்தா தலா 2 புள்ளிகளுடன் முதலாவது 3 இடங்களில் உள்ளனர். வெஸ்லி சோ, மாக்சிம் வச்சியர் லாக்ரேவ், சாமுவேல் சேவியன், அலிரேசா ஃபிரோஸ்ஜா மற்றும் குகேஷ் ஆகியோர் தலா 1.5 புள்ளிகளுடன் 4-வது முதல் 8-வது இடங்களில் உள்ளனர். டுடா ஜான் கிரிஸ்டோஃப் ஒரு புள்ளியுடன் 9-வது இடத்திலும், நோடிர்பெக் அப்துசத்தோரோவ் 0.5 புள்ளியுடன் கடைசியாக உள்ளார்
