ஆசிய ஹாக்கி கோப்பை: இந்தியா ஜப்பானை வென்று முன்னேறியது
ஆசிய ஹாக்கி கோப்பை போட்டியின் லீக் சுற்றில் இந்தியா அணியினர் சிறப்பாக விளையாடி ஜப்பான் அணியைத் தோற்கடித்தனர்.
பிஹார் மாநிலம் ராஜ்கிரில் இப்போட்டிகள் நடைபெற்று வருகின்றன. நேற்று பிற்பகலில் நடைபெற்ற ஏ பிரிவு லீக் ஆட்டத்தில் இந்தியா மற்றும் ஜப்பான் அணிகள் மோதின. இதில் இந்திய வீரர்கள் சிறப்பாக செயல்பட்டு 3-2 என்ற கோல் கணக்கில் ஜப்பான் அணியை வென்றனர்.
இந்திய அணியில் கேப்டன் ஹர்மன்பிரீத் 5, 46-வது நிமிடங்களில் கோல் அடித்தார். இந்திய வீரர் மன்தீப் சிங் 4-வது நிமிடத்தில் ஒரு கோல் செய்தார். ஜப்பான் தரப்பில் கொசெய் கவாபே 38, 59-வது நிமிடங்களில் கோல்கள் அடித்தார். கடந்த வெள்ளிக்கிழமை நடந்த முதல் லீக் ஆட்டத்தில் இந்தியா 4-3 என்ற கோல் கணக்கில் சீனாவை வென்றது. இந்நிலையில், இந்தியா மற்றும் கஜகஸ்தான் அணிகள் மோதும் கடைசி லீக் ஆட்டம் இன்று நடைபெற உள்ளது.
