ஐபிஎல் கவர்ச்சியை தவிர்த்து சிவப்பு பந்து கிரிக்கெட்டில் ஒளிரும் அதிசய வீரர் – ஷுபம் சர்மா!
இன்றைய காலத்தில் பெரும்பாலான வீரர்கள் ஐபிஎல் மற்றும் டி20 வடிவை நோக்கிச் செல்லும் நிலையில், மத்தியப் பிரதேச ரஞ்சி அணியின் கேப்டன் ஷுபம் சர்மா முழுமையாக சிவப்பு பந்து கிரிக்கெட்டிற்கே தனது வாழ்வை அர்ப்பணித்துள்ளார்.
புள்ளிவிபரங்கள்:
32 வயதான ஷுபம் ஷியாம்சுந்தர் சர்மா 67 முதல் தரப் போட்டிகளில் 4,301 ரன்கள் குவித்துள்ளார். சராசரி – 43.44. இதில் 12 சதங்கள், 23 அரைசதங்கள், அதிகபட்ச ஸ்கோர் – 240.
லிஸ்ட் ஏ போட்டிகளில் 44 ஆட்டங்களில் 1,477 ரன்கள் எடுத்துள்ளார். அதிகபட்சம் 108 ரன்கள் (2 சதம், 11 அரைசதம்).
டிட்வென்டி போட்டிகளில் வெறும் 17 ஆட்டங்களில் மட்டும் விளையாடி 290 ரன்கள் மட்டுமே எடுத்துள்ளார்.
வலது கை ஆஃப் பிரேக் பந்துவீச்சில் 28 முதல் தர விக்கெட்டுகள் (ஒருமுறை 5/59). லிஸ்ட் ஏ போட்டிகளில் 23 விக்கெட்டுகள் (அதிகபட்சம் 4/21).
வாழ்க்கைப் பயணம்:
2012-ஆம் ஆண்டு யு–19 உலகக்கோப்பைக்கு உத்தேச அணியில் இடம் பெற்றாலும் இறுதி அணியில் தேர்வாகவில்லை. அதே தொடரை உன்முக்த் சந்த் தலைமையிலான இந்திய அணி வென்றது. 12 ஆண்டுகளாக மத்தியப் பிரதேச அணிக்காக விளையாடி வரும் ஷுபம், 2 ஆண்டுகளாக ரஞ்சி கேப்டனாக உள்ளார். ஆனால் இந்தியா யு–19, இந்தியா ஏ ஆகிய அணிகளில் ஒருபோதும் வாய்ப்பு பெறவில்லை.
அவரது சகாக்களான ரஜத் படிதார், குல்தீப் சென், வெங்கடேஷ் அய்யர், ஆவேஷ் கான் ஆகியோர் இந்திய அணியில் விளையாடியபோதும், ஷுபம் உள்நாட்டுக் கிரிக்கெட்டில் தன் சாதனையிலேயே மகிழ்ச்சி அடைகிறார்.
சிறப்புகள்:
2021–22 உள்நாட்டு தொடரில் மட்டும் அவர் 2,849 ரன்கள் அடித்துள்ளார். அதே சீசனில் 9 சதங்கள், 52.75 சராசரி அவரின் திறமையை வெளிப்படுத்தியது. துலீப் கோப்பையில் வடகிழக்கு மண்டல அணிக்கு எதிராக 122 ரன்கள் எடுத்தார்.
அந்த சீசனிலேயே மத்தியப் பிரதேசம் ரஞ்சி கோப்பை வென்றது. ஷுபம் 6 ஆட்டங்களில் 608 ரன்கள் குவித்து முக்கிய பங்காற்றினார்.
ராகுல் திராவிடின் சீடர்:
“தேசிய கிரிக்கெட் அகாடமியில் யு–16 முகாமின் போது ராகுல் திராவிட் சார் அளித்த ஆலோசனைகள் இன்னும் எனக்கு உதவுகின்றன. போட்டிகளுக்கான மனத் தயாரிப்பை அவர் கற்றுக் கொடுத்தார். அது எனக்கு பொக்கிஷம்” என்று ஷுபம் கூறுகிறார்.
டி20 மற்றும் ஐபிஎல் கவர்ச்சி சூழ்ந்துள்ள இந்த தலைமுறையில், சிவப்பு பந்து கிரிக்கெட்டையே வாழ்க்கையாகக் கொண்டாடும் வீரர்கள் மிக அரிது. அப்படிப்பட்ட அதிசயப்பிறவியே ஷுபம் சர்மா.
