மே.இ.தீவுகள் மீது டி20 தொடரில் வெற்றி: நேபாளம் அணி சாதனை
மேற்கு இந்தியத் தீவுகள் அணிக்கு எதிரான 2-வது டி20 கிரிக்கெட் போட்டியில் நேபாளம் அணி 90 ரன்கள் வித்தியாசத்தில் வெற்றி பெற்று தொடரை 2-0 என கைப்பற்றியது.
ஷார்ஜாவில் நேற்று முன்தினம் நடைபெற்ற 2-வது டி20 ஆட்டத்தில் முதலில் பேட் செய்த நேபாளம் அணி 20 ஓவர்களில் 6 விக்கெட்கள் இழப்புக்கு 173 ரன்கள் குவித்தது. அதிகபட்ச ரன்கள் கேப்டன் ஆசிப் ஷேக் 47 பந்துகளில், 2 சிக்ஸர்கள், 8 பவுண்டரிகளுடன் 68 மற்றும் சந்திப் ஜோரா 39 பந்துகளில், 5 சிக்ஸர்கள், 3 பவுண்டரிகளுடன் 63 ரன்கள் சேர்த்தனர். மே.இ.தீவுகள் அணியில் அகீல் ஹோசைன் மற்றும் கைல் மேயர்ஸ் தலா 2 விக்கெட்கள் எடுத்தனர்.
174 ரன்கள் இலக்குடன் பேட் செய்த மே.இ.தீவுகள் அணி 17.1 ஓவர்களில் 83 ரன்களுக்கு ஆட்டமிழந்தது. அதிகபட்ச ரன்கள் ஜேசன் ஹோல்டர் 21, அக்கீம் அகஸ்டே 17, அமிர் ஜாங்கோ 16. மற்ற பேட்ஸ்மேன்கள் இரட்டை இலக்கத்தை எட்டவில்லை.
நேபாளம் அணி சார்பில் முகமது ஆதில் ஆலம் 4 விக்கெட்கள், குஷால் பர்தெல் 3 விக்கெட்கள் எடுத்தனர். 90 ரன்கள் வித்தியாசத்தில் வெற்றி பெற்ற நேபாளம் அணி, 3 ஆட்டங்கள் கொண்ட தொடரை 2-0 என கைப்பற்றியது. முதல் ஆட்டத்தில் அணி 19 ரன்கள் வித்தியாசத்தில் வெற்றிபெற்றது.
நேபாளம் அணி, டெஸ்ட் அந்தஸ்து பெற்ற அணிக்கு எதிராக டி20 தொடரை வெல்வது இதுவே முதன்முறையாகும். தொடரை இழந்த மே.இ.தீவுகள், ஐசிசி முழுநேர உறுப்பினர் இல்லாத அணிக்கு எதிராக குறைந்த ரன்களில் ஆட்டமிழந்த சாதனையை பதிவு செய்துள்ளது. இதற்கு முன்னர் இங்கிலாந்து அணியும் 2014-ம் ஆண்டு டி20 உலகக் கோப்பையில் நெதர்லாந்துக்கு எதிராக 85 ரன்களில் ஆட்டமிழந்தது.
