டெல்லியில் வெளிநாட்டு பயிற்சியாளர்களை தெருநாய்கள் கடித்த சம்பவம் | பாரா தடகள சாம்பியன்ஷிப் 2025
12-வது உலக பாரா தடகள சாம்பியன்ஷிப் போட்டிக்காக டெல்லி வந்த வெளிநாட்டு பயிற்சியாளர்கள் தெருநாய்கள் தாக்குதலுக்குள்ளாகியுள்ளனர். இந்த சம்பவம் வீரர்கள் மற்றும் அமைப்பில் அதிர்ச்சியை ஏற்படுத்தியுள்ளது.
கென்யாவின் ஓட்டப்பந்தய பயிற்சியாளர் டென்னிஸ் மவான்சோ மற்றும் ஜப்பானைச் சேர்ந்த உதவி பயிற்சியாளர் மீகோ ஒகுமட்சு, அக்டோபர் 3-ஆம் தேதி காலை ஜவஹர்லால் நேரு ஸ்டேடியத்தில் பயிற்சியில் ஈடுபட்டிருந்தபோது, தெருநாய்கள் அவர்களை கடித்துள்ளன.
இதுபற்றி கென்யா அணியின் மருத்துவர் மைக்கேல் ஒகாரோ கூறியதாவது: “சம்பவம் காலை 9:30 மணியளவில் நடந்தது. டென்னிஸை மருத்துவமனைக்கு கொண்டு சென்று ரேபிஸ் தடுப்பூசி போடப்பட்டது. உலக சாம்பியன்ஷிப் போன்ற ஒரு பெருநிகழ்வில் இது மிகவும் கவலைக்குரியது. இந்நேரத்தில் டென்னிஸின் பாதுகாப்பே முதன்மை கவலையாக உள்ளது.”
ஜப்பான் பயிற்சியாளர் மீகோ ஒகுமட்சு: “காலை நேரத்தில் ஒரு நாய் என்னைக் கடித்தது. அதிர்ஷ்டவசமாக, மருத்துவ குழு விரைந்து முதலுதவி செய்தது” என தெரிவித்தார்.
இந்தியன் ஆயில் உலக பாரா தடகள சாம்பியன்ஷிப் 2025 ஏற்பாட்டுக் குழு வெளியிட்ட அறிக்கையில், சம்பவம் நடந்த இடத்திற்கு அருகே தனிநபர்கள் தெருநாய்களுக்கு தொடர்ந்து உணவளித்து வந்ததாக குற்றம் சாட்டப்பட்டுள்ளது.
டெல்லியில் நாய் கடி வழக்குகள் 2024-ம் ஆண்டில் 25,210 பதிவாகியுள்ளன; இது முந்தைய ஆண்டில் 17,847 வழக்குகளாக இருந்தது. 2025-ம் ஆண்டின் ஜனவரியில் மட்டும் டெல்லியில் சுமார் 3,200 நாய் கடி சம்பவங்கள் பதிவாகியுள்ளன. நகரில் தெருநாய்களின் எண்ணிக்கை 8 லட்சம் என்று மதிப்பிடப்படுகிறது.
