மருத்துவ மாணவர் சேர்க்கையில் சூட்டிங் பால் வீராங்கனைக்கு 900 மதிப்பெண் வழங்க ஐகோர்ட் உத்தரவு!
சர்வதேச சூட்டிங் பால் போட்டிகளில் தங்கம் மற்றும் வெண்கல பதக்கங்கள் வென்ற மாணவிக்கு, மருத்துவக் கல்லூரி சேர்க்கையில் விளையாட்டு கோட்டா அடிப்படையில் 900 மதிப்பெண் வழங்க உயர்நீதிமன்றம் உத்தரவிட்டுள்ளது.
புதுக்கோட்டை மாவட்டம் கீரனூரைச் சேர்ந்த சிவகுமாரின் மகள் ஹரினி, பிளஸ்-2 முடித்தவுடன் இந்தாண்டு நடைபெற்ற நீட் தேர்வில் வெற்றி பெற்று, விளையாட்டு முன்னுரிமை அடிப்படையில் எம்.பி.பி.எஸ். சேர்க்கைக்காக விண்ணப்பித்தார்.
இரு முக்கிய போட்டிகளில் பதக்கங்கள்:
- பிப்ரவரி மாதம் நேபாளத்தில் நடந்த ஆசிய சூட்டிங் பால் போட்டியில் தங்கப்பதக்கம்
- மார்ச் மாதம் டெல்லியில் நடைபெற்ற உலகக் கோப்பை சூட்டிங் பால் சேம்பியன்ஷிப் போட்டியில் வெண்கல பதக்கம்
இந்த சாதனைகளின் அடிப்படையில், 500 + 400 = 900 மதிப்பெண்கள் ஹரினிக்கு வழங்கப்பட வேண்டியது. ஆனால், சான்றிதழ் சரிபார்ப்பு நாளில், இந்த போட்டிகளில் 7 நாடுகள் பங்கேற்கவில்லை என்பதைக் காரணமாகக் கொண்டு, அவை சர்வதேச போட்டியாக செல்லாது என்றும், எனவே மொத்தம் 200 மதிப்பெண் மட்டுமே வழங்கப்படும் என்றும் கூறப்பட்டது.
இதை எதிர்த்து ஹரினியின் தந்தை வழக்குத் தாக்கல் செய்தார். அதில், “சூட்டிங் பால் என்பது 7 பேர் கொண்ட குழுவினரால் ஆடப்படும் விளையாட்டு; இதில் ‘7 நாடுகள்’ விதி பொருந்தாது. மேலும், மத்திய அரசு அவளுக்கு சர்வதேச பதக்க வென்றதற்கான சான்றிதழும் வழங்கியுள்ளது. எனவே, 900 மதிப்பெண் வழங்கி, MBBS இடம் ஒதுக்க வேண்டும்” என்று வலியுறுத்தினார்.
வழக்கின் விசாரணையில் நீதிபதி சி.சரவணன், “மருத்துவ மாணவர் சேர்க்கையில், சர்வதேச போட்டிகளில் வென்ற பதக்கங்களுக்காக ஹரினிக்கு 900 மதிப்பெண் வழங்கப்பட வேண்டும். அதன் அடிப்படையில் எம்.பி.பி.எஸ். சீட் ஒதுக்க வேண்டும்” என்று முக்கிய உத்தரவு பிறப்பித்தார்.
இந்த உத்தரவு, விளையாட்டு வீரர்கள் பெறும் உரிமைகளை உறுதிப்படுத்தும் வகையில் முக்கிய நீதிமன்ற தீர்ப்பாகும்.
