கோல்ட்மேன் சாக்ஸ் நிறுவனத்தில் AI மென்பொருள் பொறியாளர்களை நியமிக்க தீர்மானம் – தலைமை தகவல் அதிகாரியின் அறிவிப்பு
உலகளாவிய முதலீட்டு வங்கித் துறையில் முக்கியப் பங்காற்றி வரும் அமெரிக்காவின் கோல்ட்மேன் சாக்ஸ் நிறுவனம், செயற்கை நுண்ணறிவு தொழில்நுட்பத்தின் வாயிலாக செயல்திறனை அதிகரிக்கும் நோக்கில், AI மென்பொருள் பொறியாளர்களை பணியமர்த்த திட்டமிட்டுள்ளதாக அதன் தலைமை தகவல் அதிகாரி தெரிவித்துள்ளார்.
1869ஆம் ஆண்டு நிறுவப்பட்ட இந்த நிறுவனம், அமெரிக்காவின் நியூயார்க் நகரத்தில் தலைமையகத்தைக் கொண்டு செயல்பட்டு வருகிறது. 2023ஆம் ஆண்டு வருமான அடிப்படையில் உலகின் இரண்டாவது பெரிய முதலீட்டு வங்கியாகும் கோல்ட்மேன் சாக்ஸ், தற்போதைய வளர்ச்சி சூழலில், தொழில்நுட்பத்தை பரந்த அளவில் பயன்படுத்தும் முயற்சியில் ஈடுபட்டு வருகிறது.
இந்த முயற்சியின் ஒரு பகுதியாக, லண்டனைத் தளமாகக் கொண்ட ஒரு ஸ்டார்ட்அப் நிறுவனத்தால் உருவாக்கப்பட்ட AI மென்பொருள் பொறியாளர்களை நிறுவனம் பணியில் அமர்த்த உள்ளதாகவும், இத்திறன் வாய்ந்த செயற்கை நுண்ணறிவு பொறியாளர்களின் ஊடாக வங்கியின் செயல்பாட்டு திறன் 3 முதல் 4 மடங்கு வரை அதிகரிக்க முடியும் எனவும் தலைமை தகவல் அதிகாரி குறிப்பிட்டுள்ளார்.
மேலும், “AI பொறியாளர்கள் எனப்படும் இந்த மென்பொருள் செயலிகள் மனிதர்களைப் போல் ஓய்வு எடுக்கத் தேவையில்லை, அவர்களால் எப்போதும் செயல்பட முடியும். அதேசமயம் சம்பள உயர்வு, இடமாற்றம் அல்லது வேலைவிலக்கு போன்ற கோரிக்கைகள் ஏதுமில்லை என்பதும் இது போன்ற தொழில்நுட்பத் தீர்வுகளின் சிறப்பம்சமாகும்” என அவர் கூறியுள்ளார்.
இந்நிலையில், தொழில்நுட்ப முன்னேற்றத்தின் தொடர்ச்சியில், வங்கித் துறையில் இயங்கும் பணியாளர்களுக்கிடையே புதிய அச்சம் உருவாகியுள்ளது. எதிர்வரும் ஐந்து ஆண்டுகளில், உலகெங்கிலும் உள்ள வங்கிகளில் பணியாற்றும் சுமார் 2 லட்சம் ஊழியர்கள் வேலை இழக்கும் அபாயம் இருப்பதாக தொழில்துறையியலாளர்கள் மற்றும் மனிதவள நிபுணர்கள் எச்சரித்துள்ளனர்.
மிக விரைவாக வளர்ந்து வரும் செயற்கை நுண்ணறிவு தொழில்நுட்பத்தின் காரணமாக, பரம்பரையாக மனிதனால் மேற்கொள்ளப்பட்ட பணிகளை இயந்திரங்கள் செய்யத் தொடங்கும் நிலையிலும், இதனால் வேலை வாய்ப்புகள் குறையும் சாத்தியம் பெருகிவருவதாகவே இந்த ஆய்வுகள் எச்சரிக்கின்றன.
