இஸ்ரேல் – ஈரான் இடையே போர்நிறுத்தம் குறித்து மாறுபட்ட தகவல்கள்
மத்திய கிழக்கில் இஸ்ரேல் மற்றும் ஈரான் இடையிலான 12 நாட்களாக நீடித்த போர்மூட்டம் தொடரும் நிலையில், அமெரிக்க அதிபர் டொனால்டு டிரம்ப், இரு நாடுகளும் போர்நிறுத்த ஒப்பந்தத்தை ஏற்படுத்தியுள்ளதாக அறிவித்துள்ளார். இது குறித்த தகவலை ஈரான் உறுதியாக மறுத்துள்ளது. எந்தவொரு ஒப்பந்தமும் எட்டப்படவில்லை என ஈரான் செய்தி வெளியிட்டுள்ளது.
இருப்பினும், இஸ்ரேல் தாக்குதல் மேற்கொள்ளாவிட்டால், பதிலடி வழங்கும் நோக்கம் ஈரானுக்கு இல்லையென வெளியுறவு அமைச்சர் அப்பாஸ் அரக்சி தெரிவித்துள்ளார்.
இந்நிலையில், இந்திய நேரப்படி இன்று காலை 9.30 மணி முதல் போர்நிறுத்தம் அமலாகும் என டிரம்ப் கூறியிருந்தாலும், ஈரான் அதை நிராகரித்தது.
அப்பாஸ் அரக்சி, ஈரானின் பாதுகாப்புப் படைகளை பாராட்டியுள்ளார். இது, நேரடியாகச் சொல்லப்படவில்லை என்றாலும், போர் நிறுத்தத்தை ஒத்துக் கொள்ளும் ஒரு தாழ்ந்த அறிகுறியாகக் கருதப்படுகிறது.
அவர் கூறியது:
“இஸ்ரேலின் தாக்குதலுக்கு பதிலளிக்க, நமது ராணுவம் கடைசி நிமிடம் வரை அதீத கவனத்துடன் செயல்பட்டது. அதிகாலை 4 மணி வரை நடவடிக்கைகள் முன்னெடுக்கப்பட்டன. நமது தேசத்தை கடைசி சொட்டு ரத்தம் வரை பாதுகாக்க உறுதியுடன் செயல்பட்டனர். அவர்களுக்கு மக்களுடன் இணைந்து நன்றி தெரிவிக்கிறேன்” என்று அரக்சி தெரிவித்தார்.
மேலும், “இஸ்ரேல் தான் முதலில் தாக்குதல் நடத்தியது. இதுவரை எந்தவொரு போர்நிறுத்த ஒப்பந்தமும் எட்டப்படவில்லை. ஆனால், இஸ்ரேல் தாக்குதலை அதிகாலை 4 மணிக்குள் நிறுத்தினால், அதற்கு பின் ஈரான் பதிலடி செய்யும் நோக்கில் இல்லை” எனவும் அவர் முன்பே தெரிவித்திருந்தார்.
ட்ரம்ப் கூறியது:
“இஸ்ரேல் மற்றும் ஈரான் இடையே 12 மணி நேரத்திற்குள் முழுமையான போர்நிறுத்தம் அமலும், அதற்குப் பிறகு இந்த மோதல் முடிவுக்கு வரும் என ஒப்பந்தம் செய்யப்பட்டுள்ளது.
முதலில் ஈரான் தனது நடவடிக்கையை நிறுத்தும். அதன் பின் இஸ்ரேலும் தங்களது நடவடிக்கையை நிறுத்தும். 24 மணி நேரத்திற்குள் இந்த போர் முழுமையாக முடிவடையும்.
இந்த போர் பல ஆண்டுகள் நீடித்து மத்திய கிழக்கை அழிக்கக்கூடிய அளவுக்கு இருந்தது. ஆனால், அதுபோல் ஒரு பேரழிவு தவிர்க்கப்பட்டுள்ளது.
இஸ்ரேலுக்கும் ஈரானுக்கும் என் வாழ்த்துகள்! இரு நாடுகளும் சகிப்புத்தன்மை மற்றும் புத்திசாலித்தனத்துடன் செயல்பட்டுள்ளன.
கடவுள் இஸ்ரேலை, ஈரானை, மத்திய கிழக்கையும், அமெரிக்காவையும், உலகத்தையும் ஆசிர்வதிக்கட்டும்” என்று தனது ‘ட்ரூத் சோஷியல்’ தளத்தில் ட்ரம்ப் பதிவு செய்துள்ளார்.
