“இந்தியா பாகிஸ்தானிடம் இருந்து எண்ணெய் வாங்கும் நிலைக்கு வரலாம்” – டொனால்டு ட்ரம்ப்; சர்ச்சையை கிளப்பிய கருத்து

“ஒருநாள் இந்தியா, பாகிஸ்தானிடம் இருந்து எண்ணெய் வாங்கும் சூழ்நிலை ஏற்படக்கூடும்” என்ற அமெரிக்காவின் முன்னாள் அதிபர் டொனால்டு ட்ரம்பின் கூற்று, உலகளாவிய அரசியலும், இந்திய அரசியல் சூழலும் பெரும் விவாதத்தை உருவாக்கியுள்ளது.

நேற்று, இந்தியாவிலிருந்து இறக்குமதி செய்யப்படும் பொருட்களுக்கான வரியை 25% ஆக உயர்த்தும் திட்டத்தை ட்ரம்ப் அறிவித்திருந்த நிலையில், அவர் இன்று மேலும் ஒரு கூச்சலான கருத்தை வெளியிட்டுள்ளார். அந்த வரி ஆగஸ்ட் 1 முதல் அமலாகும் என்றும் முன்னதாக அறிவிக்கப்பட்டது.

இந்தியாவை சுட்டிக்காட்டும் விதமாக தனது ட்ரூத் சோஷியல் சமூக வலைதளத்தில் ட்ரம்ப் கூறியிருப்பதாவது:

“பாகிஸ்தானுடன் தற்போது ஒரு ஒப்பந்தத்தை நாங்கள் முடித்துள்ளோம். அதன் அடிப்படையில், பாகிஸ்தானும் அமெரிக்காவும் சேர்ந்து தெற்காசியாவின் மிகப்பெரிய எண்ணெய் களஞ்சியத்தை உருவாக்கவுள்ளோம். இந்த திட்டத்தை செயல்படுத்துவதற்கான சரியான எண்ணெய் நிறுவனத்தையும் தேர்வு செய்து வருகிறோம். ஒருநாள் பாகிஸ்தான் இந்தியாவுக்கே எண்ணெய் வழங்கும் நிலை ஏற்படலாம்.” என்றார்.

இதற்கிடையில் பாகிஸ்தான் அதிகாரப்பூர்வமாக இதற்கெதிராக எந்த பதிலும் அளிக்கவில்லை.

கடந்த ஆண்டு செப்டம்பரில் பாகிஸ்தானின் கடற்கரை பகுதியில், பெரிதளவில் பெட்ரோலியம் மற்றும் இயற்கை எரிவாயு இருப்புகள் இருப்பதாக தகவல்கள் வெளியாகின. அந்நாட்டு ஊடகங்கள், இந்த வளம் உலகில் 4வது பெரிய எண்ணெய் மற்றும் எரிவாயு களமாக இருக்கலாம் என்று கூறின. இந்தத் தகவலைத் தொடர்ந்து தற்போது ட்ரம்ப் பதிவிட்டுள்ள கருத்துகள், அந்த வளத்தை சுட்டிக்காட்டி செய்யப்பட்டதாகவே பார்க்கப்படுகிறது.

மேலும், இந்தியா மற்றும் ரஷ்யாவின் பொருளாதாரங்களை ‘டெட் எக்கானமீஸ்’ (Dead Economies) என குறிப்பிடும் வகையில், “இந்த இரு நாடுகளும் மிக மோசமான பொருளாதார நிலைக்குள்ளாகியுள்ளன. இந்த நிலையை மேலும் மோசமாக்கும் வகையில் ஒன்றிணைந்து செயல்படுகின்றன. இது எனக்கு எந்தப் பற்றும் இல்லாத விஷயம்,” என ட்ரம்ப் தெரிவித்துள்ளார்.

ட்ரம்ப் தொடர்ந்து இந்தியாவை குறிவைக்கும் வகையில் தொடர்ச்சியாக கருத்துக்கள் வெளியிட்டு வருகிறார்:

• இந்தியா–பாகிஸ்தான் போரை தாமாகவே நிறுத்தியதாக அவர் முன்பு தெரிவித்திருந்தது,
• இந்தியாவுக்கு 25% இறக்குமதி வரி விதித்தது,
• ரஷ்யா மூலம் எண்ணெய் வாங்கியதற்காக அபராதம் விதித்தது,
• பாகிஸ்தானில் மிகப்பெரிய எண்ணெய் களஞ்சியத்தை உருவாக்க இருப்பதாக கூறுவது,
• இந்தியா பாகிஸ்தானிடம் இருந்து எண்ணெய் வாங்கும் நிலைக்கு வரலாம் எனச் சாடுவது – இவை அனைத்தும் இந்திய அரசியலில் பரபரப்பை உருவாக்கியுள்ளன.

ஆபரேஷன் சிந்தூர் நடவடிக்கையை தாமாகவே நிறுத்தியதாக ட்ரம்ப் உரிமை கோரியதிலிருந்து, நாடாளுமன்றம் வரை விவாதம் உருவானது. தற்போது வரிவிதிப்பும், எண்ணெய் ஒப்பந்தக் கூறுகளும் தொடர்ந்து அரசியல் எதிரொலிகளை ஏற்படுத்தக்கூடும் என்று கருதப்படுகிறது.