இந்தியாவுக்கு விதிக்கப்பட்ட அதிக வரி அமெரிக்காவை பாதித்துள்ளது: ட்ரம்பின் நெருங்கிய தோழர் ஜான் போல்டன் விமர்சனம்

இந்தியாவுக்கு விதிக்கப்பட்ட அதிகப்படியான வரி, அமெரிக்காவுக்கு எதிர்மறையான விளைவுகளை ஏற்படுத்தியுள்ளதாக முன்னாள் அமெரிக்க தேசிய பாதுகாப்பு ஆலோசகரும், டொனால்டு ட்ரம்பின் நெருங்கிய நண்பருமான ஜான் போல்டன் தெரிவித்துள்ளார்.

முன்னாள் அதிபர் ட்ரம்ப், இந்தியா அதிக வரி விகிதம் விதிக்கிறது என குற்றம் சாட்டி, பதிலடியாக இந்தியப் பொருட்களுக்கு அதிக வரி விதிக்கப்போவதாக அறிவித்திருந்தார். பின்னர், இந்தியப் பொருட்களுக்கு 25% வரி விதித்ததுடன், ரஷ்யாவிடமிருந்து கச்சா எண்ணெய் வாங்குவதைத் தொடர்ந்த இந்தியாவுக்கு கூடுதலாக 25% வரி விதிக்கப்படும் என அறிவித்தார். இதனால், இந்தியாவிலிருந்து அமெரிக்காவுக்கு ஏற்றுமதி செய்யப்படும் பொருட்களுக்கான மொத்த வரி விகிதம் 50% ஆக உயர்ந்தது.

இதே நேரத்தில், சீனாவுக்கு விதிக்கப்பட்டிருந்த அதிக வரியை குறைத்த ட்ரம்ப் நிர்வாகம், பாகிஸ்தான், வங்கதேசம் போன்ற நாடுகளுக்கு விதிக்கப்பட்ட வரிகளையும் குறைத்தது.

சிஎன்என் தொலைக்காட்சிக்கு அளித்த பேட்டியில் ஜான் போல்டன்,

“இந்தியாவுக்கு விதிக்கப்பட்ட இந்த அதிக வரிகள், அமெரிக்காவுக்கு தீங்கு விளைவித்துள்ளன. சீனாவுக்கு ட்ரம்ப் தளர்ச்சி காட்டிய நிலையில், இந்தியாவுக்கு கடுமையான வரிகள் விதிக்கப்பட்டுள்ளன. இதனால் அமெரிக்கா–இந்தியா உறவு பாதிக்கப்பட்டுள்ளது.

அமெரிக்காவின் முதன்மை இலக்கு சீனாவாக இருக்க வேண்டும்; ஆனால் ட்ரம்பின் நடவடிக்கை அந்த இலக்கை பலவீனப்படுத்தியுள்ளது. ரஷ்யா மற்றும் சீனாவிலிருந்து இந்தியாவை பிரிக்க அமெரிக்கா பல ஆண்டுகளாக எடுத்த முயற்சிகள் ஆபத்தில் உள்ளன. குறிப்பாக, ரஷ்யாவை பாதிக்க இந்தியாவுக்கு விதிக்கப்பட்ட இரண்டாவது 25% வரி, இந்தியாவை ரஷ்யா–சீனா அணுக்கத்துக்கு இட்டுச் செல்லும். இது உக்ரைன் விவகாரத்தில் அமெரிக்காவுக்கு எதிராக ரஷ்யாவுக்கு பேச்சுவார்த்தை வாய்ப்பளிக்கும்” எனக் கூறினார்.

மேலும், தி ஹில் பத்திரிகையில் அவர் எழுதிய கட்டுரையில்,

“சீனாவுக்கு ட்ரம்ப் காட்டும் தளர்ச்சி மற்றும் ஒப்பந்த ஆர்வம், அமெரிக்காவின் மூலோபாய நலன்களை தியாகம் செய்வதாக கருதப்படும். இந்தியாவுக்கு விதித்த அளவுக்கு சீனாவுக்கு வரி விதிக்காதது ட்ரம்பின் பெரிய தவறு. ரஷ்யா எண்ணெய் இறக்குமதியை நிறுத்த இந்தியாவை வற்புறுத்துவதில் ட்ரம்ப் நிர்வாகம் தோல்வியடைந்தது.

இந்திய அரசு, இந்த வரி விதிப்பு ‘நியாயமற்றது, ஏற்க முடியாதது’ என்று வலியுறுத்தி தனது நிலைப்பாட்டை பாதுகாத்துள்ளது. மேலும், ரஷ்யா, அமெரிக்கா இந்தியாவுக்கு சட்டவிரோத வர்த்தக அழுத்தம் கொடுக்கிறது என்று குற்றம் சாட்டியுள்ளது. ட்ரம்ப் மற்றும் புதின் இடையிலான வரவிருக்கும் பேச்சுவார்த்தையில், இந்தியாவுக்கு விதிக்கப்பட்ட இந்த அதிக வரி விகிதம் ஒரு பரிமாற்ற அட்டையாக பயன்படுத்தப்படலாம்” என குறிப்பிட்டுள்ளார்.