இந்தியாவைப் போல சீனாவுக்கும் இரட்டை வரி – அமெரிக்க அதிபர் டொனால்ட் ட்ரம்ப் தகவல்
இந்தியாவைப் போலவே சீனாவுக்கும் இரட்டிப்பு வரி விதிக்கப்படும் என்று அமெரிக்க அதிபர் டொனால்ட் ட்ரம்ப் தெரிவித்துள்ளார். இந்தியாவிலிருந்து இறக்குமதி செய்யப்படும் பொருட்களுக்கு ஆகஸ்ட் 7 முதல் 25% வரி அமல்படுத்தப்படும் என அவர் முன்பே அறிவித்திருந்தார். இதனுடன், ரஷ்யாவிடமிருந்து கச்சா எண்ணெய் இறக்குமதி செய்வதை நிறுத்தாததால், மேலும் 25% வரி விதிக்கப்படும் என்றும் தெரிவித்துள்ளார்.
நேற்று செய்தியாளர்களை சந்தித்த ட்ரம்பிடம், “ரஷ்யாவிடம் இருந்து கச்சா எண்ணெய் வாங்குவதை நிறுத்தாததால் இந்தியாவுக்கு இரட்டிப்பு வரி விதித்தீர்கள். ஆனால் ரஷ்ய எண்ணெயை அதிகம் இறக்குமதி செய்யும் சீனாவுக்கு ஏன் அத்தகைய நடவடிக்கை எடுக்கவில்லை?” என்று ஒருவர் கேள்வி எழுப்பினார்.
அதற்கு ட்ரம்ப், “இந்தியாவுக்கு கூடுதல் வரி விதித்தது எட்டு மணி நேரம் ஆகிறது மட்டுமே. அடுத்தடுத்த நடவடிக்கைகளை காத்திருந்து பாருங்கள். ரஷ்யாவில் இருந்து எண்ணெய், எரிவாயு வாங்கும் பிற நாடுகளுக்கும் கூடுதல் வரி விதிக்கப்படும். ரஷ்ய கச்சா எண்ணெய் இறக்குமதியில் சீனா முதலிடத்திலும், இந்தியா இரண்டாம் இடத்திலும் இருப்பது உண்மை. எனவே, இந்தியாவுக்கு விதிக்கப்பட்ட கூடுதல் வரி, சீனாவுக்கான எச்சரிக்கையாகும். சீனாவுக்கும் இந்தியாவைப் போலவே வரி உயர்த்தப்படும்” என்றார்.
