உக்ரைன் போர்நிறுத்தம் தொடர்பாக அமெரிக்காவில் ட்ரம்ப் – புதின் 3 மணி நேர சந்திப்பு

உக்ரைன் போர்நிறுத்தம் குறித்து அமெரிக்க அதிபர் ட்ரம்ப் மற்றும் ரஷ்ய அதிபர் புதின் மூன்று மணி நேரம் நீளமான விரிவான பேச்சுவார்த்தை நடத்தியுள்ளனர்.

2022 பிப்ரவரி மாதம் முதல் ரஷ்யா – உக்ரைன் இடையே போர் நடைபெற்று வருகிறது. இதுவரை உக்ரைனின் சுமார் 22 சதவீத பகுதிகளை ரஷ்யா கைப்பற்றியுள்ளது. ஜனவரி மாதம் அமெரிக்க அதிபராக பதவியேற்ற டொனால்டு ட்ரம்ப், இரு நாடுகளின் போரை முடிவுக்கு கொண்டு வர தொடர்ந்து முயற்சி செய்து வருகிறார்.

இதனைத் தொடர்ந்து, ரஷ்ய அதிபர் விளாடிமிர் புதினுடன் அவர் இதற்கு முன் நான்கு முறை தொலைபேசி வழியாக ஆலோசனை நடத்தினார். பின்னர் அமெரிக்காவின் அலாஸ்கா மாநிலம் ஆங்கரேஜ் நகரிலுள்ள ராணுவ தளத்தில், அமெரிக்க – ரஷ்ய அதிபர்கள் நேற்று நேருக்கு நேர் சந்தித்து உரையாடினர்.

ஆங்கரேஜ் விமான தளத்தில் தரையிறங்கிய புதினை, ட்ரம்ப் நேரில் வரவேற்று அழைத்துச் சென்றார். அப்போது வானில் அமெரிக்காவின் பி2, எப்22 ரக போர் விமானங்கள் பறந்து, புதினுக்கு சிறப்பு வரவேற்பளித்தன. அதன் பின் இரு தலைவர்களும் மூன்று மணி நேரம் பேச்சுவார்த்தை நடத்தினர். பின்னர் இருவரும் ஒன்றாக பத்திரிகையாளர்களை சந்தித்தனர்.

அதிபர் புதின் கூறியதாவது:

உக்ரைன் எங்களின் சகோதர நாடு. இரு நாடுகளும் ஒரே வேர்களைக் கொண்டவை. ஆனால் ரஷ்யாவின் பாதுகாப்புக்கு ஆபத்து ஏற்பட்டதால் தான் போர் ஏற்பட்டது. இது எங்களை வருத்துகிறது. இன்றைய உரையாடல் பயனுள்ளதாக அமைந்தது. உக்ரைனில் அமைதி நிலைநிறுத்த புதிய வாய்ப்பு திறந்துள்ளது. உக்ரைனும் ஐரோப்பிய நாடுகளும் இணைந்து நல்ல தீர்வை எடுக்க வேண்டும். ரஷ்யா – அமெரிக்கா இடையிலான வர்த்தக ஒத்துழைப்பையும் அதிகரிக்க முடியும். இன்றைய பேச்சுவார்த்தையில் பல்வேறு உடன்பாடுகள் எட்டப்பட்டுள்ளன. உக்ரைன் பிரச்சினைக்கு விரைவில் தீர்வு கிடைக்கும். அமெரிக்கா – ரஷ்யா உறவுகளும் வலுப்படும்.

அதிபர் டொனால்டு ட்ரம்ப் கூறியதாவது:

இன்றைய பேச்சுவார்த்தை மிகவும் ஆக்கப்பூர்வமாக இருந்தது. குறிப்பிடத்தக்க முன்னேற்றம் ஏற்பட்டுள்ளது. ஆனால் எந்த உடன்பாடும் இன்னும் கையெழுத்தாகவில்லை. உக்ரைன் விவகாரம் குறித்து அந்நாட்டின் அதிபர் ஜெலன்ஸ்கி மற்றும் நேட்டோ நாடுகளின் தலைவர்களுடன் நான் ஆலோசிக்க உள்ளேன். புதினுடன் எனது நெருக்கமான நட்பு தொடர்கிறது. ரஷ்யா குறித்து பரவுகின்ற எதிர்மறை செய்திகள் அனைத்தும் வெறும் வதந்திகள். உக்ரைன் போரை நாங்கள் நிறுத்துவோம். விரைவில் மீண்டும் சந்தித்து பேசுவோம்.

இதனைத் தொடர்ந்து, புதின் ‘‘அடுத்த முறை மாஸ்கோவில் சந்திப்போம்’’ என்று கூறினார். இதற்கு ட்ரம்ப் சம்மதித்தார். அதே சமயம் உக்ரைன் அதிபர் ஜெலன்ஸ்கி ஆகஸ்ட் 18 அன்று அமெரிக்க தலைநகர் வாஷிங்டனில் ட்ரம்பை சந்திக்க உள்ளார்.

இந்தியா தொடர்பான வரி விவகாரம்

புதினுடன் நடைபெற்ற சந்திப்புக்குப் பின், அமெரிக்க அதிபர் ட்ரம்ப் பாக்ஸ் நியூஸ் சேனலுக்கு பேட்டியளித்தார். அப்போது அவர் கூறியதாவது:

ரஷ்யாவிடம் இருந்து கச்சா எண்ணெய் வாங்கியதற்காக இந்தியாவுக்கு 25 சதவீத கூடுதல் வரி விதிக்கப்பட்டுள்ளது. இதனால் ரஷ்யா தனது மிகப்பெரிய வாடிக்கையாளரை (இந்தியா) இழந்துள்ளது. அதேபோல் சீனாவுக்கும் இத்தகைய வரி விதித்தால், ரஷ்யாவுக்கு கடுமையான பாதிப்பு ஏற்படும். இருப்பினும் தற்போதைய சூழலில் ரஷ்யாவிடமிருந்து எண்ணெய் வாங்கும் நாடுகளுக்கு கூடுதல் வரி விதிக்க திட்டமில்லை. புதினுடன் நடைபெற்ற உரையாடல் முழுமையாக திருப்தி அளிக்கிறது. உக்ரைனில் அமைதி நிலைநிறுத்த நாங்கள் உறுதியுடன் செயல்படுகிறோம்.

புதினுடன் பேச்சுவார்த்தைக்கு பின், ரஷ்ய எண்ணெய் விவகாரத்தில் ட்ரம்ப் மென்மையான அணுகுமுறையை கடைப்பிடித்து வருகிறார். இதனால், இந்தியாவுக்கு விதிக்கப்பட்டுள்ள கூடுதல் வரி தொடர்பிலும் அதே போக்கைத் தொடரக்கூடும் என நம்பப்படுகிறது.