ரஷ்ய அதிபர் புதினை சந்திக்க உள்ளார் ஜெலன்ஸ்கி: போர் நிறுத்தம் குறித்து ட்ரம்ப் சந்திப்பு பின் அறிவிப்பு

ரஷ்யா–உக்ரைன் இடையேயான யுத்தத்தை நிறுத்துவது தொடர்பாக, அமெரிக்க அதிபர் டொனால்ட் ட்ரம்ப் மற்றும் உக்ரைன் அதிபர் ஜெலன்ஸ்கி முக்கிய கலந்துரையாடல் நடத்தினர். 2022 பிப்ரவரி மாதம் தொடங்கி ரஷ்யா–உக்ரைன் போர் தொடர்ந்து நடைபெற்று வருகிறது. இந்த மோதலை நிறுத்துவதற்காக அமெரிக்க அதிபர் டொனால்ட் ட்ரம்ப் தீவிரமாக முயற்சி செய்து வருகிறார்.

இதன் பகுதியாக, ஆகஸ்ட் 15-ம் தேதி ட்ரம்ப் மற்றும் ரஷ்ய அதிபர் விளாடிமிர் புதின், அமெரிக்காவின் அலாஸ்கா மாநிலம் ஆங்கரேஜ் நகரில் சந்தித்து உரையாடினர். அதன் தொடர்ச்சியாக, உக்ரைன் அதிபர் ஜெலன்ஸ்கி, வாஷிங்டனில் ட்ரம்பை நேற்று முன்தினம் சந்தித்தார்.

அந்த சந்திப்பில் ஐரோப்பிய ஒன்றியத் தலைவர் உர்சுலா வோன் டெர் லியென், ஜெர்மனி பிரதமர் பிரெட்ரிக் மெர்ஸ், பிரிட்டன் பிரதமர் கெய்ர் ஸ்டார்மர், பிரான்ஸ் அதிபர் இமானுவேல் மெக்ரான், இத்தாலி பிரதமர் ஜியோர்ஜியா மெலோனி, நேட்டோ தலைவர் மார்க் ரூட் ஆகியோரும் கலந்து கொண்டனர். சுமார் இரண்டு மணி நேரம் விவாதம் நடைபெற்றது.

பின்னர், ட்ரம்ப் மற்றும் ஜெலன்ஸ்கி இணைந்து நிருபர்களுக்கு விளக்கம் அளித்தனர். அப்போது ஜெலன்ஸ்கி கூறியதாவது:

“அமெரிக்காவும், ஐரோப்பிய நாடுகளும் ஒன்றுபட்டு செயல்பட்டு வருகின்றன. உக்ரைனுக்கு ஆதரவாக ஐரோப்பிய தலைவர்கள் வாஷிங்டனில் ஒன்று கூடியுள்ளனர். ட்ரம்ப் உடனான பேச்சுவார்த்தை பயனுள்ளதாக அமைந்தது. குறிப்பாக உக்ரைனின் பாதுகாப்பு குறித்து முக்கியமான ஆலோசனைகள் நடந்தன. ட்ரம்ப் உக்ரைனின் பாதுகாப்பிற்கு உறுதிமொழி அளித்துள்ளார். தேவையான ஆயுத உதவிகளையும் வழங்க முன்வந்துள்ளார். விரைவில் ரஷ்ய அதிபர் புதினை சந்திக்கத் தயாராக உள்ளேன். முதலில் இருதரப்பு சந்திப்பு நடைபெறும்; அதில் முன்னேற்றம் கிடைத்தால், ரஷ்யா–உக்ரைன்–அமெரிக்கா இடையே முத்தரப்பு பேச்சுவார்த்தை நடத்தப்படும்,” என்றார்.

அமெரிக்க அதிபர் ட்ரம்ப் கூறியதாவது:

“உக்ரைன் நேட்டோவில் உறுப்பினராக இல்லாவிட்டாலும், அதற்கு ஆதரவு அளிப்போம். உக்ரைனின் பாதுகாப்பை உறுதிசெய்வோம். அமெரிக்க வீரர்களை அனுப்புவது குறித்தும் பரிசீலிக்கிறேன். இதுவரை நான் ஆறு போர்களை நிறுத்தியுள்ளேன். குறிப்பாக, இந்தியா–பாகிஸ்தான் இடையே அணு மோதல் ஏற்படும் சூழலை தவிர்த்தேன். அதேபோல், ரஷ்யா–உக்ரைன் போரும் நிறுத்தப்படும். விரைவில் முத்தரப்பு பேச்சுவார்த்தை நடக்கும். எப்போது போர் முடியும் என சொல்ல முடியாது; ஆனால் நிச்சயமாக போருக்கு முற்றுப்புள்ளி வைக்கப்படும்,” என தெரிவித்தார்.