ரணில் விக்ரமசிங்கேவுக்கு ஜாமீன் மறுப்பு – உடல்நிலை காரணமாக சிறை மருத்துவமனைக்கு மாற்றம்
அரசு நிதியை தவறாக பயன்படுத்தியதாகக் கூறப்படும் குற்றச்சாட்டில் கைது செய்யப்பட்ட இலங்கை முன்னாள் அதிபர் ரணில் விக்ரமசிங்கேவுக்கு, நீதிமன்றம் ஜாமீன் வழங்க மறுத்தது. உடல்நிலை பாதிப்பு காரணமாக அவர் சிறை மருத்துவமனைக்கு மாற்றப்பட்டுள்ளார்.
2022 ஜூலையில், இலங்கையில் ஏற்பட்ட பொருளாதார நெருக்கடி காரணமாக மக்களின் போராட்டத்தால் அதிபர் பதவியை கோத்தபய ராஜபக்ச விலகினார். அவரது மீதமுள்ள காலத்திற்கு ரணில் அதிபராக பொறுப்பேற்றார். 2024 செப்டம்பர் வரை அவர் அதிபராக இருந்தார். அதற்கு முன்பு அவர் 5 முறை பிரதமராகவும் பணியாற்றியவர்.
அவரது அதிபர் பதவிக்காலத்தில் தனிப்பட்ட வெளிநாட்டுப் பயணத்திற்கு அரசு நிதி பயன்படுத்தியதாக சிஐடி போலீசார் குற்றஞ்சாட்டினர். இதையடுத்து நேற்று கைது செய்யப்பட்ட ரணிலை, பிரிவு 386 மற்றும் பிரிவு 5(1) கீழ் வழக்குப் பதிவு செய்து கொழும்பு கோட்டை மேஜிஸ்ட்ரேட் நீதிமன்றத்தில் ஆஜர்படுத்தினர். விசாரணை நடத்திய மேஜிஸ்ட்ரேட் நிலுபுலி லங்காபுரா, அவரை நீதிமன்றக் காவலில் சிறையில் அடைக்க உத்தரவிட்டார்.
சிறையில் உடல்நல பரிசோதனையின் போது ரணிலின் ரத்த அழுத்தம், சர்க்கரை அளவு அதிகமாக இருந்ததால் அவர் சிறை மருத்துவமனைக்கு மாற்றப்பட்டார். முன்னாள் அதிபர் மகிந்த ராஜபக்ச மற்றும் எதிர்க்கட்சித் தலைவர் சஜித் பிரேமதாச உள்ளிட்டோர் அவரை சந்தித்து நலம் விசாரித்தனர். மகிந்த ராஜபக்ச, “அவர் நல்ல மனநிலையில் உள்ளார். கைது அரசியல் நோக்கத்தோடு நடந்திருக்கிறது. இது அரசியல்வாதிகளின் சாதாரண நிலைதான்” எனக் கூறினார். சஜித் பிரேமதாசவும், “ரணில் நலமாக உள்ளார்” எனத் தெரிவித்தார்.
குற்றச்சாட்டின் விவரம்: 2023-ல் கியூபா தலைநகர் ஹவானாவில் நடைபெற்ற ஜி77 உச்சி மாநாட்டில் கலந்து கொண்ட ரணில், இலங்கை திரும்பும் வழியில் லண்டனில் தங்கி, மனைவி மைத்ரியுடன் வால்வர்ஹாம்டன் பல்கலைக்கழக பட்டமளிப்பு விழாவில் கலந்து கொண்டார். இதற்காக அரசு நிதியில் ரூ.1.66 கோடி பயன்படுத்தப்பட்டதாக குற்றச்சாட்டு எழுந்துள்ளது.
ஆனால், ரணில், “மனைவியின் செலவுகளை நான் தனிப்பட்ட முறையில் ஏற்றுக்கொண்டேன்; அரசுப் பணம் பயன்படுத்தவில்லை” என்று விளக்கம் அளித்தார். இந்த வாக்குமூலத்தை சிஐடி மறுத்து, “அவரது தனிப்பட்ட பயணத்திற்கும், பாதுகாப்பு குழுவிற்கும் அரசுப் பணமே செலவழிக்கப்பட்டது” என்று குற்றஞ்சாட்டியுள்ளது.
