ரஷ்ய அதிபர் புதினை சந்திக்கிறார் ஜெலன்ஸ்கி: போர் நிறுத்தம் தொடர்பாக ட்ரம்பை சந்தித்த பின் அறிவிப்பு

உக்ரைன் அதிபர் ஜெலன்ஸ்கி, ரஷ்யா-உக்ரைன் போரை நிறுத்த அமெரிக்க அதிபர் டொனால்டு ட்ரம்புடன் முக்கிய பேச்சுவார்த்தை நடத்தினார். 2022-ம் ஆண்டு பிப்ரவரி முதல் ரஷ்யா மற்றும் உக்ரைன் இடையே போர் நடைபெற்று வருகிறது. அமெரிக்க அதிபர் ட்ரம்ப் இதனை நிறுத்த தீவிர முயற்சி செய்து வருகிறார்.

இதன் ஒரு பகுதியாக கடந்த 15-ம் தேதி, அதிபர் ட்ரம்பும் ரஷ்ய அதிபர் வி. புதினும் அமெரிக்காவின் அலாஸ்கா மாநிலம் ஆங்கரேஜ் நகரில் சந்தித்துப் பேச்சுவார்த்தை நடத்தினர். இதைத் தொடர்ந்து, உக்ரைன் அதிபர் ஜெலன்ஸ்கி அமெரிக்க அதிபர் ட்ரம்பை வாஷிங்டனில் நேற்று முன்தினம் சந்தித்தார்.

அப்போது ஐரோப்பிய ஒன்றியத் தலைவர் உர்சுலா வோன் டெர் லியென், ஜெர்மனி பிரதமர் பிரெட்ரிக் மெர்ஸ், பிரிட்டிஷ் பிரதமர் கெய்ர் ஸ்டார்மர், பிரான்ஸ் அதிபர் இமானுவேல் மெக்ரான், இத்தாலி பிரதமர் மெலோனி, நேட்டோ தலைவர் மார்க் ரூட் உள்ளிட்டோர் உடன் இருந்தனர். பேச்சுவார்த்தை சுமார் 2 மணி நேரம் நீடித்தது.

இதன்பிறகு அமெரிக்க அதிபர் ட்ரம்பும், உக்ரைன் அதிபர் ஜெலன்ஸ்கியும் நிருபர்களுக்கு கூட்டாக பேட்டியளித்தனர். அதன்போது ஜெலன்ஸ்கி கூறியது: அமெரிக்கா மற்றும் ஐரோப்பிய நாடுகள் ஒற்றுமையாக செயல்படுகின்றன. உக்ரைனுக்கு ஆதரவாக ஐரோப்பிய தலைவர்களும் வாஷிங்டனில் குவிந்துள்ளனர். ட்ரம்புடன் பேச்சுவார்த்தை பயனுள்ளதாக அமைந்தது. உக்ரைனின் பாதுகாப்பு குறித்து முக்கிய ஆலோசனை நடந்தது. ட்ரம்ப், உக்ரைனின் பாதுகாப்புக்கு உறுதி அளித்துள்ளார்; தேவையான ஆயுத உதவிகளை வழங்கவும் முன்வந்துள்ளார். ஜெலன்ஸ்கி, ரஷ்ய அதிபர் புதினை சந்தித்து பேச தயாராக இருப்பதாகவும், முதலில் இருதரப்பு பேச்சுவார்த்தை நடைபெறும் என்றும், முன்னேற்றம் ஏற்பட்டால் அமெரிக்கா, ரஷ்யா மற்றும் உக்ரைன் இடையே முத்தரப்பு பேச்சுவார்த்தை நடக்கும் என்றும் தெரிவித்தார்.

அமெரிக்க அதிபர் ட்ரம்ப் கூறியது: உக்ரைன் நேட்டோ உறுப்பினர் அல்ல; இருப்பினும், அதன் பாதுகாப்புக்கு தொடர்ந்து ஆதரவு அளிப்போம். உக்ரைனில் அமெரிக்க வீரர்களை அனுப்புவது குறித்து பரிசீலனை செய்யப்படும்.

ட்ரம்ப் மேலும் கூறினார்: இதுவரை 6 போர்களை நிறுத்தியுள்ளேன், குறிப்பாக இந்தியா-பாகிஸ்தான் இடையேயான அணு ஆயுத போரையும் நிறுத்தினேன். தற்போது ரஷ்யா-உக்ரைன் இடையேயான போரையும் நிறுத்துவேன். ரஷ்யா, உக்ரைன் மற்றும் அமெரிக்கா இடையே முத்தரப்பு பேச்சுவார்த்தை நடைபெறும்; அப்போது போருக்கு முற்றுப்புள்ளி வைக்கப்படும். எப்போது போர் நிறைவடையும் என்பதை இப்போதைக்கு உறுதியாக சொல்ல முடியாது, ஆனால் நிச்சயம் போருக்கு முடிவு வரும் என்று தெரிவித்தார்.