அமெரிக்க பல்கலைக்கழக நிகழ்வில் ட்ரம்ப் ஆதரவாளர் சுட்டுக் கொலை: யார் இந்த சார்லி கிர்க்?

அமெரிக்காவின் உடா பல்கலைக்கழகத்தில் நடைபெற்ற மாணவர் கேள்வி–பதில் நிகழ்ச்சியில் பங்கேற்றிருந்த வலதுசாரி சிந்தனையாளர், டர்னிங் பாயின்ட் யுஎஸ்ஏ அமைப்பின் இணை நிறுவனர், ட்ரம்ப்பின் நெருங்கிய ஆதரவாளர் சார்லி கிர்க் (31) துப்பாக்கிச் சூட்டில் உயிரிழந்தார்.

இந்த படுகொலை சம்பவம் இணையத்தில் வீடியோவாக பரவி வருவதோடு, ஆளும் கட்சியும் எதிர்க்கட்சியும் கண்டனங்களை தெரிவித்துள்ளன. அமெரிக்க முன்னாள் அதிபர் டொனால்ட் ட்ரம்ப், தனது நண்பர் மற்றும் ஆதரவாளர் உயிரிழந்ததிலே மிகுந்த துயரத்தில் உள்ளதாகக் கூறியுள்ளார்.

நிகழ்வில் சுட்டுக்காயம் அடைந்த சார்லி கிர்க், உடனடியாக ஆம்புலன்ஸ் மூலம் மருத்துவமனைக்கு எடுத்துச் செல்லப்பட்டார். ஆனால், அவர் அங்கு சேரும் முன்பே மரணம் அடைந்ததாக மருத்துவர்கள் அறிவித்தனர். இதையடுத்து உடா பல்கலைக்கழகம் வரும் 15ம் தேதி வரை மூடப்பட்டு, போலீசார் விசாரணை நடத்தி வருகிறார்கள். ஒருவரை கைது செய்து விசாரித்த பிறகு விடுவித்துள்ள நிலையில், கொலையாளியைத் தேடும் பணி தீவிரமாக நடைபெறுகிறது.

யார் இந்த சார்லி கிர்க்?

சிகாகோவில் பிறந்து வளர்ந்த சார்லி கிர்க், பழமைவாத சிந்தனையாளர், எழுத்தாளர், பேச்சாளர், அரசியல் விமர்சகர் எனப் பன்முகத்தன்மை கொண்டவர். சில காலம் தேசிய கொள்கை ஆலோசனை குழுவிலும் இருந்தார்.

ட்ரம்ப்புடன் 2016 முதல் மிகுந்த நெருக்கம் கொண்டிருந்தார். ஒருமுறை ட்ரம்ப் அவரை “ஒளியின் போராளி” என்று புகழ்ந்ததும் குறிப்பிடத்தக்கது. 2024 அதிபர் தேர்தலில் ட்ரம்ப் முன்னெடுத்த “Make America Great Again” பிரசாரத்துக்கு முக்கிய பங்காற்றியவர். வெள்ளை மாளிகைக்கு எளிதாகச் செல்லக்கூடிய நெருக்கத்தை உடையவராகவும், ட்ரம்ப்புடன் கோல்ஃப் விளையாடிய வீடியோக்கள் வைரலானதும் நினைவுபடுத்தத்தக்கது.

கருக்கலைப்புக்கு கடுமையான எதிர்ப்பாளராக இருந்த சார்லி, “என் 10 வயது மகள் பாலியல் வன்கொடுமையால் கருவுற்றாலும், அவள் அந்தக் குழந்தையைப் பெற்றே தீர வேண்டும் என்று சொல்வேன்” என்கிற பதிலைத் தந்தவர். மேலும், “30 வயதுக்கு மேற்பட்ட பெண்களின் கவர்ச்சி குறையும், கருத்தடை பயன்படுத்துவதால் பெண்கள் கடினமாக மாறுவார்கள்” என்று விமர்சித்தும் இருந்தார்.

துப்பாக்கி கலாச்சாரத்துக்கு ஆதரவாகக் கருத்துரைத்தவர் என்றாலும், இறுதியில் துப்பாக்கிச் சூட்டிலேயே பலியானது பரிதாபமாகும்.

2021-ல் அழகிப்போட்டி வென்ற எரிகா ஃப்ராட்ஸ்வேவை திருமணம் செய்து கொண்டார். அவர்களுக்கு இரண்டு குழந்தைகளும் உள்ளனர்.

ட்ரம்பின் துயரம்

சார்லி கிர்க் படுகொலையால் துயரமடைந்த ட்ரம்ப், தனது ட்ரூத் சோஷியல் பக்கத்தில், “அமெரிக்க இளைஞர்களின் உள்ளத்தைப் புரிந்துகொள்ள சார்லியைப் போல யாரும் இல்லை. அவரை அனைவரும் நேசித்தனர்; நான் அதிகமாக நேசித்தவர்களில் ஒருவராக இருந்தார். இன்று அவர் நம்மோடு இல்லை என்பது பேரிழப்பு” என்று பதிவிட்டார்.