அமெரிக்கப் பொருளாதாரம் சறுக்கலாகிறதா? — பணி முடக்கம் மற்றும் அதன் தாக்கம்: ஒரு தெளிவான பார்வை

அமெரிக்க பொருளாதாரத்தில் ஏற்படும் ஏற்றத் தாழ்வுகள் உலகம் முழுவதும் தாக்கத்தை ஏற்படுத்துவது புதுமையல்ல. இதுவே அந்த நாட்டை “பொருளாதார சூப்பர் பவர்” என்ற அந்தஸ்தில் வைத்திருக்கிறது. இந்நிலையில், தற்போது அமெரிக்காவில் “அரசு ஷட் டவுன்” (U.S. Government Shutdown) என்ற செய்தி பெரும் விவாதமாகியுள்ளது.

அரசு ஷட் டவுன் என்றால் என்ன?

அமெரிக்க நிதியாண்டு ஒவ்வொரு ஆண்டும் செப்டம்பர் 30-ல் முடிந்து, அக்டோபர் 1-ல் புதிய நிதியாண்டு தொடங்குகிறது. அதற்காக புதிய நிதியாண்டுக்கான பட்ஜெட் மசோதா நாடாளுமன்றத்தில் தாக்கல் செய்யப்படுகிறது.

அமெரிக்க நாடாளுமன்றம் இரு அவைகளைக் கொண்டது — செனட் சபை மற்றும் பிரதிநிதிகள் சபை. அரசின் ஆண்டு செலவினங்களுக்கான நிதி ஒதுக்கீடு பெற, செனட் உறுப்பினர்களில் குறைந்தது 60% பேரின் ஒப்புதல் தேவை.

இந்த ஒப்புதல் கிடைக்காதபட்சத்தில், அரசு ஊழியர்களுக்கு சம்பளம் வழங்க முடியாது. இதனால் சில துறைகள் தற்காலிகமாக மூடப்பட்டு, அத்தியாவசிய துறைகளைத் தவிர மற்ற ஊழியர்கள் பணி நீக்கம் அல்லது இடைநீக்கம் செய்யப்படுவர். இதை “ஃபர்லோ ஸ்டேட்டஸ்” (furlough status) என அழைக்கப்படுகிறது.

அத்தியாவசிய சேவைகளில் இருப்பவர்களும் சம்பளமின்றி பணியாற்ற வேண்டியிருக்கும். ஷட் டவுன் முடிந்த பிறகே அவர்களுக்கு நிலுவை ஊதியம் வழங்கப்படும்.

சமீபத்திய ஷட் டவுன் — காரணம் என்ன?

சமீபத்திய அமெரிக்க நாடாளுமன்ற வாக்கெடுப்பில், குடியரசுக் கட்சியின் 53% உறுப்பினர்களும், ஜனநாயகக் கட்சியின் 47% உறுப்பினர்களும் நிதி மசோதாவுக்கு ஆதரவாக வாக்களித்தனர். ஆனால் மசோதா நிறைவேறாததால் நள்ளிரவு 12 மணிக்கு அமெரிக்க அரசு முடங்கியது.

இந்த முடக்கத்தின் முக்கிய காரணம் —

• அஃபோர்டபிள் கேர் (ஒபாமா கேர்) மருத்துவக் காப்பீட்டு திட்டத்துக்கு குடியரசுக் கட்சி எதிர்ப்பு தெரிவித்தது.
• எல்லை பாதுகாப்புத் துறைக்கான நிதியை அதிகரிக்க வேண்டும் என்ற ஜனநாயகக் கட்சியின் கோரிக்கையை குடியரசுக் கட்சி மறுத்தது.

ஷட் டவுன் ஏற்படுத்தும் தாக்கங்கள்

அமெரிக்க அரசின் செயல்பாடு நிறுத்தப்படுவது, அந்நாட்டை மட்டும் அல்லாது உலகத்தையே பாதிக்கும். அமெரிக்க பொருளாதாரத்தில் ஏதேனும் சிக்கல் ஏற்பட்டாலே, உலக நிதி சந்தைகளில் அதிர்வு ஏற்படும்.

இதன் விளைவாக —

• முதலீட்டாளர்கள் தங்கத்தை பாதுகாப்பான முதலீடாகக் கருதி அதன் மீது முதலீடு செய்வர்.
• இந்தியா உள்ளிட்ட நாடுகளில் தங்க விலைகள் உயரலாம்.
• அமெரிக்க புள்ளி விவரத் துறை முடங்குவதால், பொருளாதார நிலவரங்கள் குறித்த தகவல்கள் தாமதமாகும்.
• விசா செயல்பாடுகள், வரி வசூல், சுற்றுலா, அருங்காட்சியகங்கள், தேசிய பூங்காக்கள் போன்றவை பாதிக்கப்படும்.

இதன் விளைவாக சுமார் 7.05 லட்சம் அரசு ஊழியர்கள் நேரடியாக பாதிக்கப்படுவர். சிலர் பணியை இழக்கவும் வாய்ப்பு உள்ளது.

வரலாற்றுப் பின்னணி

இது போன்ற அரசு முடக்கங்கள் முன்பும் நிகழ்ந்துள்ளன —

• 2013
• 2018–2019 (38 நாட்கள் நீடித்தது)

2013ல் நிகழ்ந்த முடக்கம் பெரும் தாக்கத்தை ஏற்படுத்தியது. தற்காலிக பணி நீக்கத்துக்குள்ளான 31% ஊழியர்கள் ஓராண்டுக்குள் பணியை ராஜினாமா செய்தனர். இதனால் அரசு துறைகளில் நிரந்தரப் பணியாளர்களுக்குப் பதிலாக தற்காலிகர்கள் நியமிக்க வேண்டியிருந்தது.

இதனால் சட்ட அமலாக்கம், நிதி மேலாண்மை போன்ற துறைகளில் துல்லியக் குறைபாடுகள் ஏற்பட்டன. முடக்கம் முடிந்த பிறகும் இரண்டு ஆண்டுகள் வரை அதன் விளைவுகள் நீடித்தன.

எதிர்நோக்கும் நிலை

இம்முறை ஏற்பட்டுள்ள ஷட் டவுன் முடிவுக்கு வர ஜனநாயகக் கட்சியின் ஒத்துழைப்பே முக்கியம். சிலர் கருத்து வேறுபாடுகளை விட்டு விலகி, குடியரசுக் கட்சியின் திட்டத்தை ஏற்றுக்கொண்டால் முடக்கம் முடியும்.

நிபுணர்கள் கூறுவதன்படி, இந்த ஷட் டவுன் நீடித்தால், ஒவ்வொரு வாரமும் அமெரிக்க பொருளாதார வளர்ச்சி 0.2% வரை குறைய வாய்ப்பு உள்ளது. கடந்த காலங்களை விட இம்முறை நிலைமை கடுமையானது. அரசியல் மோதல்கள் முடிவுக்கு வராவிட்டால், இதன் தாக்கம் உலகளாவிய பொருளாதாரத்திலும் பெரும் அதிர்வுகளை ஏற்படுத்தக்கூடும்.