அமைச்சரவை ஒப்புதல் பிறகே காசா அமைதி ஒப்பந்தம் நடைமுறைக்கு வரும்: இஸ்ரேல் அறிவிப்பு
இஸ்ரேல் அரசு தெரிவித்ததாவது, அமைச்சரவை ஒப்புதல் பெற்ற பின்னரே காசா அமைதி ஒப்பந்தம் செயல்படுத்தப்படும்.
காசாவில் உள்ள பணயக்கைதிகளை விடுவிப்பதற்கான அமைதி ஒப்பந்தம், அமைச்சரவை ஒப்புதல் பெற்ற பிறகே நடைமுறைக்கு வரும் என்று இஸ்ரேல் பிரதமர் பெஞ்சமின் நெதன்யாகுவின் அலுவலகம் கூறியுள்ளது. இன்று மாலை நடைபெறும் அமைச்சரவை கூட்டத்தில் ஒப்பந்தம் அங்கீகாரம் பெற்ற பிறகு, 72 மணி நேரக் கவுண்டவுன் தொடங்கும் என்றும் அலுவலகம் தெரிவித்துள்ளது.
ட்ரம்ப் நிர்வாகத்தால் முன்வைக்கப்பட்ட புதிய ஒப்பந்தத்தின் அடிப்படையில், காசாவில் சண்டையை நிறுத்தி, பணயக்கைதிகள் மற்றும் கைதிகளை விடுவிக்க இஸ்ரேலும் ஹமாஸும் முதன்மை அமைதி ஒப்பந்தத்திற்கு ஒப்புக்கொண்டுள்ளனர். கடந்த இரண்டு வருடங்களாக இஸ்ரேல் மற்றும் ஹமாஸ் இடையிலான போரில் காசாவில் 60,000க்கும் மேற்பட்டோர் உயிரிழந்துள்ளனர், லட்சக்கணக்கானோர் இடம்பெயர்ந்துள்ளனர். இஸ்ரேல் தாக்குதலால் காசா நகரம் பெரும்பாலும் நாசம் அடைந்துள்ளது.
பிணைக் கைதிகள் மற்றும் பாலஸ்தீன கைதிகளை பரிமாறிக் கொள்ளும் காசா ஒப்பந்தத்தின் முதல் கட்டத்திற்கு இஸ்ரேலும் ஹமாஸும் ஒப்புக்கொண்டுள்ளதாகவும், ஒப்பந்தம் நடைமுறையில் 72 மணி நேரத்தில் பரிமாற்றம் நடக்கும் என்றும் அமெரிக்க முன்னாள் அதிபர் ட்ரம்ப் தெரிவித்தார்.
ட்ரம்ப் தனது சமூகவலைதளப் பதிவில், “இஸ்ரேலும் ஹமாஸும் அமைதித் திட்டத்தின் முதல் கட்ட ஒப்பந்தத்தில் கையெழுத்திட்டுள்ளன என்பதை அறிவிப்பதில் மகிழ்ச்சி அடைகிறேன். இதனால் அனைத்து பிணைக் கைதிகளும் விரைவில் விடுவிக்கப்படுவார்கள். அமைதி உருவாக்கும் முதல்கட்ட ஒப்பந்தத்தின் படி, இஸ்ரேல் பாதுகாப்பு படைகளை திரும்பப் பெறும். அமைதியை ஏற்படுத்துபவர்கள் பாக்கியவான்கள்” என்று குறிப்பிட்டார்.
இந்த போர் நிறுத்த ஒப்பந்தம் இன்று (வியாழக்கிழமை) எகிப்தில் கையெழுத்திடப்பட உள்ளது. ஒப்பந்தத்தின் ஒரு பகுதியாக, ஹமாஸ் 2,000 பாலஸ்தீன கைதிகளுக்கு பதிலாக 20 பணயக்கைதிகளை பரிமாறும் என்று தகவல்கள் வெளியாகியுள்ளன. 250 பேர் ஆயுள் தண்டனை பெற்றுள்ள பாலஸ்தீனியர்களுக்கும், 2023 அக்டோபர் 7 அன்று தொடங்கிய போர் காரணமாக இஸ்ரேலில் கைது செய்யப்பட்ட 1,700 பேருக்கும் ஈடாக பணயக்கைதிகள் விடுவிக்கப்பட உள்ளன.
இரண்டாண்டு போரின் முடிவுக்கான ஒப்பந்த செய்தி வெளியானதும், காசா மற்றும் இஸ்ரேலில் கொண்டாட்டங்கள் தொடங்கின. ஒப்பந்தத்தின் படி, காசாவில் இருந்து படைகளை மீட்டு வர தயார் நிலையில் இருக்கிறதென்பதாக இஸ்ரேல் ராணுவம் தெரிவித்துள்ளது. அதே நேரத்தில், ஹமாஸ் மற்றும் இஸ்ரேல் ஒப்பந்தத்தை ஒப்புக்கொண்ட பின்னர், வடக்கு காசாவின் பகுதிகளில் சில வான்வழி தாக்குதல்கள் நிகழ்ந்துள்ளதாக காசா நிர்வாகம் தெரிவித்துள்ளது.
