“புதுச்சேரி காங்கிரஸ் கட்சி சார்பில் அளிக்கப்பட்ட வாக்குறுதியின்படி, காங்கிரஸ் ஆட்சி அமைந்தவுடன் வியாபாரிகளுக்கான பாதுகாப்பான காப்பீட்டு (இன்சூரன்ஸ்) திட்டம் அறிவிக்கப்படும்” என்று கூறப்பட்டுள்ளது.
புதுச்சேரி காங்கிரஸ் கட்சியில் மாநிலத் தலைவர் வைத்திலிங்கம் எம்.பி., முன்னாள் முதல்வர் நாராயணசாமி ஆகியோர் முன்னிலையில், இன்று பலர் வர்த்தகர்களாகவும் வியாபாரிகளாகவும் கட்சியில் இணைந்தனர். இந்த நிகழ்வு, புதுச்சேரி மாநில காங்கிரஸ் தலைமையகத்தில் நடைபெற்ற இணைப்பு விழாவில் நடந்தது. இதில் வைத்தியநாதன் எம்.எல்.ஏ, முன்னாள் துணைத் தலைவர் எம்.என்.ஆர். பாலன் உள்ளிட்ட முக்கிய பிரமுகர்கள் கலந்துகொண்டனர்.
மாநிலத் தலைவர் வைத்திலிங்கம் எம்.பி. நிகழ்வில் உரையாற்றியபோது,
“புதுச்சேரி புதிய பஸ்நிலையத்தில் கடைகள் ஒதுக்கப்பட வேண்டிய நிலை இருக்கிறது. ஆனால் அந்த திட்டம் ஏலமிடாமல் கைவிடப்பட்டுள்ளது. ஒதியஞ்சாலை அண்ணா திடலில் தொடங்கப்பட்ட கடைகள் இன்னும் முடிக்கப்படவில்லை. ஆனால் ஆளும் கட்சியின் ஆதரவாளர்களுக்கு மட்டும் கடைகள் ஒதுக்கப்பட்டு, சாவிகள் வழங்கப்பட்டுள்ளன.
தற்போது வியாபார சங்கத் தலைவராக இருப்பவர், எம்.எல்.ஏ. என்ற நிலைபாட்டில் நான்கு பேரை அனுப்பி கடைகளை இடிக்கச் சொல்கிறார். அதேநேரத்தில், அவரே பஞ்சாயத்து நடத்துகிறார். மக்களவைத் தேர்தலில் வேட்பாளர் சீட்டு கேட்ட அவர், சுயேச்சை, பாஜக, மார்ட்டின் என பல பெயர்களில் உங்களை (வியாபாரிகளை) பயன் படுத்தி தன்னலம் பார்ப்பவர். ஆனால் காங்கிரஸ் கட்சி எப்போதும் வியாபாரிகளுக்கு நம்பிக்கையான காவலாளியாக இருக்கும்.
நாங்கள் ஆட்சிக்கு வந்தவுடன், வியாபாரிகளுக்கான பாதுகாப்பு காப்பீட்டுத் திட்டத்தை உடனடியாக அறிவிக்கவுள்ளோம். தற்போது வட்டிக்கடைகளில் நகைகளை வைத்து கடன் வாங்கும் போது, அந்த நகைகள் உண்மையானதா என்பதைப் பற்றிய சந்தேகம் எழுகிறது. இது போலவே, இன்றைய உலகம் ஏமாற்றும் சூழ்நிலையில் உள்ளது,” என அவர் கூறினார்.
