ஆன்மிக மாநாட்டை அரசியலுக்கு பயன்படுத்தினால் நடவடிக்கை எடுக்கலாம்: உயர் நீதிமன்ற கிளை உத்தரவு

ஆன்மிக மாநாடு அரசியல் நோக்கத்திற்காக பயன்படுத்தப்படும் பட்சத்தில், சட்டப்படி நடவடிக்கை எடுக்கலாம் என்று உயர்நீதிமன்றம் தெரிவித்துள்ளது.

மதுரை பாண்டிகோயில் அருகே உள்ள அம்மா திடலில் ஜூன் 22-ம் தேதி “இந்து முன்னணி” சார்பில் முருக பக்தர்களுக்கான ஆன்மிக மாநாடு நடத்தப்பட உள்ளது. இதற்காக போலீசார் 52 நிபந்தனைகளுடன் அனுமதி அளித்துள்ளனர். ஆனால், மாநாட்டு வளாகத்தில் அறுபடை வீடுகள் மாதிரியை அமைத்து பூஜை நடத்தும் அனுமதியை போலீசார் மறுத்தனர்.

இதையடுத்து, இந்து முன்னணி உயர் நீதிமன்ற மதுரை கிளையில் மனு தாக்கல் செய்துள்ளது. அதில், 6 முக்கிய நிபந்தனைகளை மாற்ற வேண்டும் என கோரப்பட்டுள்ளது. அவை: வாகன பாஸ் பெறுவதற்கான விதிமுறை, இருசக்கர வாகன தடையும், பங்கேற்போர் விவரங்களை வழங்கும் தேதியும், அறுபடை வீடு அமைக்க அனுமதி பெறும் தேவை, ட்ரோன் பறக்கும் தடையும் அடங்கும்.

இதேவேளை, மக்கள் கலை இலக்கிய கழகம் மற்றும் அர்ச்சகர் பயிற்சி பெற்ற மாணவர்கள் சங்கம் ஆகிய அமைப்புகள் மாநாட்டுக்கும், அறுபடை வீடுகள் அமைப்புக்கும் எதிராக இடையீட்டு மனு தாக்கல் செய்தன. இந்த வழக்கை நீதிபதி பி. புகழேந்தி விசாரித்தார். நீதிபதி ஆன்மிக மாநாட்டுக்கு சில நிபந்தனைகள் மாற்றம் செய்யப்படலாம் என்றும், அறுபடை வீடுகள் அமைக்க அனுமதி தேவையில்லை என்றும் தீர்ப்பளித்தார்.

தீர்ப்பில் குறிப்பிடப்பட்டுள்ளவை:

• இந்திய அரசியலமைப்பின் பிரிவு 25, மத சுதந்திரம் மற்றும் அதனை பிரச்சாரம் செய்ய உரிமை அளிக்கிறது. ஆனால், மதநம்பிக்கையின் பெயரில் அமைதியை பாதிக்க முடியாது.
• இந்து முன்னணி தலைவர்கள் மற்றும் மத்திய அமைச்சரின் பேட்டிகள் அரசியல் நோக்கத்துடன் இருப்பதாக மனுதாரர்கள் குறிப்பிடினர்.
• மத அமைப்புகளை அரசியல் ஊடுருவலுக்காக பயன்படுத்தினால், 1988 சட்டத்தின் பிரிவு 6ன் கீழ் நடவடிக்கை எடுக்கலாம்.
• மாநாட்டில் பங்கேற்கும் முருக பக்தர்கள் தனிப்பட்ட முறையில் டிஎஸ்பியிடம் பாஸ் பெற முடியாது என கூறப்பட்டது. எனவே, 24 மணி நேரத்தில் பாஸ் வழங்க வேண்டும், மறுத்தால் காரணம் சொல்ல வேண்டும்.
• டிரோன் அனுமதி இரண்டு மட்டும் வழங்கப்பட்டுள்ளது.
• அறுபடை வீடுகளுக்கான மாதிரி அமைக்க தனிப்பட்ட அனுமதி தேவையில்லை, ஏற்கனவே இடத்தின் உரிமையாளர் அனுமதி அளித்துள்ளார்.
• மாநாடு நடைபெறும் இடம் அருகே குடியிருப்புகள், பள்ளிகள் உள்ளன என்றாலும், இதுவரை அங்கு பல கட்சிகள் கூட்டங்கள் நடத்தியுள்ளதால் பாதுகாப்பு பிரச்சனை இல்லையென கூறப்படுகிறது.
• ஒலி பெருக்கிகள் அரசின் விதிமுறைகளுக்குள் பயன்படுத்த வேண்டும்.
• மாநாட்டுக்குள் பக்தர்களை கட்டுப்படுத்த தன்னார்வலர்கள் இருக்கிறார்கள்; போலீசார் தேவையில்லை.
• ஆனால், மாநாடு நடைபெறும் இடம் தேசிய நெடுஞ்சாலை அருகில் இருப்பதால் போக்குவரத்து ஒழுங்கை போலீசார் பார்த்துக்கொள்ள வேண்டும்.
• மத நல்லிணக்கத்துக்கு ஆபத்து வராதவாறு மாநாடு நடத்தப்பட வேண்டும் என நீதிபதி தெரிவித்தார்.