2026ம் ஆண்டு நடைபெறவுள்ள தமிழக சட்டப்பேரவைத் தேர்தலை முன்னிட்டு, வரும் ஜூலை மாதத்தில் கோவையில் இருந்து தனது தேர்தல் பிரச்சார சுற்றுப்பயணத்தை தொடங்க அதிமுக பொதுச்செயலாளர் எடப்பாடி பழனிசாமி திட்டமிட்டிருப்பதாகத் தகவல்கள் வெளியாகியுள்ளன.
தேர்தல் நெருங்கிக் கொண்டிருப்பதால், திமுக, அதிமுக உள்ளிட்ட முக்கிய அரசியல் கட்சிகள் தீவிர வேலைத் திட்டங்களில் ஈடுபட்டு வருகின்றன. அதிமுகவின் பொதுச்செயலாளராக உள்ள பழனிசாமி, கட்சியின் மாவட்டச் செயலாளர்கள் மற்றும் பொறுப்பாளர்களுடன் ஆலோசனை கூட்டங்களை நடத்தி, 2026ம் ஆண்டு ஆட்சியை கைப்பற்றுவது குறித்து திட்டமிடுவதை முன்னெடுத்து வருகிறார்.
இந்தநிலையில், மீண்டும் ஜூன் 24 மற்றும் 25 தேதிகளில் மாவட்டச் செயலாளர்கள் மற்றும் பொறுப்பாளர்களுடன் முக்கியக் கூட்டங்களை நடத்த உள்ளார். இக்கூட்டங்களில், வாக்குச்சாவடி மட்டமான கிளை நிர்வாகிகளை நியமிக்க வேண்டியதையும், இளைஞர்களை அதிகமாக கட்சியில் இணைத்துக்கொள்ள வேண்டியதையும் அவர் வலியுறுத்துவதாகக் கூறப்படுகிறது.
2023ம் ஆண்டு டிசம்பரில் நடைபெற்ற பொதுக்குழுவில், 2024ம் ஆண்டு ஜனவரியில் மாநிலமெங்கும் சுற்றுப்பயணம் மேற்கொள்ள உள்ளதாக பழனிசாமி அறிவித்திருந்தார். தற்போது, பாஜகவுடன் கூட்டணியில் உள்ள அதிமுக, இந்த சுற்றுப்பயணத்தை ஜூலை மாதம் கோவையிலிருந்து தொடங்க திட்டமிட்டுள்ளது.
ஒவ்வொரு சட்டமன்ற தொகுதியிலும் பொதுமக்களுடன் நேரில் சந்தித்து, அவர்களின் குறைகளை கேட்டு, சாலைமார்க்கமாக பயணித்து தொண்டர்களையும் மக்கள் கூட்டத்தையும் சந்திப்பதற்கான நிகழ்ச்சிகளை திட்டமிட்டுள்ளதாக அதிமுக வட்டாரங்கள் தெரிவிக்கின்றன. இதற்கான அறிவிப்பு விரைவில் வெளியாகும் எனவும், மாவட்டச் செயலாளர்கள் கூட்டத்தில் பழனிசாமி இதுகுறித்து விரிவாக ஆலோசிக்க உள்ளதாகவும் கூறப்படுகிறது.
