மதுரை மாவட்டத்தில் பணியிடமாற்றம் வழங்க வேண்டும் என அரசுக்கு கோரிக்கை: காவலாளி அஜித்குமாரின் சகோதரர் வலியுறுத்தல்

சிவகங்கை ஆவின் நிறுவனத்தில் பணியிலுள்ள மடப்புரம் கோயில் காவலாளி அஜித்குமாரின் சகோதரர் நவீன்குமார், தனது பணியிடம் திருப்புவனத்தில் இருந்து சுமார் 80 கிலோமீட்டர் தொலைவில் உள்ளதால், மதுரை பகுதியில் ஏதேனும் ஒரு அரசுத் துறையில் தன்னை நியமிக்க அரசு நடவடிக்கை எடுக்க வேண்டும் என கோரிக்கை விடுத்துள்ளார்.

மடப்புரம் கோயிலில் காவலாளியாக பணியாற்றிய அஜித்குமார் சித்ரவதை காரணமாக மரணமடைந்ததாகக் கூறப்படும் வழக்கு, இன்று மதுரை உயர் நீதிமன்ற கிளையில் விசாரணைக்கு எடுத்துக்கொள்ளப்பட்டது. இந்த விசாரணைக்காக அவரது சகோதரர் நவீன்குமார் நீதிமன்றத்துக்கு வந்திருந்தார்.

விசாரணை முடிந்த பிறகு செய்தியாளர்களிடம் பேசிய அவர், “அஜித்குமாரின் காவல் மரணம் தொடர்பான வழக்கில் சாட்சிகளுக்கு திருப்புவனம் காவல் நிலையத்திலிருந்தே மிரட்டல்கள் விடுக்கப்படுகின்றன. இதனால், அவர்கள் உயிர் பாதுகாப்பிற்காக உரிய பாதுகாப்பு வழங்க வேண்டும் என கேட்டோம். நீதிமன்றம் அதற்கேற்ப பாதுகாப்பு வழங்க உத்தரவிட்டது,” என்றார்.

மேலும் அவர் கூறுகையில், “நான் தற்போது சிவகங்கை ஆவினில் பணியாற்றுகிறேன். ஆனால் அந்த அலுவலகம், எனது வீட்டிலிருந்து மிகுந்த தொலைவில் — அதாவது 80 கி.மீ. தூரத்தில் இருக்கிறது. எனவே, எனக்கு மதுரை பகுதியில் உள்ள ஏதேனும் ஒரு அரசுத் துறையில் பணியிடமாற்றம் வழங்கப்பட வேண்டும் என அரசிடம் வேண்டுகோள் வைத்துள்ளேன். ஆனால் இதுவரை எந்த பதிலும் அரசுப் பக்கம் இருந்து வரவில்லை,” என்றார்.

“தமிழக அரசு வளர்ச்சியடையாத பகுதியில் நமக்கு வீட்டுமனை பட்டா வழங்கியுள்ளது. ஆனால் அந்த நிலத்தின் இடம் மற்றும் அடிப்படை வசதிகள் எதுவும் திருப்திகரமாக இல்லை. அத்துடன், உயர் அதிகாரிகளின் அனுமதி அல்லது ஒப்புதல் இல்லாமல் எனது அண்ணன் மீது சித்ரவதை நடத்தப்பட்டு கொலையாக்க முடியாது. எனவே, இந்தச் சம்பவத்தில் தொடர்புடைய காவல்துறை உயர் அதிகாரிகளையும் விசாரித்து, அவர்களுக்குத் தக்க தண்டனை வழங்க வேண்டும். என் அண்ணனுக்கு நீதிமன்றத்தின் வழியாக உரிய நியாயம் கிடைக்க வேண்டும்,” என உருக்கமாக தெரிவித்தார்.

மேலும், இதே வழக்கின் முன்னைய விசாரணைகளில், நவீன்குமாருக்கு ஆவினில் வேலை வழங்கப்பட்டதாக தெரிவித்தபோது, அது அரசுப் பணி அல்ல என குறிப்பிட்டிருந்தனர். ஆனால், இந்த வழக்கில் இன்று நீதிபதிகள், “ஆவின் என்பது அரசு கட்டுப்பாட்டில் செயல்படும் நிறுவனம்” என்று தெளிவுபடுத்தினர்.