‘நலம் காக்கும் ஸ்டாலின்’ திட்டம் தொடக்கம் – மருத்துவர்களுக்கு முதல்வர் பரிவு மிகுந்த வழிகாட்டல்
முதல்வர் மு.க.ஸ்டாலின் ‘நலம் காக்கும் ஸ்டாலின்’ எனப்படும் சிறப்பு மருத்துவ முகாமை சென்னை சாந்தோமில் உள்ள செயின்ட் பீட்ஸ் ஆங்கிலோ இந்தியன் மேல்நிலைப் பள்ளி வளாகத்தில் நேற்று (ஆ.1) நிகழ்வாகத் தொடங்கி வைத்தார். இந்த சிறப்பு முகாம்கள் தமிழகத்திலுள்ள அனைத்து மாவட்டங்களிலும் ஒவ்வொரு சனிக்கிழமையும் காலை 9 மணி முதல் மாலை 4 மணி வரை நடைபெறவுள்ளதாக அறிவிக்கப்பட்டுள்ளது.
முகாமின்போது முதல்வர், முகாமில் ஏற்பாடு செய்யப்பட்டிருந்த மருத்துவப் பிரிவுகளை நேரில் பார்வையிட்டு, மருத்துவ பரிசோதனைகளின் நடைபெறும் முறைமையை கவனித்ததோடு, சிகிச்சை பெற வந்த பொதுமக்களுடன் உரையாடினார். இதேவேளை, பயனாளிகளுக்கு விரிவான மருத்துவக் காப்பீட்டு அட்டைகள், மாற்றுத் திறனாளிகளுக்கு காதொலி கருவிகள், அடையாள அட்டைகள் ஆகியனவற்றையும் வழங்கினார்.
முதல்வர் உரை – மருத்துவ பணியாளர்களுக்கான அக்கறைமிக்க ஆலோசனை:
முதல்வர் ஸ்டாலின் தனது உரையில் கூறியதாவது:
“கோட்டைக்குள் இருந்த சிகிச்சையிலிருந்து மீண்டுவந்த பிறகு, பொதுமக்கள் மத்தியில் நேரில் கலந்துகொண்டு பேசும் முதல் நிகழ்வாக இது அமைந்துள்ளது. மாநிலம் முழுவதும் ஒரே நேரத்தில் இந்த திட்டம் செயல்படுத்தப்படுகிறது. இதில் முதல்கட்டமாக 1,256 முகாம்கள் நடைபெறவுள்ளன. முக்கியமாக, சிறப்பு மருத்துவ சேவைகள் பின்தங்கியுள்ள கிராமப்புறங்கள், குடிசைப் பகுதிகள், பழங்குடியினர் வாழும் பகுதிகள் ஆகியவற்றில் முன்னுரிமையுடன் இந்த முகாம்கள் நடக்கின்றன.
ஒவ்வொரு முகாமிலும் சுமார் 200 பேர் கொண்ட மருத்துவ பணியாளர்கள் பணியாற்றுவர். இந்த முகாம்களில் 17 தனித்தன்மை வாய்ந்த மருத்துவ சேவைகள் வழங்கப்படும். நீரிழிவு, உயர் ரத்த அழுத்தம், மனநல பிரச்சனை, இதய நோய்கள், கர்ப்பிணிகள் மற்றும் பாலூட்டும் தாய்கள், வளர்ச்சி தடைபட்ட சிறு குழந்தைகள், மாற்றுத் திறனாளிகள், பழங்குடியினர் மற்றும் சமூக-பொருளாதார ரீதியாக பின்தங்கியோருக்கு முன்னுரிமை வழங்கப்படும்.
முகாம்களில் அனைத்து பயனாளிகளிடமும் ரத்த மாதிரிகள் எடுத்து, ரத்த அணுக்கள் எண்ணிக்கை, ரத்த சர்க்கரை அளவு, சிறுநீரக செயல்பாடுகள் உள்ளிட்ட பரிசோதனைகள் மேற்கொள்ளப்படும். இதேபோல், பொது மருத்துவரின் பரிந்துரைப்படி ECG, எக்கோ, எக்ஸ்ரே, அல்ட்ராசவுண்ட் ஸ்கேன், காசநோய் மற்றும் தொழுநோய் கண்டறிதல் பரிசோதனைகள், பெண்களுக்கான கருப்பை வாயுப் புற்றுநோய் மற்றும் மார்பக புற்றுநோய் பரிசோதனைகளும் மேற்கொள்ளப்படும்.
பரிசோதனையின் முடிவுகள் அனைத்தும் ஒருங்கிணைக்கப்பட்ட ஆவணமாக பயனாளிகளுக்கு வழங்கப்படும். இது அவர்களின் “மெடிக்கல் ஹிஸ்டரி” ஆகக் கருதப்படும். எதிர்காலத்தில் எந்த மருத்துவமனையிலும் சிகிச்சை தேவைப்பட்டால், இந்த அறிக்கையை அவர்கள் பயன்படுத்த முடியும்.
நகர்புறத்தில் வசதிகள் உள்ளவர்களுக்கு கிடைக்கும் மருத்துவ சேவைகள், கிராமப்புறத்தில் வசிக்கும் ஏழை மற்றும் சாதாரண மக்களுக்கும் சமமாக கிடைக்க வேண்டும் என்பதே அரசின் நோக்கம். ஆகையால், அனைத்து மக்களும் இந்த வாய்ப்பை பயன்படுத்து வேண்டும். உடலில் சிறிய பிரச்சனை இருந்தால்தான் மருத்துவமுகாமுக்கு வருகிறார்கள். அதனால் அவர்களை நோயாளி என்று அல்ல, மருத்துவ உதவிக்காக வந்த பயனாளிகளாகவே மருத்துவர்கள் மற்றும் பணியாளர்கள் பார்ப்பதையே வழிமுறையாக வைத்துக்கொள்ள வேண்டும். உங்கள் குடும்பத்தினரை பார்ப்பதுபோல் பரிவுடன், அக்கறையுடன் முகாமில் வரும் மக்களை கவனிக்க வேண்டும். தமிழகம் எப்போதும் அனைத்திலும் முதலிடத்தில் இருக்க வேண்டும் என்ற எண்ணம் எனக்கு உள்ளது. இந்த திட்டம் மூலம் மருத்துவ சேவைகளில் தமிழகம் தலைசிறந்த மாநிலமாக உருவாகும் என உறுதியாக நம்புகிறேன்” எனக் கூறினார்.
விரிவான பங்கேற்பும் நிதியுதவியும்:
இந்த நிகழ்வில் துணை முதல்வர் உதயநிதி ஸ்டாலின், சுகாதாரத் துறை அமைச்சர் மா. சுப்பிரமணியன், அறநிலையத்துறை அமைச்சர் சேகர்பாபு, சென்னை மேயர் பிரியா, தலைமைச் செயலர் முருகானந்தம், சுகாதாரத் துறை செயலர் செந்தில்குமார், சென்னை மாநகராட்சி ஆணையர் குமரகுருபரன், தேசிய நலவாழ்வு குழும இயக்குநர் அருண் தம்புராஜ், ‘தி இந்து’ குழுமத்தினரான என். ராம் உள்ளிட்டோர் கலந்து கொண்டனர்.
முதல் நாளிலேயே 44,418 பேர் பயன்பாடு:
மாநிலம் முழுவதும் நடத்தப்படவுள்ள 1,256 முகாம்களுக்காக ஒட்டுமொத்தமாக ரூ.13.58 கோடி நிதி ஒதுக்கப்பட்டுள்ளது. ஒவ்வொரு முகாமுக்கும் சுமார் ரூ.1.08 லட்சம் செலவாகும். ஒரு மாவட்டத்தில் ஒரு முகாம் என்றபடி சனிக்கிழமைகளில் தேர்ந்தெடுக்கப்பட்ட பள்ளிகள் மற்றும் கல்லூரி வளாகங்களில் நடத்தப்படும் இந்த முகாம்களில் பல்வேறு துறைகளைச் சேர்ந்த நிபுணர்கள் பங்கேற்று ஆலோசனை வழங்குகிறார்கள்.
நேற்று ஒரே நாளில் மட்டும் தமிழகம் முழுவதும் நடைபெற்ற 38 முகாம்களில் 44,418 பேர் பயனடைந்ததாக சுகாதார அமைச்சர் மா.சுப்பிரமணியன் தெரிவித்தார்.
