“காணவில்லை” – சுரேஷ் கோபி மீது கேரள போலீசில் புகார்
நடிகர் மற்றும் மத்திய இணை அமைச்சருமான சுரேஷ் கோபியை காணவில்லை என கேரள போலீசில் புகார் அளிக்கப்பட்டுள்ளது.
கேரள மாணவர் சங்கத்தின் மாவட்டத் தலைவர் கோகுல் குருவாயூர் திருச்சூர் கிழக்கு காவல் நிலையத்தில் அளித்த புகாரில், கேரளாவைச் சேர்ந்த கன்னியாஸ்திரிகள் சத்தீஸ்கரில் கைது செய்யப்பட்ட பின்னர் சுரேஷ் கோபியை அந்தப் பகுதியில் காணவில்லை என்று தெரிவித்தார்.
புகாரில் மேலும் கூறியதாவது:
“கடந்த இரண்டு மாதங்களாக, மத்திய அமைச்சராகவும் திருச்சூர் மக்களவை உறுப்பினராகவும் இருக்கும் இவர், தொகுதியில் நடக்கும் எந்த நிகழ்வுகளிலும் கலந்து கொள்ளவில்லை. மேயர் மற்றும் வருவாய் துறை அமைச்சராலும் அவரை தொடர்பு கொள்ள முயன்றபோதும் அவர் பேசவில்லை. தொகுதியில் மத்திய அரசின் திட்டங்களை தொடங்க அவர் தொடர்பு கொள்ள முயற்சித்தாலும் எவராலும் அவரை சந்திக்க முடியவில்லை. அவருடைய அலுவலக ஊழியர்களும் அவர் எங்கு இருக்கிறார், எப்போது வருவார் என்று அறியவில்லை.
கிறிஸ்துமஸ் பண்டிகை காலத்தில் கிறிஸ்தவர்களின் வீடுகளுக்கு சென்று கேக் வழங்குவார் என்று அறியப்படும் அவர், சத்தீஸ்கர் மாநிலத்தில் கேரளாவைச் சேர்ந்த கன்னியாஸ்திரிகள் மீது பொய் வழக்கு பதிவு செய்யப்பட்ட சம்பவத்துக்குப் பிறகு எங்கும் காணப்படவில்லை.”
கேரள மாணவர் சங்கம், சுரேஷ் கோபி மீது எதிர்ப்பு பிரச்சாரங்கள் தீவிரமாக விரிவடைந்துள்ளதாகவும், அவரது தொகுதிக்கு வராமையை விசாரணை செய்ய வேண்டும் எனவும், அவர் நிலைப்பாட்டை தெளிவுபடுத்தும்வரை போராட்டங்களை தீவிரப்படுத்துவதாக எச்சரித்துள்ளது.
