பாமக உள்நாட்டு மோதல் – வெற்றி பெறப்போவது ராமதாஸா? அன்புமணியா?

ராமதாஸ் – அன்புமணி இடையேயான கருத்து வேறுபாடு தீராத நிலையில் நீடிக்கிறது. தேர்தலுக்கு இன்னும் சில மாதங்களே உள்ள சூழலில், இந்த உள்கட்சி பிரச்சினை எப்போது முடிவுக்கு வரும் என்ற பதட்டத்தில் இருக்கிறார்கள் பாட்டாளி மக்கள் கட்சித் தொண்டர்கள்.

கடந்த ஆண்டு டிசம்பர் மாத இறுதியில் நடைபெற்ற பொதுக்குழு கூட்டத்தில், பாமக இளைஞர் சங்கத் தலைவராக தனது பேரன் முகுந்தனை அறிவித்தார் ராமதாஸ். இதற்கு மேடையிலேயே கடுமையான எதிர்ப்பை வெளிப்படுத்தினார் அன்புமணி. அப்போது கிளம்பிய தீப்பொறி இன்றுவரை அணையவில்லை.

கடந்த சில மாதங்களாக ஊடகங்களில் தினமும் அன்புமணியை சாடி வருகிறார் ராமதாஸ். கட்சியில் இருவரும் மாறி மாறி நிர்வாகிகளை நீக்கி, புதிய நியமனங்களை அறிவிக்கின்றனர். ராமதாஸின் எதிர்ப்பை பொருட்படுத்தாமல் நடைபயணத்தை முன்னெடுத்த அன்புமணி, பொதுக்குழு கூட்டத்தையும் வெற்றிகரமாக நடத்தியுள்ளார். அதே நேரத்தில், அன்புமணிக்கு போட்டியாக பூம்புகாரில் மகளிர் மாநாட்டை நடத்தியுள்ளார் ராமதாஸ். இரு அணிகளின் பரபரப்பும் நாளுக்கு நாள் அதிகரித்துக்கொண்டே இருக்கிறது.

ராமதாஸின் அதிருப்தி

கட்சி தொடங்கிய காலம் முதல் கூட்டணிகளை மாற்றி அமைப்பது குறித்து விமர்சனங்கள் இருந்தாலும், ஒவ்வொரு தேர்தலிலும் பாமகவின் பிரதிநிதித்துவத்தை உயர்த்த ராமதாஸ் பாடுபட்டார். 2016 முதல் அன்புமணி கட்சியின் கட்டுப்பாட்டைப் பெற்றார். அப்போது தனித்து வெற்றி காண்பிக்க உறுதி எடுத்திருந்தாலும், அவர் போட்டியிட்ட பென்னாகரம் உட்பட அனைத்து வேட்பாளர்களும் தோல்வி கண்டனர். 2019 மக்களவைத் தேர்தலும் தோல்வியில் முடிந்தது. 2021 சட்டப்பேரவைத் தேர்தலில் 5 இடங்களில் மட்டும் வெற்றி கிடைத்தது.

இந்த தொடர்ச்சியான தோல்விகள் காரணமாக பாமகவின் மாநிலக் கட்சி அந்தஸ்தும், அதிகாரப்பூர்வ சின்னமும் இழந்துவிட்டது. இதை மீட்க 2024 மக்களவைத் தேர்தலில் அதிமுகவுடன் கூட்டணி அமைக்கத் திட்டமிட்டார் ராமதாஸ். 7 தொகுதிகள், ஒரு ராஜ்யசபா இடம் என பேச்சுவார்த்தையும் முடிவடைந்த நிலையில், திடீரென பாஜக கூட்டணியில் சேர்ந்தார் அன்புமணி. தேர்தல் முடிவும் பாமகக்கு பூரண தோல்வியாகவே அமைந்தது. இதுவே இருவருக்கும் இடையே பிளவை பெரிதாக்கியது.

மாநிலக் கட்சி அந்தஸ்தை மீட்டுக் கொள்ள முடியவில்லை என்ற ஏமாற்றம் ராமதாஸுக்கும் தொண்டர்களுக்கும் ஏற்பட்டுள்ளது. அதிமுக கூட்டணியில் இருந்திருந்தால் குறைந்தபட்சம் 2 தொகுதிகள் வென்று, ராஜ்யசபா இடமும் கிடைத்திருக்கும் என அவர் கருதுகிறார்.

அன்புமணியின் பதில்

சிலர் தன்னைத் தூண்டி ராமதாஸ் பேசுகிறார் என்றும், அவரின் விமர்சனங்கள் அப்படிப்பட்டவர்களின் தாக்கமே என்றும் அன்புமணி குற்றம் சாட்டுகிறார். 2026 ஆகஸ்ட் வரை தானே தலைவர் என பொதுக்குழுவில் தீர்மானம் நிறைவேற்றியுள்ளார். ராமதாஸ் மகளிர் சங்க மாநாட்டில், ‘நானே வெற்றி கூட்டணி அமைப்பேன், யாருடைய பேச்சையும் கேட்காதீர்கள்’ என தெரிவித்துள்ளார்.

அரசியல் சைகைகள்

அன்புமணி, ‘திமுகவை வீழ்த்துவதே நோக்கம்’ என்று கூறியிருக்க, ராமதாஸ், ‘20% இடஒதுக்கீடு கலைஞர் சாதனை, ஸ்டாலின் 10.5% உள் ஒதுக்கீடு தர வேண்டும்’ எனவும், திமுக கூட்டணிக்கு நேரடியாக மறுப்பு அளிக்காமலும் உள்ளார். இதனால் இருவரும் வேறு கூட்டணிகளில் இணைய வாய்ப்புள்ளதாக பேசப்படுகிறது.

மகாராஷ்டிராவில் சரத் பவார் நிறுவிய NCP போலவே, பாமகவும் இரு அணிகளாக பிளவுபடும் அபாயம் உள்ளது. அன்புமணி அணி அதிமுக-பாஜக கூட்டணியில், ராமதாஸ் அணி திமுக கூட்டணியில் இணையலாம் என்ற அரசியல் கணிப்புகள் வெளியாகின்றன.

தேர்தல் காலத்தில் 10.5% இடஒதுக்கீடு, சாதிவாரி கணக்கெடுப்பு போன்ற அறிவிப்புகளை திமுக வெளியிட்டு, அதை ராமதாஸ் வரவேற்கும் நிலையும் உருவாகலாம். தந்தை-மகன் இடையேயான இந்த அதிகாரப் போரில் வெற்றி காணப்போவது யார் என்பது தற்போது அரசியல் வட்டாரங்களின் கேள்வி.