மீஞ்சூர்: வடமாநில தொழிலாளர்கள் போராட்டத்தில் போலீசார் மீது கல்வீச்சு – 50க்கும் மேற்பட்டோர் கைது
திருவள்ளூர் மாவட்டம் மீஞ்சூர் அருகே காட்டுப்பள்ளியில் நடைபெற்ற வடமாநில தொழிலாளர்களின் போராட்டத்தில் போலீசாருக்கு எதிராக கல்வீசித் தாக்குதல் நடைபெற்றது. இதைத் தொடர்ந்து போலீசார் தடியடி நடத்தியும், கண்ணீர் புகைக் குண்டு வீசியும் போராட்டக்காரர்களை விரட்டியதோடு, 50க்கும் மேற்பட்டோரைக் கைது செய்தனர்.
சம்பவம் எப்படி நடந்தது?
மீஞ்சூர் காட்டுப்பள்ளியில் இயங்கி வரும் தனியார் நிறுவனத்தில் உத்தரப் பிரதேசத்தைச் சேர்ந்த அமர்பிரசாத் ஒப்பந்த தொழிலாளராக வேலை பார்த்து வந்தார். நேற்றிரவு அவர் தொழிலாளர்கள் தங்கியிருந்த விடுதி கட்டிடத்தின் மாடியில் ஏறியபோது தவறி விழுந்து உயிரிழந்ததாக கூறப்படுகிறது.
தகவலறிந்த காட்டூர் போலீசார் உடனே சம்பவ இடத்துக்கு சென்று, அவரது உடலை மீட்டு பிரேதப் பரிசோதனைக்காக சென்னை ஸ்டான்லி அரசு மருத்துவமனைக்கு அனுப்பினர். மேலும், சம்பவம் தொடர்பாக வழக்குப் பதிவு செய்து விசாரணை மேற்கொண்டு வருகின்றனர்.
இந்த நிலையில், “உடலை எங்களிடம் காண்பிக்க வேண்டும், மரணம் குறித்து முழுமையான விசாரணை நடத்த வேண்டும், குடும்பத்துக்கு இழப்பீடு வழங்க வேண்டும்” என்று வலியுறுத்தி, சுமார் 2 ஆயிரம் வடமாநில தொழிலாளர்கள் இன்று போராட்டத்தில் ஈடுபட்டனர்.
இதனால் காட்டுப்பள்ளி பகுதி பதற்றமான சூழலாக மாறியது. பாதுகாப்பு முன்னெச்சரிக்கையாக நூற்றுக்கும் மேற்பட்ட போலீசார் அங்கு முகாமிட்டனர். போராட்டக்காரர்களுடன் போலீசார் பேச்சுவார்த்தை நடத்த முயன்றபோதும், சிலர் கல்வீசித் தாக்குதலில் ஈடுபட்டனர்.
அதற்குப் பதிலளித்த போலீசார் தடியடி நடத்தியும், கண்ணீர் புகைக் குண்டுகளை வீசியும் கூட்டத்தை கலைத்தனர். இதனால் அப்பகுதி சில நேரம் கலவர சூழலை ஒத்ததாக மாறியது. தற்போது அங்கு போலீசார் கடும் பாதுகாப்பில் முகாமிட்டுள்ளனர்.
