என்எஸ்எஸ் சிறப்பு முகாமுக்கான வழிகாட்டு விதிகள் – பள்ளிக்கல்வித் துறை வெளியீடு

அரசுப் பள்ளி மாணவர்களுக்கு என்எஸ்எஸ் (தேசிய சேவை திட்டம்) சிறப்பு முகாம் நடத்துவதற்கான வழிகாட்டு விதிகளை பள்ளிக்கல்வித் துறை வெளியிட்டுள்ளது.

அரசுப் பள்ளிகளில் பயிலும் மாணவர்களின் தனித்திறன்களை மேம்படுத்தி, தன்னார்வ பணிகளில் ஈடுபடுத்தி, சமூக முன்னேற்றத்திற்கு பங்களிக்க செய்வதே நாட்டு நலப்பணித் திட்டத்தின் நோக்கம் ஆகும். இதன் ஒரு பகுதியாக, 2025-26 கல்வியாண்டுக்கான என்எஸ்எஸ் சிறப்பு முகாம் நடைபெற உள்ளது. அதற்கான வழிகாட்டுதல்கள் அறிவிக்கப்பட்டுள்ளன.

அதன்படி:

• முகாம் 7 நாட்களுக்கு நடத்தப்பட வேண்டும்.
• பங்கேற்கும் மாணவர்களின் பெற்றோரின் மறுப்பின்மைச் சான்றிதழ் பெறப்பட்ட பிறகே அவர்களை சேர்க்க வேண்டும்.
• அழைப்பிதழில் இடம்பெறும் பெயர்கள் மற்றும் விவரங்கள் தமிழில் மட்டுமே இருக்க வேண்டும்.
• மாணவர்கள் தங்கும் இடங்களில் போதிய வசதிகள் செய்யப்பட்டிருக்க வேண்டும்.
• முறையான அனுமதியின்றி, மாணவர்கள் முகாமிலிருந்து வெளியே செல்லக்கூடாது.
• மதப் பரப்புரைகள் முற்றிலும் தடைசெய்யப்படுகின்றன.

மேலும், முகாமில் மேற்கொள்ள வேண்டிய முக்கிய செயல்பாடுகள்:

• குறைந்தது 1,000 மரக்கன்றுகள் மற்றும் விதைகள் நடுதல்.
• உயர்கல்வி வழிகாட்டும் நிகழ்வுகள்.
• மண் பாதுகாப்பு மற்றும் மழைநீர் சேகரிப்பு தொடர்பான விழிப்புணர்வு.
• போதைப்பொருள் தடுப்பு தொடர்பான பிரசாரங்கள்.

இவ்வாறு, பல்வேறு அம்சங்கள் அடங்கிய வழிகாட்டு விதிகள் பள்ளிக்கல்வித் துறை வெளியிட்ட அறிக்கையில் இடம் பெற்றுள்ளன.