பாமக தலைமை அலுவலக முகவரியை மாற்றி மோசடி செய்துள்ளனர்: ஜி.கே.மணி குற்றச்சாட்டு

பாமக தலைவர் அன்புமணி என தேர்தல் ஆணையம் கூறவில்லை. பாமக தலைமை அலுவலகத்தின் முகவரியை மாற்றி மோசடி செய்துள்ளனர் என்று கட்சியின் கவுரவத் தலைவர் ஜி.கே.மணி தெரிவித்தார்.

திண்டிவனம் அருகே தைலாபுரத்தில் செய்தியாளர்களிடம் அவர் கூறியது:

• தேர்தல் ஆணையம் வெளியிட்ட கடிதத்தில் பிஹார், தமிழ்நாடு, புதுச்சேரி மாநிலங்களில் பாமகவுக்கு மாம்பழச் சின்னம் ஒதுக்கப்பட்டுள்ளதாக தெரிவிக்கப்பட்டுள்ளது.
• அந்த கடிதத்தின் முகவரி: “தலைவர், பாமக, எண் – 10, திலக் தெரு, தி.நகர், சென்னை – 17”.
• பாமக அலுவலக முகவரி மாற்றம் ராமதாஸுக்கு அதிர்ச்சியை ஏற்படுத்தியுள்ளது.
• பாமகவின் நிரந்தர முகவரி: “63 நாட்டுமுத்து நாயக்கன் தெரு, தேனாம்பேட்டை, சென்னை”.

சூழ்ச்சியால் பாமக தலைமை அலுவலக முகவரி மாற்றப்பட்டுள்ளது. உண்மையில் தேர்தல் ஆணையம் கடிதம் அனுப்பியது பாமக தலைவருக்குதான். ஆனால், தேனாம்பேட்டைக்கு கடிதம் போகாமல் திலக் தெருவுக்கு சென்றுள்ளது.

மாமல்லபுரத்தில் கடந்த 9-ம் தேதி நடைபெற்ற பொதுக்குழுக் கூட்டத்தில் தேர்வு செய்யப்பட்ட நிர்வாகிகளை பதிவு செய்து கொள்கிறோம் என தேர்தல் ஆணையம் மற்றொரு கடிதத்தில் தெரிவித்துள்ளது. பாமக தலைவர் பதவியில் அன்புமணி 28-05-22-ல் பொறுப்பேற்றார்; அவரது பதவிக் காலம் 28-05-25-ம் தேதியுடன் முடிவடைந்துவிட்டது. ஆகையால், தலைவரல்லாதவர் மாமல்லபுரத்தில் பொதுக்குழுவை கூட்ட முடியாது. அந்தக் கூட்டத்தில் நிர்வாகிகள் தேர்வு செய்யப்பட்டதும் செல்லாது.

கட்சியின் நிறுவனர் மற்றும் தலைவர் ராமதாஸ் தான். இதை நிர்வாகக் குழு மற்றும் செயற்குழு அங்கீகரித்துள்ளது. தேர்தல் ஆணையம் பாமக தலைவர் என்றுதான் கடிதம் எழுதியுள்ளது. தலைவருக்குதான் பாமகவின் மாம்பழம் சின்னம் ஒதுக்கப்பட்டுள்ளது. தற்போது ராமதாஸ் தான் தலைவர்.

முகவரி மாற்றம் மோசடிக்கான முக்கிய காரணம். மாம்பழம் சின்னம் ஒதுக்கீடு செய்யப்பட்ட கடிதம் ராமதாஸுக்கு சொந்தமானது. இது தொடர்பாக வழக்கறிஞர் பாலு நடத்திய நாடகத்தை யாரும் நம்ப மாட்டார்கள்.

ஜி.கே.மணி மேலும் கூறினார்:

• யார் வேண்டும் என்றாலும் தலைவர் என்று சொல்லிக் கொள்ளலாம்.
• கட்சியை தொடங்கியவர் யார் என்பது எல்லோருக்கும் தெரியும்.
• பாமகவில் தொடர வேண்டும் என்றால் ராமதாஸுடன் இணைந்து பயணிப்பதே நல்லது.
• பாமகவை பிளவுபடுத்தும் முயற்சி பலிக்காது.