தண்ணீரில் இருந்து எடுக்கப்படும் ஹைட்ரஜன் கொண்டு ‘காஸ்’ தயாரிப்பு: விஞ்ஞானி தகவல்
திருப்பூர் மாவட்டம் அவிநாசி அருகே வஞ்சிபாளையம் முருகம்பாளையத்தில் செயல்பட்டு வரும் ஹன்க் நிறுவனத்தில், தண்ணீரில் இருந்து ஹைட்ரஜன் எரிவாயுவை பிரித்தெடுத்து சமையல் மற்றும் தொழிற்சாலைகளுக்கு பயன்படுத்தும் முறையை கண்டறிந்துள்ளார் விஞ்ஞானி பேளூர் ராமலிங்கம் கார்த்திக்.
‘ஹன்க் காஸ்’ என பெயரிடப்பட்ட இந்த புதிய கண்டுபிடிப்பு அறிமுக நிகழ்ச்சி நேற்று அவிநாசி அருகே நடைபெற்றது. செயல்முறை விளக்கம் அளித்தார் முதன்மை விஞ்ஞானி பேளூர் ராமலிங்கம் கார்த்திக். இதில் நடிகர் மற்றும் ஹன்காஸ் நிறுவனத்தின் முதன்மை இயக்குநர் சரத்குமார், ராம்ராஜ் காட்டன், நிறுவனர் கே.ஆர். நாகராஜன் ஆகியோர் பங்கேற்று புதிய கண்டுபிடிப்பை அறிமுகப்படுத்தினர்.
விஞ்ஞானி பேளூர் ராமலிங்கம் கார்த்திக் செய்தியாளர்களிடம் கூறியதாவது: “இயற்கையான முறையில், கார்பன் இல்லாத நிலையில் தண்ணீரை கொண்டு, அதிலிருந்து கிரீன் ஹைட்ரஜன் மூலம் நெருப்பை உருவாக்கி தயாரித்துள்ளேன். சுமார் 20 ஆண்டுகள் ஆராய்ச்சியின் விளைவாக இது சாத்தியமானது. கார்பன் இல்லாத எரிபொருளாகவும், மிகவும் பாதுகாப்பானதாகவும் உள்ளது. ஒரு லிட்டர் குடிநீரில் இருந்து 1,225 லிட்டர் ஹைட்ரஜன் எடுக்கலாம். கைராய்டு எலெக்ட்ரோலைட் மெம்ப்ரேன் இயந்திரங்கள் மூலம் பிரித்து, சமையல் மற்றும் தொழிற்சாலைகளில் பயன்படுத்தலாம். ஒரு லிட்டர் தண்ணீரில் இருந்து பெறப்படும் காஸ், ஒரு குடும்பத்தின் ஒரு மாத சமையலுக்கு போதுமானது. இயந்திரங்கள் இன்றைய நிலையில் ரூ.40 ஆயிரமாக உள்ளன. மத்திய அரசிடம் அங்கீகாரம் கோரி விண்ணப்பித்து, எரிசக்தி துறையினரை சந்தித்து செயல்விளக்கங்களையும் காட்டியுள்ளோம்”.
நிறுவனத்தின் முதன்மை இயக்குநர், நடிகர் சரத்குமார் கூறினார்: “இந்த காஸ் பொதுமக்களின் பயன்பாட்டுக்கு ஏற்றது. அங்கீகாரம் தொடர்பாக மத்திய அரசின் எரிசக்தித்துறை அதிகாரிகளிடம் பேசியுள்ளோம். வீடுகள், மருத்துவமனைகள், தொழிற்சாலைகள் என பல்வேறு இடங்களில் பயன்படுத்தலாம். இந்த கண்டுபிடிப்பு அங்கீகரிக்கப்பட்டால், பொருளாதாரத்தில் மிகப்பெரிய மாற்றம் ஏற்படும். முன் காலங்களில் ரயில், விமானம் போன்ற புதிய கண்டுபிடிப்புகளை மக்கள் சந்தேகத்தோடு பார்த்தாலும் பின்னர் ஏற்றுக்கொண்டனர். இதையும் ஆரம்பத்தில் கேள்விகள் எழுப்பினாலும், விரைவில் மக்கள் புரிந்து ஏற்றுக் கொள்வார்கள் என்ற நம்பிக்கை உள்ளது”.
