ஜென் ஸீ இளைஞர்களை வளைக்கும் விஜய் வியூகம் எடுபடுமா?
தமிழக வாக்காளர்களில் 6-ல் ஒருவர் இளைஞர் என்று புள்ளிவிவரம் கூறுகிறது. குறிப்பாக ஜென் ஸீ இளைஞர்களை தவெக தன் பக்கம் ஈர்க்க விஜய் முயற்சி செய்கிறார் என்று கருத்து நிலவுகிறது.
கடந்த 13-ம் தேதி திருச்சி, அரியலூர் மற்றும் நேற்றைய நாள் (செப்.20) நாகப்பட்டினம், திருச்சி ஆகிய 4 மாவட்டங்களில் கடந்த இரண்டு வாரங்களில் தவெக தலைவர் விஜய் பிரச்சாரம் செய்துள்ளார். விஜய் அரசியலுக்கு வந்ததன் மூலம், “எங்கள் கொள்கையை சொல்லட்டும்” என்ற கோரிக்கை எழுந்தது. அதற்கு பதிலாக, அவர் இரண்டு மாநாட்டு மேடைகளில் “திமுக தான் எங்கள் அரசியல் எதிரி, பாஜக தான் எங்கள் கொள்கை எதிரி” எனக் கூறினார்.
பின்னர், களத்துக்கு வந்து மக்களை சந்திக்கட்டும் என்ற விமர்சனங்கள் எழுந்தன. தற்போது 4 மாவட்ட மக்களிடம் உரையாற்றிய நிலையில், “எழுதிக் கொடுத்ததை படிப்பது, அதுவும் நடிகருக்கு சிரமமா? செய்தியாளர்களின் கேள்விகளுக்கு பதில் சொல்லட்டும் பார்ப்போம்” என்ற விமர்சனங்கள் எழுகின்றன.
ஆனால், வடிவேலு-சுந்தர்.சி காமெடி போல், “உங்கள் ஏரியாவுக்கே, வீட்டுக்கே வந்துட்டேன்” தொனியில், விஜய் ஸ்கோர் செய்து வருகிறார் என தவெக நண்பர்கள் கூறுகின்றனர்.
விஜய்க்கு பெரும் கூட்டம் கூடுவது, அவர் திரைப் பிரபலம், 30 வருடமாக ஹீரோவாக ஜொலிப்பவர், இன்னும் ஒரு படம் வெளியீட்டுக்காக இருக்கும் ஹீரோ என்பதெல்லாம் பெரும் பங்காக இருந்தாலும், வழக்கமான அரசியல் பாணியைத் தாண்டி, அவர் எடுத்த அப்ரோச் இளம் வாக்காளர்களை நோக்கி இருப்பதை கவனிக்கலாம்.
அரசியலில் மேடைப் பேச்சு, பொதுக் கூட்டப் பேச்சு, பாராட்டு விழா பேச்சு, தெருமுனை பிரச்சாரம் என பல பாணிகள் உள்ளன. அடக்கி நாகரிகமாக பேசும் பேச்சு முதல் தீப்பொறி பேச்சுக்கள் வரை வகை வகையாக இருக்கின்றன.
இந்த வழக்கமான பாணியை உடைத்து, தெளிவான உச்சரிப்பில், தமிழ் இருந்தாலும் திருக்குறள், சங்கத்துப் பாடல் அல்லது சினிமா டயலாக் டெலிவரி போல், இளைஞர்களை ஈர்க்கும் வகையில் பேசுவது சீமானின் வியூகம் போலவே அமைந்துள்ளது.
தமிழகத்தில் பொதுவாக ஜென் ஸீ இளைஞர்கள் தங்கள் மொழியில் தங்க்லீஷ் வார்த்தைகளைப் பயன்படுத்துகின்றனர். விஜய் அரசியல் உரைகளில் இதை உறுதி செய்கிறார்.
அரசியல் மேடைக்கான சவால்களை, இளைஞர்களின் பிரச்சார சவால் போல “என்ன மிரட்டிப் பார்க்கிறீர்களா? கெத்தா வந்து மோதுங்கள்” என்று எதிர்கொள்கிறார். “நான் தனி ஆள் இல்லை, தவெக மாபெரும் இளைஞர் இயக்கம்” என்ற விஜய்யின் பேச்சுத் துளிகள் ரீல்களாக கட் செய்யப்படுகின்றன.
சமீபத்திய நாடுகளின் அரசியல் போராட்டங்களில் ஜென் ஸீ இளைஞர்கள் முக்கிய பங்கு வகித்துள்ளனர். இதேபோல், இந்திய அரசியலிலும் ஜென் ஸீ இளைஞர்கள் முக்கியத்துவம் பெறுகின்றனர்.
இவ்வாறு ஜென் ஸீ தலைமுறையினரை ஈர்க்கும் விஜய்யின் வியூகம் 2026 தேர்தலில் கைகொடுக்குமா என்பதை அடுத்து வரவிருக்கும் சனிக்கிழமைகள் தீர்மானிப்பது.
விஜய் ஒவ்வொரு மாவட்ட பிரச்சாரத்திலும் ‘மாஸ்’ குறையாமல், ‘லைவ்’ வீடியோக்களில் வியூஸ் குறையாமல் கவனித்துக் கொள்வதில் கூட ஹோம் ஒர்க் செய்கிறார்.
