தாய்மொழிக்கு முக்கியத்துவம் தரும் தேசிய கல்விக் கொள்கை: குஜராத்தின் அம்பேத்கர் திறந்தநிலை பல்கலை. துணைவேந்தர் உரை
தமிழ்நாடு திறந்தநிலை பல்கலைக்கழகத்தின் பட்டமளிப்பு விழாவில், பல்வேறு படிப்புகளில் சிறப்பாக விளங்கிய 304 மாணவ, மாணவிகளுக்கு தமிழக ஆளுநர் ஆர்.என். ரவி பதக்கங்கள் மற்றும் சான்றிதழ்களை வழங்கினார். இதே போது, குஜராத்தின் அம்பேத்கர் திறந்தநிலை பல்கலைக்கழக துணைவேந்தர், தாய்மொழிக்கு தேசிய கல்விக் கொள்கை அளிக்கும் முக்கியத்துவத்தை பேசினார்.
தமிழ்நாடு திறந்தநிலை பல்கலைக்கழகத்தின் 16-வது பட்டமளிப்பு விழா சென்னையில் உள்ள வளாகத்தில் நேற்று நடைபெற்றது. தமிழக ஆளுநர் ஆர்.என். ரவி தலைமை தாங்கினார். இதில் 3,007 இளநிலை, 3,098 முதுநிலை மாணவர்களையும் சேர்த்து 7,972 பேர் பட்டம் பெற்றனர். பதக்கங்களை வென்ற 304 மாணவர்களுக்கு ஆளுநர் ரவி விருதுகளை வழங்கினார். மேலும், ஆசியாவுக்கான காமன்வெல்த் கல்வி ஊடக மைய விருதை மாணவி திவ்யா பெற்றார்.
நிகழ்ச்சியில் சிறப்பு விருந்தினராக பங்கேற்ற குஜராத்தின் துணைவேந்தர் உபாத்யாயா கூறியதாவது: “மாணவர்கள் பட்டம் பெறுவது மகிழ்ச்சியானது. அவர்கள் நாட்டின் வளர்ச்சிக்காக தங்கள் பங்களிப்பை வழங்குவார்கள். தேசிய கல்விக் கொள்கை, பட்டப்படிப்புகளில் நுழைவுகளையும் வெளியேற்றத்தையும் வலியுறுத்துகிறது. நான் பிஎச்டி செய்ய விரும்பினேன், பாரம்பரிய நடனக் கலைஞராகவும் ஆனேன். அதற்கு அந்த நேரத்தில் வாய்ப்பு கிடைக்கவில்லை. தற்போது தேசிய கல்விக் கொள்கை பல மாற்றங்களை கொண்டு வருகிறது. உலகில் பழமையான 7 மொழிகளில் தமிழ் மற்றும் சமஸ்கிருதம் இருக்கிறது. தாய்மொழி மற்றும் பிராந்திய மொழிகளுக்கு முக்கியத்துவம் வழங்கப்படுகிறது. 2047 ஆம் ஆண்டில் வளர்ந்த பாரதம் உங்கள் கையில் இருக்கும்; நீங்கள் நாட்டை வடிவமைக்க வேண்டும். உலகில் ஏஐ பெரிதும் தாக்கம் செலுத்துகிறது; ஆனால் செயற்கை நுண்ணறிவு மனித அறிவை மிஞ்ச முடியாது. வாழ்க்கை பயணத்தில் ஆன்மீக உண்மையை உணர்வதே இறுதி நிலை” என தெரிவித்தார்.
அமைச்சர் புறக்கணிப்பு: பல்கலைக்கழக துணைவேந்தர் நியமன விவகாரத்தில் தமிழக அரசு மற்றும் ஆளுநர் ரவிக்கும் இடையே முரண்கள் நிலவி வருகின்றன. இதனால், கடந்த சில ஆண்டுகளாக மாநில பல்கலைக்கழக பட்டமளிப்பு விழாக்களில் இணைவேந்தரான உயர்கல்வித் துறை அமைச்சர்கள் புறக்கணிப்பு செய்துவருகின்றனர். நேற்று நடைபெற்ற திறந்தநிலை பல்கலைக்கழக பட்டமளிப்பு விழாவிலும் தற்போதைய உயர்கல்வித் துறை அமைச்சர் கோவி. செழியன் புறக்கணித்தார்.
இந்த விழாவில் கோவையைச் சேர்ந்த கேபிஆர் மில் லிமிடெட் நிறுவன சார்பில் 610 தொழிலாளர்கள் பட்டம் பெற்றனர்; இதில் 17 பேர் பதக்கங்களை வென்றனர் என்பது குறிப்பிடத்தக்கது.
