கரூர் நெரிசல் சம்பவம்: சிபிஐ விசாரணை கோரும் தவெக, உயர் நீதிமன்ற மதுரை அமர்வில் இன்று விசாரணை
கரூரில் நடந்த தவெக தலைவர் விஜய் பிரச்சார கூட்டத்தில் நெரிசலில் சிக்கி 40 பேர் உயிரிழந்த சம்பவம், விபத்துபோல் தோன்றவில்லை; திட்டமிட்ட சதிபோலவே ஏற்பட்டதாக தவெகவினர் கூறியுள்ளனர். இதுபற்றி சிபிஐ அல்லது சிறப்பு புலனாய்வு குழுவை வைத்து விசாரணை நடத்த வேண்டும் என்றும், கண்காணிப்பு கேமரா காட்சிகளை பாதுகாக்க உத்தரவிட வேண்டும் என்றும் மனு தாக்கியுள்ளனர்.
உயர் நீதிமன்ற விடுமுறைக்கால நீதிபதியான தண்டபாணியை சென்னையில் அவரது இல்லத்தில் தவெக வழக்கறிஞர் அணியினர் சந்தித்தனர். வழக்கறிஞர்கள் அறிவழகன் மற்றும் இணை பொதுச் செயலாளர் சி.டி.ஆர். நிர்மல்குமார், “பிரச்சாரம் நடக்கும் போது திடீரென கற்கள் வீசப்பட்டன. போலீஸார் நடவடிக்கை எடுத்தனர். இதுதொடர்பாக சிபிஐ விசாரணை நடத்த வேண்டும்” என்று நீதிபதியிடம் கூறினர்.
நீதிபதி தண்டபாணி, “கரூர் சம்பவம் மதுரை உயர் நீதிமன்ற எல்லைக்குள் வருகிறது. மனு மதுரை அமர்வில் தாக்கல் செய்யப்பட வேண்டும். மனு தாக்கல் செய்தால் இன்று (செப்.29) பிற்பகல் 2.15 மணிக்கு விசாரணை நடத்தப்படும்” என அறிவித்தார். தவெக சார்பில் மனு இன்று காலை தாக்கல் செய்யப்படும்; அதன்பின்னர் மதியம் விசாரணைக்கு எடுத்துக் கொள்ளப்படுகிறது.
இதற்கிடையே, கரூரைச் சேர்ந்த செந்தில்கண்ணன் சார்பில் மூத்த வழக்கறிஞர் சங்கரன், “கரூர் சம்பவத்தை முழுமையாக விசாரித்து யார் பொறுப்பு என்பதை உறுதி செய்யும்வரை தவெக பொதுக்கூட்டம், ஊர்வலம் நடத்த தடை விதிக்க வேண்டும்” என்று மனு தாக்கியிருந்தார். நீதிபதி, மனு தாக்கல் செய்யப்படாததால், நேற்று மாலை விசாரணை நடைபெறவில்லை.
அதேபோல், சென்னை மாநகராட்சி பாஜக கவுன்சிலர் உமா ஆனந்தன் சார்பில் வழக்கறிஞர் வெங்கட்ராமன், “கரூர் சம்பவம் குறித்து சிபிஐ விசாரணை நடத்த உத்தரவிட வேண்டும்” என நீதிபதி செந்தில்குமாரிடம் முறையிட்டார். பொதுநல வழக்காக இருப்பதால் நீதிபதி தனியாக விசாரிக்க இயலாது என்றும், வழக்கை விசாரணைக்காக மாற்ற வேண்டும் என்றும் கூறினார்.
