உலகை ஈர்க்கும் மாநிலம் தமிழகம்; தொழில் துறையில் இரட்டை இலக்க வளர்ச்சி — முதல்வர் ஸ்டாலின் பெருமிதம்

சென்னையில் வான்வெளி மற்றும் பாதுகாப்புத் துறைக்கான சர்வதேச மாநாட்டை தொடங்கி வைத்த முதல்வர் மு.க.ஸ்டாலின், “தமிழகம் இன்று உலகை ஈர்க்கும் மாநிலமாக உயர்ந்துள்ளது” என்று கூறியார்.

சென்னையில் டிட்கோ, பிசிஐ ஏரோஸ்பேஸ் (பிரான்ஸ்) மற்றும் தமிழ்நாடு ஏரோஸ்பேஸ் தொழில் வளர்ச்சி கூட்டமைப்பு இணைந்து நடத்தும் ஏரோ-டெஃப்-கான் 25 (AeroDefCon 2025) என்ற மூன்று நாள் சர்வதேச மாநாட்டை முதல்வர் தொடங்கி வைத்தார். இதில் 19 நாடுகள் மற்றும் 300 நிறுவனங்கள் பங்கேற்றுள்ளன.

மாநாட்டில் தொழில்துறை, கல்வி மற்றும் ஆராய்ச்சி நிறுவனங்களுக்கிடையே 5,000-க்கும் மேற்பட்ட வணிக சந்திப்பு கூட்டங்கள் நடைபெறுகின்றன. முன்னணி நிறுவனங்கள், நடுத்தர ரக நிறுவனங்கள் மற்றும் பாதுகாப்பு பொதுத்துறை நிறுவனங்கள் தங்கள் அரங்குகளை அமைத்துள்ளன.

முதல்வர் ஸ்டாலின் பேசியதாவது:

“தமிழகத்தில் முதன்முறையாக வான்வெளி மற்றும் பாதுகாப்புத் தொழில்துறை சார்ந்த நிறுவனங்களுக்கான இந்த மாநாட்டை தொடங்கி வைத்தோம். தமிழகம் இன்று உலகளவில் பேசப்படும் மாநிலமாக உயர்ந்துள்ளது. இந்த மாநாடுகள் புதிய தொழில்நிறுவனங்கள் மற்றும் உற்பத்தியாளர்களுக்கு ஒப்பந்தங்களை உருவாக்குவதற்கான தளம்.

தமிழகம் உற்பத்தித் துறையில் முன்னணி நிலையை அடைந்து வருகிறது. பாதுகாப்புத் தொழில்துறை வழித்தடத்தில் ஜெட் இன்ஜின் பாகங்கள் முதல் டிரோன்கள் உற்பத்தி வரை செயல்படும். இதுவரை ரூ.23 ஆயிரம் கோடி முதலீடுகள் ஈர்க்கப்பட்டுள்ளன. இதில் ரூ.5 ஆயிரம் கோடி மதிப்பிலான திட்டங்கள் ஏற்கெனவே செயல்பட்டுள்ளன. 2032-க்குள் ரூ.75 ஆயிரம் கோடி முதலீட்டை ஈர்ப்பதே இலக்கு. ஒவ்வொரு நகரமும் தனித்துவ மையமாக செயல்படும்.”

மாநாட்டில் 19-க்கும் மேற்பட்ட நாடுகளுடன் தொழில் வளர்ச்சி மற்றும் ஏற்றுமதிக்கான ஒத்துழைப்பு மேற்கொள்ளப்படும். வானூர்தி, விண்வெளி, கப்பல் உற்பத்தி மற்றும் பாதுகாப்புத் துறைகளில் புதுமைகள் நிறைந்த, இந்தியாவையும் உலக அமைதியையும் முன்னெடுக்கும் தொழில்முனைவோர் மற்றும் முதலீட்டாளர்களுக்கு தமிழக அரசு எப்போதும் ஆதரவு தரும் என்று முதல்வர் கூறினார்.

தொழில் துறை அமைச்சர் டி.ஆர்.பி. ராஜா:

“தமிழ்நாடு பாதுகாப்புத் தொழில்துறை வழித்தடத்தில் சர்வதேச நிறுவனங்கள் முதலீடு செய்து இணைந்து செயல்படும். தொழில் வளர்ச்சிக் கழகம் மூலம் பாதுகாப்பு, சோதனை மற்றும் ஒருங்கிணைப்பு மையங்கள் அமைக்கப்படும். புதிய தொழில்துறை பூங்காக்கள் உருவாக்கப்படுவதுடன், அடுத்ததாக 2027-ல் நடைபெறும் மாநாடு இன்னும் விரிவாக நடைபெறும்” என்று தெரிவித்தார்.

மாநாட்டில் அமைச்சர் தா.மோ. அன்பரசன், டி.ஆர். பாலு எம்.பி., இ. கருணாநிதி எம்.எல்.ஏ., கடலோர காவல்படையின் தலைமை இயக்குநர் பரமேஷ் சிவமணி, பாதுகாப்பு ஆராய்ச்சி மற்றும் மேம்பாட்டு அமைப்பின் விஞ்ஞானி பி.கே. தாஸ், தொழில் துறை செயலாளர் வி.அருண் ராய், தொழில் வழிகாட்டி நிறுவன மேலாண்மை இயக்குநர் தாரேஷ் அகமது, டிட்கோ மேலாண்மை இயக்குநர் சந்தீப் நந்தூரி, பிசிஐ ஏரோஸ்பேஸ் முதன்மை செயல் அலுவலர் ஸ்டீபன் காஸ்டெட் மற்றும் உயர் அலுவலர்கள் பங்கேற்றனர்.