இஸ்ரேல் ராணுவத்தால் கொல்லப்பட்ட 89 பாலஸ்தீனியர்களின் உடல்கள் வரிசை எண் போடப்பட்ட பிளாஸ்டிக் பைகளில் வைக்கப்பட்டதாக தகவல் வெளியாகியுள்ளது.
காஸா பகுதியில் செயல்பட்டு வரும் ஹமாஸ் ஆயுதக் குழு கடந்த ஆண்டு அக்டோபர் மாதம் 7ம் தேதி இஸ்ரேலுக்குள் நுழைந்து தீவிரவாத தாக்குதல் நடத்தியது. இந்த தாக்குதலில் சுமார் 1,139 இஸ்ரேலியர்கள் கொல்லப்பட்டனர். மேலும், ஹமாஸ் இஸ்ரேலில் இருந்து 251 பேரை பணயக்கைதிகளாக காசானுக்கு கடத்தியது.
அப்போது ஹமாஸ் மீது இஸ்ரேல் போரை அறிவித்தது. ஒப்பந்தத்தின் அடிப்படையில் இதுவரை 100க்கும் மேற்பட்ட பணயக்கைதிகளை இஸ்ரேல் மீட்டுள்ளது. ஹமாஸ் அமைப்பை முற்றிலுமாக அழிக்கும் நோக்கில் காசாவின் பல்வேறு பகுதிகளில் இஸ்ரேல் ராணுவம் தொடர் தாக்குதல் நடத்தி வருகிறது. இந்த தாக்குதல்களில் இதுவரை 37,000 பாலஸ்தீனியர்கள் உயிரிழந்துள்ளனர்.
இந்நிலையில், காஸா பகுதியில் இஸ்ரேல் ராணுவத்தால் கொல்லப்பட்ட 89 பாலஸ்தீனியர்களின் உடல்களை இஸ்ரேல் திருப்பி அனுப்பியுள்ளதாக காசா அரசின் ஊடக அலுவலகம் இன்று செய்தி வெளியிட்டுள்ளது. பெயர் தெரியாத நிலையில் பேசிய பாலஸ்தீனிய பாதுகாப்பு வட்டாரங்கள், முன்னர் இஸ்ரேலிய வசம் இருந்த உடல்கள், தெற்கு காசா பகுதியில் உள்ள கெரெம் ஷாலோம் வழியாக சர்வதேச செஞ்சிலுவை சங்கத்தால் வழங்கப்பட்டதாக தெரிவித்தனர். உடல்கள் வரிசை எண்களுடன் பிளாஸ்டிக் பைகளில் வைக்கப்பட்டிருந்தன, ஆனால் உடல்களின் தோற்றம் அல்லது அவர்கள் கொல்லப்பட்ட இடங்கள் பற்றிய தகவல்கள் எதுவும் தெரிவிக்கப்படவில்லை.
