பிரபல ரவுடி நாகேந்திரன் வரும் 28ம் தேதி வரை நீதிமன்ற காவலில் வைக்கப்பட்டுள்ளார்.
பகுஜன் சமாஜ் கட்சியின் மாநில தலைவர் ஆம்ஸ்ட்ராங் கடந்த மாதம் 5ம் தேதி சென்னை பெரம்பூரில் வெட்டி படுகொலை செய்யப்பட்டார். இந்த வழக்கில் இதுவரை 23 பேர் கைது செய்யப்பட்டு விசாரணைக்குப் பிறகு சிறையில் அடைக்கப்பட்டுள்ளனர். இதில் அந்த ரவுடியை திருவேங்கடம் போலீசார் என்கவுன்டர் செய்தனர்.
இதையடுத்து இந்த வழக்கில் முக்கிய குற்றவாளிகளான பொன்னை பாலு, அருள், ராமு உள்ளிட்டோரிடம் போலீசார் தொடர்ந்து விசாரணை நடத்தி வந்தனர். அதன் அடிப்படையில் தமிழக இளைஞர் காங்கிரஸ் முன்னாள் நிர்வாகியும், வழக்கறிஞருமான அஸ்வத்தாமனை செம்பியம் தனிப்படை போலீஸார் கடந்த 7-ஆம் தேதி கைது செய்தனர்.
அவரை தொடர்ந்து வேலூர் சிறையில் இருந்த பிரபல ரவுடி அஸ்வத்தாமனின் தந்தை நாகேந்திரனை கடந்த 9ம் தேதி போலீசார் கைது செய்தனர். இருவரும் ரவுடி சம்போ செந்திலுடன் சேர்ந்து ஆம்ஸ்ட்ராங்கை கொலை செய்ய சதி செய்தது விசாரணையில் தெரியவந்தது. தற்போது இருவரையும் போலீசார் கைது செய்து விசாரணை நடத்தி வருகின்றனர்.
போலீசார் கேட்ட பெரும்பாலான கேள்விகளுக்கு ரவுடி நாகேந்திரன் மவுனம் காத்ததாகவும், சில கேள்விகளுக்கு மட்டும் ஆம்ஸ்ட்ராங் மரணத்திற்கும் தனக்கும் சம்பந்தம் இல்லை என கூறி மவுனம் காத்ததாகவும் தகவல் வெளியானது. இந்நிலையில், ஆம்ஸ்ட்ராங்கை கொன்றது தனது தந்தைதான் என ரவுடி நாகேந்திரன் மகன் அஸ்வத்தாமன் அதிர்ச்சி வாக்குமூலம் அளித்துள்ளார்.
ஆம்ஸ்ட்ராங் உயிருடன் இருந்தால் கட்ட பஞ்சாயத்து, மாமூல், அரசியல் எதிர்காலம் என எல்லாமே பூஜ்ஜியமாகிவிடும் என்றும், ஆம்ஸ்ட்ராங்கைக் கொல்லச் சொன்னதாகவும் அஸ்வத்தாமன் கூறியுள்ளார். மேலும் ஆம்ஸ்ட்ராங் கொலை வழக்கில் தேடப்பட்டு வரும் சம்போ செந்தில் மற்றும் சீசிங் ராஜா ஆகிய இருவரும் ரவுடி நாகேந்திரனுடன் பல வருடங்களாக தொடர்பில் இருந்ததாகவும் அவர் தெரிவித்துள்ளார். இதையடுத்து, அஸ்வத்தாமனின் தந்தை ரவுடி நாகேந்திரனின் வங்கிக் கணக்கில் கடந்த இரண்டு ஆண்டுகளாக நடந்த பணப் பரிவர்த்தனைகள் குறித்தும் போலீஸார் விசாரணை நடத்தி வருகின்றனர்.
இதனிடையே, அஸ்வதாமன், நாகேந்திரன் ஆகியோரின் 3 நாள் போலீஸ் காவல் இன்றுடன் முடிவடைந்து, அவர்கள் எழும்பூர் நீதிமன்றத்தில் இன்று ஆஜர்படுத்தப்பட்டனர். அப்போது, அஸ்வத்தாமனை 21ம் தேதி வரையும், ரவுடி நாகேந்திரனை 28ம் தேதி வரையும் நீதிமன்ற காவலில் வைக்க எழும்பூர் நீதிமன்றம் உத்தரவிட்டது.
