மக்களிடமிருந்து கோரிக்கைகளை பெற்றுப் பிரச்சனைகளை தீர்ப்பது ஒரு அரசின் அடிப்படை பொறுப்பு. ஆனால், ஒரே நோக்குடன் பல்வேறு பெயர்களை வழங்கி மக்களை வழி தவற வைக்கும் முயற்சியில் திராவிட மாடல் முதல்வர் ஸ்டாலின் மற்றும் அவரது அரசு இருப்பதாக AIADMK பொதுச் செயலாளர் எடப்பாடி பழனிசாமி குற்றம்சாட்டியுள்ளார்.
அவரின் கூற்றுப்படி, கடந்த காலங்களில் MGR, ஜெயலலிதா ஆகிய முன்னாள் முதல்வர்கள் மக்களிடமிருந்து மனுக்களை பெற்றுச் சட்டப்படி நடவடிக்கை எடுத்தனர். ஜெயலலிதா ஆட்சியில் ‘அம்மா திட்டம்’ மூலமாக மாவட்டங்களுக்கு நேரில் சென்று சமூக பாதுகாப்புத் திட்டங்கள் உடனடியாக நிறைவேற்றப்பட்டன. அதேபோல், பழனிசாமி முதலமைச்சராக இருந்தபோது, தனிப்பட்ட குறைதீர்க்கும் திட்டம் மூலம் ஐந்து லட்சத்திற்கும் மேற்பட்ட மனுக்களுக்கு தீர்வு வழங்கப்பட்டது.
ஆனால், ஸ்டாலின் எதிர்க்கட்சித் தலைவராக இருந்தபோது, புகார் பெட்டிகள் வைத்தும் அதன் சாவிகளை இன்றுவரை பயன்படுத்தாமல் விட்டதாக பழனிசாமி விமர்சனம் செய்தார். இப்போது தேர்தல் நெருங்கிவருவதால், ‘மக்களுடன் முதல்வர்’ போன்ற திட்டங்களை பல பெயர்களில் கொண்டு வந்து மீண்டும் மக்கள் கவனத்தை திருப்ப முயல்கிறார் என அவர் குற்றம்சாட்டினார்.
ஸ்டாலின் அரசு, கோரிக்கைகளை பெறும் பெயரில் வெறும் விளம்பர நடவடிக்கைகளையே மேற்கொண்டு வருவதாகவும், மக்கள் இவ்வாறான மோசடிகளைப் புரிந்து கொண்டு 2026 சட்டமன்றத் தேர்தலில் சரியான பதிலடி தர தயாராக உள்ளதாகவும் எடப்பாடி பழனிசாமி தெரிவித்தார்.
