குன்னூர் நகராட்சி கடைகள் இடிக்கப்பட வேண்டாம் – எடப்பாடி பழனிசாமி கண்டனம்
அரசு உடனடியாக குன்னூர் நகராட்சி கடைகளை இடிக்கும் முடிவை திரும்பப் பெறாதவரை, அப்பகுதி மக்களின் ஒத்துழைப்புடன் அதிமுக பெரிய அளவில் போராட்டத்தில் ஈடுபடும் என்று கட்சியின் பொதுச் செயலாளர் எடப்பாடி கே. பழனிசாமி எச்சரிக்கை தெரிவித்துள்ளார்.
இந்தக் கோரிக்கையை வலியுறுத்தி அவர் வெளியிட்டுள்ள அறிக்கையில்,
“2021-ஆம் ஆண்டு திமுக ஆட்சி தொடங்கியவுடன் வீட்டு வரி, வணிக வளாகங்களின் வரி, மின்சாரம் மற்றும் குடிநீர் கட்டணங்களில் பெரிதளவில் உயர்வை செய்து, அதன் பின்னர் ஆண்டுதோறும் 6% வரி உயர்வையும் நடைமுறைப்படுத்தி, தமிழக மக்கள் மற்றும் வியாபாரிகளை சிரமத்திற்கு உள்ளாக்கியுள்ளது,” என்றார்.
அதேபோல், மாநகராட்சி மற்றும் நகராட்சிகளுக்குச் சொந்தமான கடைகளின் வாடகைகளும் அதிகரிக்கப்பட்டுள்ளதாக குற்றம்சாட்டினார்.
குன்னூர் மார்க்கெட் பகுதியில் உள்ள 800 நகராட்சி கடைகள் குறித்து, கடந்த சட்டமன்றத் தேர்தல் காலத்தில் தற்போதைய முதலமைச்சர் ஸ்டாலின், வாடகை உயர்த்தப்படாது என வாக்குறுதி வழங்கியதாகவும், ஆனால் அது நடைமுறைப்படுத்தப்படவில்லை என்றும் அவர் தெரிவித்தார்.
இப்போது வாடகை உயர்வு மட்டுமின்றி, கடைகளையே இடிக்கவேண்டும் என வியாபாரிகளுக்கு நோட்டீஸ் வழங்கி, நகராட்சி அதிகாரிகள் அவர்களை கடைகளை காலி செய்ய வற்புறுத்தி வருவதாகவும் எடப்பாடி பழனிசாமி குற்றம்சாட்டினார்.
மாற்று இடமாக வழங்கப்பட்ட இடம் மக்கள் ஓட்டமில்லாத பகுதியாகவும், எந்தவொரு அடிப்படை வசதிகளும் இல்லாத நிலையில் இருப்பதாகவும் அவர் விமர்சித்தார்.
சுற்றுலா சீசன் (ஏப்ரல்–ஜூலை மற்றும் அக்டோபர்–டிசம்பர்) மாதங்களில் மட்டுமே வியாபாரம் நடைபெறும் குன்னூரில், தற்போதைய நிலை வியாபாரிகளை மிகுந்த சிரமத்திற்கு உள்ளாக்கியுள்ளது. இதனால் 800 கடை உரிமையாளர்களின் குடும்பங்கள், மற்றும் 2000-க்கும் மேற்பட்ட பணியாளர்களின் வாழ்வாதாரமும் கேள்விக்குள்ளாகும் என்றார்.
இதனால், இந்த நடவடிக்கையை வியாபாரிகள் கடுமையாக எதிர்க்கிறார்கள் என்றும், அரசு தனது முடிவை திரும்பப் பெற வேண்டும் என்றும் எச்சரித்துள்ளார்.
“இல்லையெனில், அந்த பகுதியில் வாழும் மக்களின் ஆதரவுடன் அதிமுக பெரும் எதிர்ப்பு இயக்கத்தை முன்னெடுக்கும்” என அவர் வலியுறுத்தியுள்ளார்.
