ஜம்மு-காஷ்மீரில் பயங்கரவாத தாக்குதல்: 2 தமிழர்கள் காயம் – சிகிச்சையில் உள்ளனர்
ஜம்மு-காஷ்மீர் மாநிலத்தின் பஹல்காம் பகுதியில் நிகழ்ந்த பயங்கரவாத தாக்குதல் நாட்டை பெரும் அதிர்வில் ஆழ்த்தியுள்ளது. சுற்றுலா பயணிகளை குறிவைத்து நடைபெற்ற இந்த திடீர் தாக்குதலில் 26 பேர் சம்பவ இடத்திலேயே உயிரிழந்தனர். அதேபோன்று, ஏராளமானோர் பலத்த காயங்களுடன் மருத்துவமனையில் அனுமதிக்கப்பட்டுள்ளனர்.
இந்த பயங்கர தாக்குதலில் தமிழ்நாட்டைச் சேர்ந்த இருவர் காயமடைந்துள்ளனர் என்பது வருத்தமளிக்கிறது. காயமடைந்தவர்களில் ஒருவர் பரமேஸ்வர் (வயது 31) ஆவார். இவர் வயிற்றுப் பகுதியில் பலத்த காயம் பெற்ற நிலையில், தற்போது பஹல்காம் மருத்துவமனையில் சிகிச்சை பெற்று வருகிறார். மருத்துவர்கள் இவரின் நிலையை கவனமாக கண்காணித்து வருகின்றனர்.
மற்றொருவர் சாண்டானோ என்பவருக்கு தாக்குதலால் ஏற்பட்ட மனஅழுத்தம் மற்றும் அதிர்ச்சியால் சுயநினைவை இழந்த நிலை ஏற்பட்டுள்ளது. தற்போது அவர் ஜம்மு மருத்துவமனையில் தீவிர சிகிச்சைப் பிரிவில் அனுமதிக்கபட்டு இருக்கிறார். அவரும் தொடர்ந்து மருத்துவ குழுவின் கண்காணிப்பில் உள்ளார்.
இந்த இருவருடன் சேர்ந்து மொத்தம் 6 பேர் மருத்துவ கண்காணிப்பில் உள்ளதாக அதிகாரப்பூர்வமாக தகவல் வெளியாகியுள்ளது. இதுவரை தமிழக அரசின் தரப்பில் உடனடி உதவி மற்றும் தொடர்பு நடவடிக்கைகள் மேற்கொள்ளப்பட்டுள்ளன.
இந்த தாக்குதலின் பின்னணி தொடர்பாக பாதுகாப்பு படையினர் தீவிர விசாரணை மேற்கொண்டு வருகின்றனர். மேலும், பாதிக்கப்பட்டவர்களுக்கு தேவையான சிகிச்சை, பாதுகாப்பு, வழிகாட்டல் ஆகியவற்றை இந்திய அரசு முழுமையாக வழங்கும் எனவும் அறிவிக்கப்பட்டுள்ளது.
இந்த தாக்குதல், நாட்டின் பாதுகாப்பை மீண்டும் ஒரு முறை கேள்விக்குள்ளாக்கியதுடன், சுற்றுலா பயணிகளின் பாதுகாப்பு மீதான நம்பிக்கைக்கும் தாக்கம் ஏற்படுத்தியுள்ளது.
இக்கட்டான சூழ்நிலையில் காயமடைந்தவர்களுக்கு விரைவில் நலம் பெற எல்லாம் வல்ல இறைவனை பிரார்த்திப்போம். தமிழக அரசு மற்றும் மத்திய அரசு விரைந்து நடவடிக்கை எடுத்து அவர்களின் குடும்பங்களுக்கு உறுதுணையாக இருக்க வேண்டும் என்பது அனைவரதும் எதிர்பார்ப்பாகும்.
