பாதுகாப்பு ஒத்திகை ஆலோசனை: இந்தியா–பாகிஸ்தான் போர் பதற்றத்தை எதிர்கொள்ளும் தேசிய முயற்சி
இந்தியாவில் சமீபத்தில் நடைபெற்ற பஹல்காம் பயங்கரவாத தாக்குதல் நாடெங்கும் அதிர்வலைகளை ஏற்படுத்தியுள்ளது. ஜம்மு-காஷ்மீரின் பஹல்காம் பகுதியில் நடைபெற்ற இந்த கொடூரமான தாக்குதலில் 26 அப்பாவி பொதுமக்கள் உயிரிழந்தனர். இந்த நிகழ்வுக்குப் பிறகு, இந்தியா – பாகிஸ்தான் இடையே நிலவும் உறவுகள் மிகவும் பதற்றமான நிலைக்கு சென்றுள்ளன. இந்நிலையில், நாட்டின் உள்நாட்டு பாதுகாப்பையும், மக்களின் நலனையும் உறுதி செய்யும் நோக்கத்தில் மத்திய உள்துறை அமைச்சகம் முக்கிய நடவடிக்கைகளை மேற்கொண்டு வருகிறது.
மத்திய உள்துறை செயலாளர் தலைமையில் டெல்லியில் நடைபெற்ற முக்கியமான பாதுகாப்பு ஆலோசனைக் கூட்டம், தற்போதைய சூழ்நிலையில் நாட்டின் பாதுகாப்பை உறுதி செய்யும் வகையில் மிக முக்கியமான ஒரு நடவடிக்கையாகும். இந்த கூட்டத்தில் அனைத்து மாநில தலைமைச் செயலாளர்கள், குடிமைப் பாதுகாப்பு இயக்குநரகத் தலைவர்கள், தேசிய பேரிடர் மீட்பு ஆணையத்தினர் மற்றும் பல மாவட்ட ஆட்சியர்கள் காணொளி தொடர்பு வாயிலாகக் கலந்துகொண்டனர். இதில் மாநிலங்களில் ஒருங்கிணைந்த பாதுகாப்பு ஒத்திகைகளை எவ்வாறு செயல்படுத்துவது, அவை எந்த அளவுக்கு பயனுள்ளதாக இருக்கும், மற்றும் மக்களின் உணர்வுகளை எவ்வாறு கவனத்தில் எடுப்பது போன்ற விடயங்கள் விரிவாக விவாதிக்கப்பட்டன.
பாதுகாப்பு சூழ்நிலை மிகவும் நுணுக்கமானதாக உள்ளதால், பிரதமர் நரேந்திர மோடியும் நேரடியாகத் தலையிட்டு முக்கிய ஆலோசனைகளை மேற்கொண்டு வருகிறார். பிரதமரின் இல்லத்தில் தேசிய பாதுகாப்பு ஆலோசகர் அஜித் தோவலுடன் நடைபெற்ற இரண்டாவது சந்திப்பு, நாட்டின் பாதுகாப்பு நிலைமையைப் பற்றிய பிரதமரின் ஆழ்ந்த அக்கறையை வெளிப்படுத்துகிறது. இந்த சந்திப்பில் எல்லை நிலவரம், உள்நாட்டு பாதுகாப்பு சூழ்நிலை மற்றும் எதிர்கால நடவடிக்கைகள் குறித்து விரிவாக ஆலோசிக்கப்பட்டது.
மேலும், விமானப்படை தளபதி ஏர் சீஃப் மார்ஷல் ஏ.பி.சிங் மற்றும் பாதுகாப்பு செயலாளருடனும் பிரதமர் மோடி தனித்தனியாக சந்தித்து முக்கிய ஆலோசனைகளை மேற்கொண்டிருந்தார். இது, முப்படைகளும் தேவையான பதிலடி நடவடிக்கைகளுக்கு தயாராகி வருகிறதை உறுதி செய்கிறது.
இந்த சந்தர்ப்பத்தில், பாதுகாப்பு ஒத்திகைகள் மாநில அளவில் மட்டும் அல்லாது, தேசிய அளவிலும் ஒருங்கிணைந்து நடை பெறும் என்பது குறிப்பிடத்தக்கது. மக்கள் பீதி அடையாமல், அரசின் பாதுகாப்பு உறுதிகள் மீது நம்பிக்கை வைத்து இயல்பு வாழ்க்கையை தொடர்வது இந்த ஒத்திகைகளின் முக்கிய நோக்கமாகும்.
