டெல்லி அரசுப் பள்ளிகளில் வகுப்பறைகள் கட்டுமானத்தில் ரூ.2 ஆயிரம் கோடி அளவிற்கு ஊழல் நடந்ததாக கூறப்படும் புகாருக்கு தொடர்பான விசாரணையை மேற்கொள்வதற்காக, ஆம் ஆத்மி கட்சியின் தலைவர்கள் மணீஷ் சிசோடியா மற்றும் சத்யேந்தர் ஜெயினுக்கு டெல்லி அரசின் ஊழல் தடுப்பு பிரிவு (ACB) சம்மன் அனுப்பியதாக அதிகாரி ஒருவர் தெரிவித்தார்.
முன்னைய ஆம் ஆத்மி ஆட்சிக்காலத்தில், டெல்லியின் அரசுப் பள்ளிகளில் 12,000-க்கும் மேற்பட்ட வகுப்பறைகள் மற்றும் அரை நிரந்தர கட்டடங்களை அமைப்பதற்காக ஒதுக்கப்பட்ட நிதியில் ரூ.2,000 கோடி அளவுக்கு மோசடிகள் நடந்ததாக குற்றச்சாட்டு எழுந்தது. இதனடிப்படையில், கடந்த ஏப்ரல் 30ஆம் தேதி ACB வழக்கு பதிவு செய்தது.
இந்த வழக்கின் ஒரு பகுதியாகவே, முன்னாள் கல்வி அமைச்சர் மணீஷ் சிசோடியா மற்றும் பொதுப்பணித்துறை அமைச்சர் சத்யேந்தர் ஜெயினுக்கு சம்மன் அனுப்பப்பட்டுள்ளது என ஊழல் தடுப்புப் பிரிவின் இணை ஆணையர் மதுர் வர்மா கூறினார். மேலும், மத்திய ஊழல் கண்காணிப்பு ஆணையம் (CVC) வைத்த குற்றச்சாட்டுகளின் அடிப்படையில் விசாரணை நடைபெறும் என்றும் அவர் தெரிவித்தார்.
CVC-வின் தலைமை தொழில்நுட்ப ஆய்வாளர் வழங்கிய அறிக்கையில் கட்டுமானத்தில் பல்வேறு முறைகேடுகள் இருப்பது குறித்த தகவல்கள் இடம்பெற்றுள்ளன. இவ்விவரங்கள் கடந்த 3 ஆண்டுகளாக கவனிக்கப்படவில்லை. தற்போது அனுப்பப்பட்டுள்ள சம்மனில், சத்யேந்தர் ஜெயின் ஜூன் 6ஆம் தேதி மற்றும் மணீஷ் சிசோடியா ஜூன் 9ஆம் தேதி விசாரணைக்கு ஆஜராகுமாறு அறிவிக்கப்பட்டுள்ளது.
ஊழல் தடுப்பு சட்டத்தின் பிரிவு 17-A-ன் கீழ் உரிய அதிகாரிகளிடம் இருந்து அனுமதி பெற்ற பின் முதல்தகவல் அறிக்கை பதிவு செய்யப்பட்டது என்றும் மதுர் வர்மா கூறினார்.
2019 ஆம் ஆண்டு, பாஜக தலைவர்கள் கபில் மிஸ்ரா, ஹரிஷ் குரானா மற்றும் நீல்காந்த் பக்ஷி ஆகியோர், வகுப்பறை கட்டுமானத்தில் மோசடி நடைபெற்றதாக ACB-யில் புகார் அளித்தனர். அவர்களின் புகாரில், ஒரு வகுப்பறைக்கு சராசரியாக ரூ.24.86 லட்சம் செலவு என குறிப்பிடப்பட்டிருந்தாலும், இதுபோன்ற கட்டிடங்களை உருவாக்க ரூ.5 லட்சம் போதுமானது என பொறியாளர் மதிப்பீட்டில் தெரிவிக்கப்பட்டது.
தற்போது இந்த புகாருக்கு தொடர்ந்தும் விசாரணை நடைபெற்று வருகிறது. அதன் முடிவுகளை அடிப்படையாகக் கொண்டு அடுத்த நடவடிக்கைகள் எடுக்கப்படும் என அதிகாரிகள் கூறியுள்ளனர்.
