நடிகை பார்வதி திருவோத்து, ஹேமா கமிட்டி அறிக்கை சமர்ப்பிக்கப்பட்டு ஐந்து ஆண்டுகள் கடந்தும் எந்தவிதமான நடவடிக்கையும் எடுக்கப்படாததை குறித்து கேரள அரசுக்கு எதிராக கேள்வி எழுப்பியுள்ளார்.
2017ஆம் ஆண்டில் ஒரு மலையாள நடிகை பாலியல் வன்கொடுமைக்கு உள்ளானதை அடுத்து, திரையுலக பெண்களின் பாதுகாப்பிற்காக ‘விமன் இன் சினிமா கலெக்டிவ்’ (WCC) எனும் அமைப்பு உருவாக்கப்பட்டது. இந்த அமைப்பின் கோரிக்கையை தொடர்ந்து, திரைத் துறையில் பெண்கள் எதிர்கொள்ளும் பாலியல் பிரச்சனைகள் குறித்து ஆய்வு செய்ய, ஹேமா கமிட்டி உருவாக்கப்பட்டது.
இந்தக் கமிட்டி அறிக்கையை வழங்கியதற்கு பிறகு ஐந்து ஆண்டுகள் கடந்தும் எந்த செயலும் இல்லாதது குறித்து, பார்வதி கேள்வி எழுப்பியுள்ளார்.
தனது இன்ஸ்டாகிராம் ஸ்டோரியில், கேரள முதல்வர் பினராயி விஜயனைக் குறிப்பிடுவதன் மூலம், பார்வதி, “இப்போது ஹேமா கமிட்டி ஏன் உருவாக்கப்பட்டது என்பதை நம்மால் புரிந்து கொள்ள முடியுமா? திரைத் துறையில் ஒழுங்குகளை உருவாக்கும் விதிகளில் எப்போது நடவடிக்கை எடுக்கப்படும்? அறிக்கை சமர்ப்பிக்கப்பட்டு ஐந்து வருடத்திற்கும் மேல்தான் ஆகியிருக்கிறது – அவசரப்படத் தேவையில்லை போல?” என்று வெளிப்படையாக விமர்சித்துள்ளார்.
ஹேமா கமிட்டி தொடர்பான விசாரணைகளை நடத்தும் சிறப்பு புலனாய்வுக் குழு தனது வேலைகளை நிறைவு செய்ய தயாராகி வருவதாக தகவல்கள் வெளியாகியதை அடுத்தே, பார்வதி இந்தக் கருத்தை வெளியிட்டதாக தெரிவிக்கப்படுகிறது.
