AthibAn Tv | Live News

“தவெகவை கூட்டணிக்குள் இழுக்க இபிஎஸ் செய்வது குள்ளநரித்தனம்” – டிடிவி தினகரன் கடும் தாக்கு

அமமுக பொதுச் செயலாளர் டிடிவி தினகரன், “கரூர் துயரச் சம்பவத்தில் தவெக தொண்டர்கள் துயரத்தில் இருக்கும் நிலையில், அவர்களை கூட்டணிக்குள் இழுக்கும் வகையில் செயல்படுவது எடப்பாடி பழனிசாமியின் குள்ளநரித்தனம்” என கடுமையாக விமர்சித்துள்ளார்.

தருமபுரி மாவட்ட அமமுக நிர்வாகிகள் ஆலோசனைக் கூட்டம் இன்று அரூரில் நடைபெற்றது. அதில் பங்கேற்ற டிடிவி தினகரன், அரூர் சட்டமன்ற (தனி) தொகுதிக்கான அமமுக வேட்பாளராக முன்னாள் எம்எல்ஏ ஆர்.ஆர். முருகனை அறிவித்தார்.

அதற்கு முன் செய்தியாளர்களிடம் பேசிய அவர் கூறியதாவது:

“அமமுகவை தவிர்த்து யாராலும் ஆட்சி அமைக்க முடியாது என்ற அரசியல் நிலை தற்போது உருவாகியுள்ளது. 2026-ஆம் ஆண்டு நடைபெறும் தேர்தலில் அமமுக அமைக்கும் கூட்டணிதான் வெற்றி கூட்டணியாக இருக்கும். எங்கள் கூட்டணிதான் ஆட்சி அமைக்கும்.

எந்த கூட்டணியிலும் இருந்தாலும், அரூர் தொகுதியில் ஆர்.ஆர். முருகன் தான் எங்கள் வேட்பாளர். சோளிங்கர் உள்ளிட்ட சில தொகுதிகளில் ஏற்கெனவே வேட்பாளர்கள் அறிவிக்கப்பட்டுள்ளனர்.

நாங்கள் தற்போதைக்கு யாரோடும் கூட்டணியில் சேரும் முயற்சியில் இல்லை. 2017-ல் ஆர்.கே.நகர் இடைத்தேர்தலில் தனியாக போட்டியிட்டு வெற்றி பெற்றோம். 2021-இல் வெற்றி பெறவில்லை என்றாலும், துரோகம் செய்த பழனிசாமியை மீண்டும் ஆட்சிக்கு வரவிடாமல் தடுத்தோம்.

துரோகம் செய்து வெற்றி பெற முடியாது என்பதற்கான அரசியல் பாடத்தை வரவிருக்கும் தேர்தலில் எடப்பாடி தலைமையிலான திமுக (எடிஎம்கே) கற்றுக்கொள்ளும்.

பழனிசாமி தற்போது விரக்தியில் தரம் தாழ்ந்து பேசுகிறார். தனது கூட்டங்களில் பிற கட்சியின் கொடியை காட்டி ஏமாற்றுகிறார். கரூர் துயரச் சம்பவத்தில் தமிழகமே துயரத்தில் இருக்கும் நிலையில், தவெக தொண்டர்களை குள்ளநரித்தனமாக கூட்டணிக்குள் இழுக்கும் முயற்சி துரோகத்தின் உச்சம்.

பழனிசாமியின் தலைமையில் கட்சி நாளுக்கு நாள் பலவீனமடைந்து வருகிறது. 2024 நாடாளுமன்றத் தேர்தலில் பாஜகக்கு எதிராக பேசி, மோடிக்கு துரோகம் செய்தவர் இப்போது பச்சோந்தியாக பாஜக கூட்டணியில் இணைந்துள்ளார். இதை அந்த கூட்டணியில் உள்ள பிற கட்சிகள் கூட விரும்பவில்லை.

தவெக கட்சி இன்னும் புதியது. அவர்கள் கொடுமையான விபத்து காரணமாக அதிர்ச்சியில் உள்ளனர். கரூர் சம்பவம் ஒரு விபத்து தான் — அதற்கு விஜய் தார்மிக பொறுப்பு ஏற்கலாம்; ஆனால் குற்றம் சாட்டப்படக்கூடாது.

பாஜக தலைவர் நயினார் நாகேந்திரன் தமிழகம் முழுவதும் பிரச்சாரப் பயணத்தைத் தொடங்குகிறார். முதல்வர் வேட்பாளராக பழனிசாமியைத் தோளில் வைத்துக் கொண்டு செல்கிறார். அவரின் பயணம் வெற்றியடையட்டும்,” என டிடிவி தினகரன் தெரிவித்துள்ளார்.

பிக்பாஸ் நிகழ்ச்சிக்கு தடை விதிக்க தமிழக அரசுக்கு தவாக வலியுறுத்தல்

தமிழக வாழ்வுரிமை கட்சியின் தலைவர் மற்றும் எம்.எல்.ஏ. வேல்முருகன், விஜய் டிவியில் ஒளிபரப்பாகும் பிக்பாஸ் நிகழ்ச்சியை தமிழக அரசு உடனடியாக தடை செய்ய வேண்டும் என்று வலியுறுத்தியுள்ளார்.

இது குறித்து இன்று வெளியிட்ட அறிக்கையில் அவர் கூறியதாவது:

“தமிழர் பண்பாடு என்பது நெஞ்சில் நாணம், வாழ்வில் ஒழுக்கம், நாவிலே நெறி என பல்லாண்டுகளாக வளர்ந்து வந்த ஒரு நாகரிகச் செல்வம். அந்த செல்வத்தை பொழுதுபோக்கு என்ற பெயரில் அழிக்க முயல்கிறது பிக்பாஸ் எனும் வணிக நிகழ்ச்சி.

தமிழர் மரபையும் மதிப்பையும் கேலி செய்யும் அளவுக்கு சென்றுவிட்ட இந்த நிகழ்ச்சி உடனடியாக தடுக்கப்பட வேண்டும். பிக்பாஸ் நிகழ்ச்சியின் தினசரி அத்தியாயங்கள் சண்டை, குரோதம், ஆபாசம், பொய், துரோகம் போன்ற எதிர்மறை உணர்ச்சிகளால் நிரம்பியுள்ளன. இவை எதுவும் தமிழர் பாரம்பரியத்தின் பிரதிநிதிகளாகாது.

தமிழர் குடும்பம் அன்பு, அரவணைப்பு, விட்டுக்கொடுத்தல் போன்ற பண்புகளை மையமாகக் கொண்டது. ஆனால் பிக்பாஸ் நிகழ்ச்சி இளைஞர்களிடம் வெறுப்பு, வன்முறை, தனிமனித மோதல்கள் போன்ற தீய எண்ணங்களை ஊட்டுகிறது. இது குடும்ப நல்லிணக்கத்திற்கும் சமூக ஒழுக்கத்திற்கும் எதிரானது.

பிக்பாஸ் நிகழ்ச்சி தமிழகத்திலேயே அல்லாமல் இந்தியாவின் பல மாநிலங்களிலும் சட்டம், ஒழுங்கு மற்றும் சமூக பிரச்சினைகளை உருவாக்கியுள்ளது. இது ஒரு வணிக நோக்கில் செயல்படும் கார்ப்பரேட் நிகழ்ச்சி. மக்கள் விழித்துணர்ந்து இதனை நிராகரிக்க வேண்டும்.

எதிர்காலத் தலைமுறையின் மனநிலையை மாசுபடுத்தும் இந்த நிகழ்ச்சி கல்வி, ஆரோக்கியம், சமூக ஒழுக்கம் ஆகியவற்றுக்கு எதிரான ஊடகத் தாக்குதலாக உள்ளது. எனவே, தமிழ் மரபையும் எதிர்கால சந்ததியையும் காக்கும் கடமையின் அடிப்படையில் தமிழக அரசு உடனடியாக பிக்பாஸ் நிகழ்ச்சியைத் தடை செய்ய வேண்டும்.”

இவ்வாறு வேல்முருகன் தனது அறிக்கையில் தெரிவித்துள்ளார்.

திருமாவளவனின் பாதுகாப்பை அதிகரிக்க தமிழக அரசுக்கு கமல்ஹாசன் எம்.பி வலியுறுத்தல்

“திருமாவளவனின் சந்தேகம் நியாயமானது. அவர் சென்ற கார் வழிமறிக்கப்பட்ட விவகாரம் குறித்து காவல் துறை விசாரணையை விரைவுபடுத்த வேண்டும்” என மக்கள் நீதி மய்யம் தலைவர் மற்றும் நாடாளுமன்ற உறுப்பினர் கமல்ஹாசன் தெரிவித்துள்ளார்.

சென்னை உயர்நீதிமன்றம் அருகே அக்டோபர் 7 அன்று நடைபெற்ற ஆர்ப்பாட்டத்தில் பங்கேற்று திரும்பிய விடுதலைச் சிறுத்தைகள் கட்சித் தலைவர் தொல். திருமாவளவன் சென்ற காரை ஒரு இருசக்கர வாகன ஓட்டுநர் வழிமறித்ததாக கூறப்படுகிறது. இதனால் ஏற்பட்ட தகராறில் இரு தரப்பினருக்கும் இடையே கைகலப்பு ஏற்பட்டது.

இந்த சம்பவம் குறித்து தனது எக்ஸ் (X) பக்கத்தில் திருமாவளவன் பதிவிட்டிருந்தார்:

“உயர் நீதிமன்றம் அருகே நடந்த வழிமறிப்பு சம்பவம் தற்செயலானது அல்ல; திட்டமிட்ட சதி என தெரியவருகிறது. இதற்குப் பின்னணியில் ஆர்எஸ்எஸ் மற்றும் பாஜகவினர் இருப்பது எங்கள் விசாரணையில் உறுதியாகத் தெரிகிறது. எனவே, தமிழக அரசு வழக்குப் பதிவு செய்து தீவிரமாக விசாரிக்க வேண்டும். இதனை ஒளிபரப்பிய தனியார் தொலைக்காட்சிகளையும் முழுமையாக விசாரிக்க வேண்டும்.”

திருமாவளவனின் இந்தப் பதிவை இயக்குநர் பா.ரஞ்சித் பகிர்ந்து,

“இந்த சம்பவம் திட்டமிட்டது என தெரிகிறது. தமிழக அரசு உடனடியாக திருமாவளவனுக்கு கூடுதல் பாதுகாப்பு வழங்க வேண்டும்” எனக் கேட்டுக்கொண்டார்.

அந்தப் பதிவை தனது எக்ஸ் பக்கத்தில் பகிர்ந்த கமல்ஹாசன்,

“தம்பி திருமாவின் சந்தேகம் நியாயமானது; தம்பி பா.ரஞ்சித்தின் அக்கறை உண்மையானது. திருமாவளவன் சென்ற கார் வழிமறிக்கப்பட்ட விவகாரம் குறித்து காவல் துறை விசாரணை வேகமாக நடக்க வேண்டும். அவரது பாதுகாப்பை அதிகரிக்க தமிழக அரசு தேவையான நடவடிக்கை எடுக்க வேண்டும்” எனத் தெரிவித்தார்.