நத்தம் அருகே சுங்கச்சாவடி திறப்பை எதிர்த்து பொதுமக்கள் அதிகாரிகளை முற்றுகையிட்டனர்
திண்டுக்கலிலிருந்து நத்தம் நோக்கி செல்லும் தேசிய நெடுஞ்சாலையில் உள்ள அஞ்சுகுழிப்பட்டியில் அமைக்கப்பட்ட சுங்கச்சாவடியைத் திறக்க எதிர்ப்பு தெரிவித்து, ஆய்விற்காக வந்த அதிகாரிகளை பொதுமக்கள் சூழ்ந்தனர்.
திண்டுக்கலிலிருந்து நத்தம் செல்லும் சாலை சுமார் ரூ.270 கோடி செலவில் சீரமைக்கப்பட்டு, அதனை நான்கு வழிச்சாலையாக மாற்றாமல் இரு வழிச்சாலையாக மட்டுமே விரிவாக்கம் செய்யப்பட்டுள்ளது. மேலும், சாலை பணிகள் இன்னும் முழுமையாக முடிக்கப்படவில்லை.
இந்தத் திட்டத்தின் ஒரு பகுதியாக, அஞ்சுகுழிப்பட்டியில் சுங்கச்சாவடி நிறுவப்பட்டது. ஆனால் இதுவரை அது செயல்பாட்டில் வரவில்லை. சமீபத்தில் அந்தச் சுங்கச்சாவடியில் ஸ்கேனர் கருவிகள், கட்டண வசூல் அறைகள், தடுப்புகள் ஆகியவை புதுப்பிக்கப்பட்டன. இதையடுத்து தேசிய நெடுஞ்சாலைத் துறை அதிகாரிகள் அந்த இடத்தில் ஆய்வு மேற்கொண்டனர்.
இந்த தகவலை அறிந்த பொதுமக்கள் அங்கு திரண்டு, சாலை முழுமையடையவில்லை என்றும், நான்கு வழிச்சாலை அமைக்கப்படவில்லை என்றும் குற்றச்சாட்டுடன், சுங்கச்சாவடியைத் திறக்கக் கூடாது என வலியுறுத்தினர். மேலும், தடுப்புகளை அகற்றக் கோரினர். இதைத் தொடர்ந்து, அதிகாரிகள் அந்த தடுப்புகளை அகற்றினர். பின்னர், அதிகாரிகளிடம் தங்களது எதிர்ப்பை தெரிவித்துவிட்டு, பொதுமக்கள் அமைதியாக விலகினர்.
