நீலகிரி மாவட்டத்தில் கனமழைக்கு வாய்ப்பு: வானிலை மையம் தகவல்
இன்று நீலகிரி மாவட்டத்தின் சில பகுதிகளில் கனமழை பெய்யக்கூடும் என வானிலை ஆய்வு மையம் அறிவித்துள்ளது.
இதுகுறித்து சென்னை மண்டல வானிலை ஆய்வு மைய இயக்குநர் பா. செந்தாமரைக்கண்ணன் நேற்று வெளியிட்ட செய்தியில் கூறியதாவது:
வடமேற்கு வங்கக் கடலிலும் அதை ஒட்டிய பகுதிகளிலும் கடந்த சில நாட்களாக நிலவிய வளிமண்டல மேலடுக்கு சுழற்சி காரணமாக, தென்மேற்கு வங்கதேசம் மற்றும் மேற்கு வங்கத்தின் அருகிலுள்ள பகுதியில் நேற்று காலை காற்றழுத்தத் தாழ்வு மண்டலம் உருவானது. இது மேற்கு – வடமேற்குப் பகுதியை நோக்கி நகர்ந்து வலுப்பெறும் வாய்ப்பு உள்ளது.
அதேபோன்று, தெற்கு குஜராத் மற்றும் அதன் அருகிலுள்ள பகுதிகளில் ஏற்பட்ட மேலடுக்கு சுழற்சியின் காரணமாக, அந்தப்பகுதியிலும் ஒரு காற்றழுத்தத் தாழ்வு மண்டலம் உருவாகியுள்ளது. இது வடக்கு நோக்கி நகரும் என எதிர்பார்க்கப்படுகிறது.
இதன் விளைவாக, தமிழகத்தின் சில பகுதிகள், புதுச்சேரி மற்றும் காரைக்கால் பகுதிகளில் இன்று லேசான அல்லது மிதமான மழை பெய்யக்கூடும். நீலகிரி மாவட்டத்தில் சில இடங்களில் கனமழை பெய்யும் சாத்தியம் உள்ளது. 23-ம் தேதி வரை தமிழகம் முழுவதும் மழை வாய்ப்பு நீடிக்கக்கூடும்.
சென்னை மற்றும் புறநகர் பகுதிகளில் வானம் மேகமூட்டத்துடன் காணப்படும். நகரின் சில இடங்களில் லேசான அல்லது மிதமான மழை பெய்யக்கூடும். இந்நாளில் அதிகபட்ச வெப்பநிலை 96.8 டிகிரி பாரன்ஹீட், குறைந்தபட்ச வெப்பநிலை 78.8 முதல் 80.6 டிகிரி பாரன்ஹீட் வரை இருக்கலாம்.
மேலும், தென் தமிழக கடலோரம், மன்னார் வளைகுடா, வடக்கு மற்றும் மத்திய வங்கக் கடலின் பகுதிகள், மத்திய மற்றும் தென்மேற்கு அரபிக்கடல், குஜராத், கொங்கன், கோவா, கர்நாடகா, கேரளா கடலோர பகுதிகள் மற்றும் லட்சதீவு-மாலத்தீவு பகுதிகளில் மணிக்கு 60 முதல் 65 கி.மீ. வேகத்தில் பலத்த காற்று வீசக்கூடும் என தெரிவிக்கப்பட்டுள்ளது. எனவே, மீனவர்கள் இந்த பகுதிகளில் கடலுக்கு செல்ல வேண்டாம் என எச்சரிக்கை விடுக்கப்பட்டுள்ளது.
நேற்று காலை 8.30 மணி வரை கடந்த 24 மணி நேரத்தில் பதிவான மழை அளவுகளில், நீலகிரி மாவட்டம் அவலாஞ்சியில் 21 செமீ மழை பதிவாகியுள்ளது. என செய்திக்குறிப்பில் குறிப்பிடப்பட்டுள்ளது.
