தைலாபுரக் கூட்டத்தில் பங்கேற்காத நிர்வாகிகள் தேர்தலில் போட்டியிட முடியாது – ராமதாஸ்
பட்டாளி மக்கள் கட்சி நிறுவனர் டாக்டர் ராமதாஸ் கூறியதாவது, “தைலாபுரத்தில் நடைபெறும் ஆலோசனைக் கூட்டங்களில் பங்கேற்காத நிர்வாகிகளுக்கு 2026-ம் ஆண்டு நடைபெறவுள்ள சட்டப்பேரவைத் தேர்தலில் வேட்பாளராக நிற்க வாய்ப்பு அளிக்கப்படாது” என்றார்.
பாமக மாவட்டச் செயலாளர்கள், மாநிலத் தலைவர்கள் மற்றும் மாநில நிர்வாகிகள் கலந்து கொண்ட கூட்டம் நேற்று தைலாபுரத்தில் நடைபெற்றது. இந்தக் கூட்டத்திற்கு நிறுவனர் ராமதாஸ் தலைமை தாங்கினார். மாநில பொதுச் செயலாளர் முரளிசங்கர், அரசியல் ஆலோசனைக் குழு தலைவர் தீரன், மாநிலச் செயலாளர் அன்பழகன், பொருளாளர் சையத் மன்சூர் உசேன், சேலம் மேற்கு தொகுதி எம்எல்ஏ அருள் உள்ளிட்ட பலர் இதில் கலந்துகொண்டனர்.
பின்னர் செய்தியாளர்களிடம் பேசிய ராமதாஸ் கூறியதாவது:
“பாமக மற்றும் வன்னியர் சங்கத்தை கடந்த 46 ஆண்டுகளாக வழிநடத்தி வருகிறேன். வன்னியர் சங்கத்துக்கு பு.தா. அருள் மொழி தலைவராக இருக்க, கட்சியின் நிறுவனர் மற்றும் தலைவராக நானும் இருக்கிறேன். தற்போது 34 துணை அமைப்புகளை உருவாக்கி, அவற்றை செயல்படுத்தி வருகிறேன். இந்த அமைப்புகளை திறம்பட நடத்தும் வகையில் நிர்வாகிகளை ஊக்குவித்து வருகிறேன்.
2026-ல் பாமக மிகப்பெரிய வெற்றியைப் பெறும். தைலாபுர கூட்டத்தில் கலந்துகொண்ட மாவட்டச் செயலாளர்கள், தலைவர்கள் மற்றும் மாநில பொறுப்பாளர்களே அந்தத் தேர்தலில் போட்டியிடவுள்ளனர். அவர்களையே வேட்பாளர்களாக தேர்வு செய்வேன். இவர்கள் தான் எதிர்கால சட்டப்பேரவை உறுப்பினர்கள் ஆவார்கள். கட்சியின் அனைத்து அதிகாரங்களும் எனக்கு இருக்கின்றன என்பதாலேயே தலைவராகவும் செயல்படுகிறேன்.
இப்போது கூட்டணி குறித்து எதையும் கூற வேண்டிய அவசியமில்லை. இப்போது பேசினால், கூட்டணி முடிவுக்கு வந்துவிட்டதா என்று சந்தேகம் எழும். ஆனால், ஒரு நல்ல, வெற்றிகரமான கூட்டணி அமையும். தற்போதுள்ள 5 பாமக எம்எல்ஏக்களுக்கு மீண்டும் வாய்ப்பு தரப்படுமா என்பது ஒரு ரகசியமாகவே உள்ளது.
மதுரை முருக பக்தர் மாநாட்டில் பெரியார் மற்றும் அண்ணா அவமதிக்கபட்டதாகக் கேட்கிறீர்கள். யாரையும் இழிவுபடுத்தக் கூடாது” என்றார் ராமதாஸ். மேலும், பாமகவின் இணைச் செயலாளராக அருள் எம்எல்ஏ நியமிக்கப்பட்டதாகவும் அவர் தெரிவித்தார்.
அன்புமணி நடவடிக்கை:
இதற்கிடையில், பாமக தலைவர் அன்புமணி ராமதாஸ், அருள் எம்எல்ஏவை சேலம் மாநகர் மாவட்ட செயலாளர் பதவியில் இருந்து நீக்கியுள்ளார். அந்தப் பதவிக்கு க.சரவணன் என்பவரை நியமித்துள்ளார். அவருக்கு சேலம் மேற்கு, வடக்கு மற்றும் தெற்கு சட்டப்பேரவை தொகுதிகள் ஒதுக்கப்பட்டுள்ளன. அந்த மாவட்டத்தில் உள்ள அனைத்து நிலை நிர்வாகிகளும் இவருக்கு முழு ஒத்துழைப்பு வழங்க வேண்டும் என அன்புமணி கேட்டுக்கொண்டுள்ளார்.
ராமதாஸ் ஆதரவாளராகக் கருதப்படும் இரா.அருள், அண்மையில் அன்புமணி நடத்திய சேலம் மற்றும் தருமபுரி மாவட்ட பொதுக்குழுக் கூட்டத்தில் பங்கேற்கவில்லை என்பது குறிப்பிடத்தக்கது.
