தென்காசியில் அரசு விழாவுக்காக கட்டாய வசூல் தொடர்பான ஆடியோ: பேசிய நபரை தேடி வருகின்றோம் – அமைச்சர் மா.சுப்பிரமணியன்

திண்டுக்கல் அரசு மருத்துவக் கல்லூரி மருத்துவமனையில் ரூ.2.81 கோடி செலவில் நிறுவப்பட்ட புதிய சி.டி. ஸ்கேன், டிஜிட்டல் எக்ஸ்ரே மற்றும் புளூரோஸ்கோபி கருவிகளை, பொதுமக்கள் பயன்பாட்டிற்காக சுகாதாரத்துறை அமைச்சர் மா.சுப்பிரமணியன் இன்று (ஜூன் 28) திறந்து வைத்தார். மேலும், ரூ.2.25 கோடி மதிப்பில் திண்டுக்கல்லில் நான்கு இடங்களில் புதிய அரசு ஆரம்ப சுகாதார நிலையங்கள் கட்டுவதற்கான அடிக்கல் நாட்டும் நிகழ்விலும் அவர் பங்கேற்றார்.

பின்னர் செய்தியாளர்களிடம் பேசிய அமைச்சர், “திண்டுக்கல் அரசு மருத்துவக் கல்லூரியில் தினசரி சுமார் 3,600 பேர் புறநோயாளிகளாகவும், 1,200-க்கும் மேற்பட்டோர் உள்நோயாளிகளாகவும் சிகிச்சை பெறுகிறார்கள். நோயாளிகள் எண்ணிக்கை அதிகமாக இருப்பதால், இங்கு கூடுதல் சி.டி. ஸ்கேன் மற்றும் எக்ஸ்ரே கருவிகள் வாங்கப்பட்டுள்ளன” என்றார்.

அவர் மேலும் தெரிவித்ததாவது: “முந்தைய காலத்தில் 1,500 அரசு கட்டிடங்கள் பயன்படுத்த முடியாத நிலையில் இருந்தன. தற்போது, 1,600 புதிய கட்டிடங்கள் கட்டி வழங்கப்பட்டுள்ளன. வரும் ஜூலை 3-ம் தேதி, சென்னை முதலமைச்சரின் காணொளி வாயிலாக, மாநிலம் முழுவதும் 208 நகர்ப்புற வாழ்வாதார மையங்கள் மற்றும் 50 அரசு ஆரம்ப சுகாதார நிலையங்கள் திறக்கப்படவுள்ளன. இதற்கு முந்தையதாக 500 மையங்கள் திறக்கப்பட்டுள்ளன என்பது குறிப்பிடத்தக்கது.

தடுப்பூசி செலுத்தும் பணிகள் திட்டமிட்டு நடைபெற்று வருகின்றன. செவிலியர்கள் மற்றும் தற்காலிக ஊழியர்கள் இந்த பணிகளில் ஈடுபடுத்தப்பட்டுள்ளனர். காலிப்பணியிடங்கள் விரைவில் நிரப்பப்படும். திண்டுக்கல் மருத்துவமனையில் ஆஞ்சியோ சிகிச்சையும் திறந்த இருதய அறுவை சிகிச்சையும் தொடங்கும்.

மருத்துவ துறையின் வரலாற்றில் முதன்முறையாக, 25 மாவட்ட தலைமை அரசு மருத்துவமனைகள் ஒரே நேரத்தில், ரூ.1,018 கோடி செலவில் மேம்படுத்தப்பட்டு வருகின்றன. இதில் திருத்தணியில் பணிகள் முடிந்து, முதல்வர் அதை திறந்துவைத்துள்ளார். இன்னும் இரண்டு மாதங்களில் அனைத்து மாவட்ட மருத்துவமனைகளும் பொதுமக்கள் பயன்பாட்டுக்காக தயார் நிலையில் இருக்கும்.

தென்காசியில் அரசு விழாவை முன்னிட்டு, அரசு ஆரம்ப சுகாதார நிலைய மருத்துவர்களிடம் கட்டாய வசூல் மேற்கொள்ளப்பட்டதாக வெளியான ஆடியோவில் பேசிய நபர் யார் எனக் கண்டறிய முயற்சி நடைபெற்று வருகிறது. இந்த விவகாரம் தொடர்பாக தென்காசி காவல் நிலையத்தில் வழக்கு பதிவு செய்யப்பட்டுள்ளதுடன், மூன்று மருத்துவமனை இணை இயக்குநர்களின் மூலம் விசாரணை நடைபெற்று வருகிறது. அந்த நபரை கண்டுபிடிக்க செய்தியாளர்களின் உதவியும் தேவைப்படுகிறது” என அவர் தெரிவித்தார்.

இந்நிகழ்வில் ஊரக வளர்ச்சித் துறை அமைச்சர் இ. பெரியசாமி, உணவுத் துறை அமைச்சர் அர. சக்கரபாணி, நாடாளுமன்ற உறுப்பினர் சச்சிதானந்தம், மாவட்ட ஆட்சியர் சரவணன் மற்றும் மருத்துவக் கல்லூரியின் டீன் சுகந்தி ராஜகுமாரி உள்ளிட்டோர் கலந்து கொண்டனர்.